2Samuel.utf8_txt

10O	1	1		80260	וַיְהִ֗י אַֽחֲרֵי֨ מֹ֣ות שָׁא֔וּל וְדָוִ֣ד שָׁ֔ב מֵֽהַכֹּ֖ות אֶת־הָֽעֲמָלֵ֑ק וַיֵּ֧שֶׁב דָּוִ֛ד בְּצִקְלָ֖֯ג יָמִ֥ים שְׁנָֽיִם׃
10O	1	2		80270	וַיְהִ֣י ׀ בַּיֹּ֣ום הַשְּׁלִישִׁ֗י וְהִנֵּה֩ אִ֨ישׁ בָּ֤א מִן־הַמַּֽחֲנֶה֨ מֵעִ֣ם שָׁא֔וּל וּבְגָדָ֣יו קְרֻעִ֔ים וַֽאֲדָמָ֖ה עַל־רֹאשֹׁ֑ו וַיְהִי֙ בְּבֹאֹ֣ו אֶל־דָּוִ֔ד וַיִּפֹּ֥ל אַ֖רְצָה וַיִּשְׁתָּֽחוּ׃
10O	1	3		80280	וַיֹּ֤אמֶר לֹו֙ דָּוִ֔ד אֵ֥י מִזֶּ֖ה תָּבֹ֑וא וַיֹּ֣אמֶר אֵלָ֔יו מִמַּֽחֲנֵ֥ה יִשְׂרָאֵ֖ל נִמְלָֽטְתִּי׃
10O	1	4		80290	וַיֹּ֨אמֶר אֵלָ֥יו דָּוִ֛ד מֶֽה־הָיָ֥ה הַדָּבָ֖ר הַגֶּד־נָ֣א לִ֑י וַ֠יֹּאמֶר אֲשֶׁר־נָ֨ס הָעָ֜ם מִן־הַמִּלְחָמָ֗ה וְגַם־הַרְבֵּ֞ה נָפַ֤ל מִן־הָעָם֨ וַיָּמֻ֔תוּ וְגַ֗ם שָׁא֛וּל וִיהֹֽונָתָ֥ן בְּנֹ֖ו מֵֽתוּ׃
10O	1	5		80300	וַיֹּ֣אמֶר דָּוִ֔ד אֶל־הַנַּ֖עַר הַמַּגִּ֣יד לֹ֑ו אֵ֣יךְ יָדַ֔עְתָּ כִּי־מֵ֥ת שָׁא֖וּל וִיהֹֽונָתָ֥ן בְּנֹֽו׃
10O	1	6		80310	וַיֹּ֜אמֶר הַנַּ֣עַר ׀ הַמַּגִּ֣יד לֹ֗ו נִקְרֹ֤א נִקְ֙רֵיתִי֨ בְּהַ֣ר הַגִּלְבֹּ֔עַ וְהִנֵּ֥ה שָׁא֖וּל נִשְׁעָ֣ן עַל־חֲנִיתֹ֑ו וְהִנֵּ֥ה הָרֶ֛כֶב וּבַֽעֲלֵ֥י הַפָּֽרָשִׁ֖ים הִדְבִּיקֻֽהוּ׃
10O	1	7		80320	וַיִּ֥פֶן אַֽחֲרָ֖יו וַיִּרְאֵ֑נִי וַיִּקְרָ֣א אֵלָ֔י וָֽאֹמַ֖ר הִנֵּֽנִי׃
10O	1	8		80330	וַיֹּ֥אמֶר לִ֖י מִי־אָ֑תָּה וָֽ֯אֹמַ֣ר אֵלָ֔יו עֲמָֽלֵקִ֖י אָנֹֽכִי׃
10O	1	9		80340	וַיֹּ֣אמֶר אֵלַ֗י עֲמָד־נָ֤א עָלַי֙ וּמֹ֣תְתֵ֔נִי כִּ֥י אֲחָזַ֖נִי הַשָּׁבָ֑ץ כִּֽי־כָל־עֹ֥וד נַפְשִׁ֖י בִּֽי׃
10O	1	10		80350	וָאֶֽעֱמֹ֤ד עָלָיו֙ וַֽ֯אֲמֹ֣תְתֵ֔הוּ כִּ֣י יָדַ֔עְתִּי כִּ֛י לֹ֥א יִֽחְיֶ֖ה אַֽחֲרֵ֣י נִ֯פְלֹ֑ו וָֽאֶקַּ֞ח הַנֵּ֣זֶר ׀ אֲשֶׁ֣ר עַל־רֹאשֹׁ֗ו וְאֶצְעָדָה֙ אֲשֶׁ֣ר עַל־זְרֹעֹ֔ו וָֽאֲבִיאֵ֥ם אֶל־אֲדֹנִ֖י הֵֽנָּה׃
10O	1	11		80360	וַיַּֽחֲזֵ֥ק דָּוִ֛ד בִּבְגָדָ֖֯ו וַיִּקְרָעֵ֑ם וְגַ֥ם כָּל־הָֽאֲנָשִׁ֖ים אֲשֶׁ֥ר אִתֹּֽו׃
10O	1	12		80370	וַֽיִּסְפְּדוּ֙ וַיִּבְכּ֔וּ וַיָּצֻ֖מוּ עַד־הָעָ֑רֶב עַל־שָׁא֞וּל וְעַל־יְהֹֽונָתָ֣ן בְּנֹ֗ו וְעַל־עַ֤ם יְהֺוָה֨ וְעַל־בֵּ֣ית יִשְׂרָאֵ֔ל כִּ֥י נָֽפְל֖וּ בֶּחָֽרֶב׃ ײ
10O	1	13		80380	וַיֹּ֣אמֶר דָּוִ֗ד אֶל־הַנַּ֨עַר֨ הַמַּגִּ֣יד לֹ֔ו אֵ֥י מִזֶּ֖ה אָ֑תָּה וַיֹּ֕אמֶר בֶּן־אִ֛ישׁ גֵּ֥ר עֲמָֽלֵקִ֖י אָנֹֽכִי׃
10O	1	14		80390	וַיֹּ֥אמֶר אֵלָ֖יו דָּוִ֑ד אֵ֚יךְ לֹ֣א יָרֵ֔אתָ לִשְׁלֹחַ֙ יָֽדְךָ֔ לְשַׁחֵ֖ת אֶת־מְשִׁ֥יחַ יְהֺוָֽה׃
10O	1	15		80400	וַיִּקְרָ֣א דָוִ֗ד לְאַחַד֙ מֵֽהַנְּעָרִ֔ים וַיֹּ֖אמֶר גַּ֣שׁ פְּגַע־בֹּ֑ו וַיַּכֵּ֖הוּ וַיָּמֹֽת׃
10O	1	16		80410	וַיֹּ֤אמֶר אֵלָיו֙ דָּוִ֔ד דָּֽמֵי֯ךָ֖ עַל־רֹאשֶׁ֑ךָ כִּ֣י פִ֗יךָ עָנָ֤ה בְךָ֨ לֵאמֹ֔ר אָֽנֹכִ֥י מֹתַ֖תִּי אֶת־מְשִׁ֥יחַ יְהֺוָֽה׃ ױ
10O	1	17		80420	וַיְקֹנֵ֣ן דָּוִ֔ד אֶת־הַקִּינָ֖ה הַזֹּ֑את עַל־שָׁא֖וּל וְעַל־יְהֹֽונָתָ֥ן בְּנֹֽו׃
10O	1	18		80430	וַיֹּ֕אמֶר לְלַמֵּ֥ד בְּנֵֽי־יְהוּדָ֖ה קָ֑שֶׁת הִנֵּ֥ה כְתוּבָ֖ה עַל־סֵ֥פֶר הַיָּשָֽׁר׃
10O	1	19		80440	הַצְּבִי֙ יִשְׂרָאֵ֔ל עַל־בָּֽמֹותֶ֖יךָ חָלָ֑ל אֵ֖יךְ נָֽפְל֥וּ גִבֹּורִֽים׃
10O	1	20		80450	אַל־תַּגִּ֣ידוּ בְגַ֔ת אַל־תְּבַשְּׂר֖וּ בְּחוּצֹ֣ת אַשְׁקְלֹ֑ון פֶּן־תִּשְׂמַ֨חְנָה֙ בְּנֹ֣ות פְּלִשְׁתִּ֔ים פֶּן־תַּֽעֲלֹ֖זְנָה בְּנֹ֥ות הָֽעֲרֵלִֽים׃
10O	1	21		80460	הָרֵ֣י בַגִּלְבֹּ֗עַ אַל־טַ֧ל וְאַל־מָטָ֛ר עֲלֵיכֶ֖ם וּשְׂדֵ֣י תְרוּמֹ֑ת כִּ֣י שָׁ֤ם נִגְעַל֨ מָגֵ֣ן גִּבֹּורִ֔ים מָגֵ֣ן שָׁא֔וּל בְּלִ֖י מָשִׁ֥יחַ בַּשָּֽׁמֶן׃
10O	1	22		80470	מִדַּ֣ם חֲלָלִ֗ים מֵחֵ֨לֶב֨ גִּבֹּורִ֔ים קֶ֚שֶׁת יְהֹ֣ונָתָ֔ן לֹ֥א נָשֹׂ֖וג אָחֹ֑ור וְחֶ֣רֶב שָׁא֔וּל לֹ֥א תָשׁ֖וּב רֵיקָֽם׃
10O	1	23		80480	שָׁא֣וּל וִיהֹֽונָתָ֗ן הַנֶּֽאֱהָבִ֤ים וְהַנְּעִימִם֙ בְּחַיֵּיהֶ֔ם וּבְמֹותָ֖ם לֹ֣א נִפְרָ֑דוּ מִנְּשָׁרִ֣ים קַ֔לּוּ מֵֽאֲרָיֹ֖ות גָּבֵֽרוּ׃
10O	1	24		80490	בְּנֹות֨ יִשְׂרָאֵ֔ל אֶל־שָׁא֖וּל בְּכֶ֑ינָה הַמַּלְבִּֽשְׁכֶ֤ם שָׁנִי֙ עִם־עֲדָנִ֔ים הַמַּֽעֲלֶה֙ עֲדִ֣י זָהָ֔ב עַ֖ל לְבֽוּשְׁכֶֽן׃
10O	1	25		80500	אֵ֚יךְ נָפְל֣וּ גִבֹּרִ֔ים בְּתֹ֖וךְ הַמִּלְחָמָ֑ה יְהֹ֣ונָתָ֔ן עַל־בָּֽמֹותֶ֖יךָ חָלָֽל׃
10O	1	26		80510	צַר־לִ֣י עָלֶ֗יךָ אָחִ֙י יְהֹ֣ונָתָ֔ן נָעַ֥מְתָּ לִּ֖י מְאֹ֑ד נִפְלְאַ֤֯תָה אַֽהֲבָֽתְךָ֨ לִ֔י מֵאַֽהֲבַ֖ת נָשִֽׁים׃
10O	1	27		80520	אֵ֚יךְ נָֽפְל֣וּ גִבֹּורִ֔ים וַיֹּֽאבְד֖וּ כְּלֵ֥י מִלְחָמָֽה׃ ײ
10O	2	1		80530	וַיְהִ֣י אַֽחֲרֵי־כֵ֗ן וַיִּשְׁאַל֩ דָּוִ֨ד בַּֽיהֺוָ֤ה ׀ לֵאמֹר֨ הַאֶֽעֱלֶ֗ה בְּאַחַת֙ עָרֵ֣י יְהוּדָ֔ה וַיֹּ֧אמֶר יְהֺוָ֛ה אֵלָ֖יו עֲלֵ֑ה וַיֹּ֧אמֶר דָּוִ֛ד אָ֥נָה אֶֽעֱלֶ֖ה וַיֹּ֥אמֶר חֶבְרֹֽנָה׃
10O	2	2		80540	וַיַּ֤עַל שָׁם֨ דָּוִ֔ד וְגַ֖ם שְׁתֵּ֣י נָשָׁ֑יו אֲחִינֹ֨עַם֙ הַיִּזְרְעֵלִ֔ית וַֽאֲבִיגַ֕יִל אֵ֖שֶׁת נָבָ֥ל הַכַּרְמְלִֽי׃
10O	2	3		80550	וַֽאֲנָשָׁ֧יו אֲשֶׁר־עִמֹּ֛ו הֶֽעֱלָ֥ה דָוִ֖ד אִ֣ישׁ וּבֵיתֹ֑ו וַיֵּֽשְׁב֖וּ בְּעָרֵ֥י חֶבְרֹֽון׃
10O	2	4		80560	וַיָּבֹ֨אוּ֨ אַנְשֵׁ֣י יְהוּדָ֔ה וַיִּמְשְׁחוּ־שָׁ֧ם אֶת־דָּוִ֛ד לְמֶ֖לֶךְ עַל־בֵּ֣ית יְהוּדָ֑ה וַיַּגִּ֤דוּ לְדָוִד֨ לֵאמֹ֔ר אַנְשֵׁי֨ יָבֵ֣ישׁ גִּלְעָ֔ד אֲשֶׁ֥ר קָֽבְר֖וּ אֶת־שָׁאֽוּל׃ ױ
10O	2	5		80570	וַיִּשְׁלַ֤ח דָּוִד֨ מַלְאָכִ֔ים אֶל־אַנְשֵׁ֖י יָבֵ֣ישׁ גִּלְעָ֑ד וַיֹּ֣אמֶר אֲלֵיהֶ֗ם בְּרֻכִ֤ים אַתֶּם֨ לַֽיהֺוָ֔ה אֲשֶׁ֨ר עֲשִׂיתֶ֜ם הַחֶ֣סֶד הַזֶּ֗ה עִם־אֲדֹֽנֵיכֶם֨ עִם־שָׁא֔וּל וַתִּקְבְּר֖וּ אֹתֹֽו׃
10O	2	6		80580	וְעַתָּ֕ה יַֽעַשׂ־יְהֺוָ֥ה עִמָּכֶ֖ם חֶ֣סֶד וֶֽאֱמֶ֑ת וְגַ֣ם אָֽנֹכִ֗י אֶֽעֱשֶׂ֤ה אִתְּכֶם֙ הַטֹּובָ֣ה הַזֹּ֔את אֲשֶׁ֥ר עֲשִׂיתֶ֖ם הַדָּבָ֥ר הַזֶּֽה׃
10O	2	7		80590	וְעַתָּ֣ה ׀ תֶּֽחֱזַ֣קְנָה יְדֵיכֶ֗ם וִֽהְיוּ֙ לִבְנֵי־חַ֔יִל כִּי־מֵ֖ת אֲדֹֽנֵיכֶ֣ם שָׁא֑וּל וְגַ֣ם אֹתִ֗י מָֽשְׁח֧וּ בֵֽית־יְהוּדָ֛ה לְמֶ֖לֶךְ עֲלֵיהֶֽם׃ ױ
10O	2	8		80600	וְאַבְנֵ֣ר בֶּן־נֵ֔ר שַׂר־צָבָ֖א אֲשֶׁ֣ר לְשָׁא֑וּל לָקַ֗ח אֶת־אִֽישׁ־בֹּ֨שֶׁת֙ בֶּן־שָׁא֔וּל וַיַּֽעֲבִרֵ֖הוּ מַֽחֲנָֽיִם׃
10O	2	9		80610	וַיַּמְלִכֵ֨ה֙וּ אֶל־הַגִּלְעָ֔ד וְאֶל־הָֽאֲשׁוּרִ֖י וְאֶֽל־יִזְרְעֶ֑אל וְעַל־אֶפְרַ֨יִם֙ וְעַל־בִּנְיָמִ֔ן וְעַל־יִשְׂרָאֵ֖ל כֻּלֹּֽה׃ ױ
10O	2	10		80620	בֶּן־אַרְבָּעִ֨ים שָׁנָ֜ה אִֽישׁ־בּ֣שֶׁת בֶּן־שָׁא֗וּל בְּמָלְכֹו֙ עַל־יִשְׂרָאֵ֔ל וּשְׁתַּ֥יִם שָׁנִ֖ים מָלָ֑ךְ אַ֚ךְ בֵּ֣ית יְהוּדָ֔ה הָי֖וּ אַֽחֲרֵ֥י דָוִֽד׃
10O	2	11		80630	וַיְהִי֨ מִסְפַּ֣ר הַיָּמִ֔ים אֲשֶׁר֩ הָיָ֨ה דָוִ֥ד מֶ֛לֶךְ בְּחֶבְרֹ֖ון עַל־בֵּ֣ית יְהוּדָ֑ה שֶׁ֥בַע שָׁנִ֖ים וְשִׁשָּׁ֥ה חֳדָשִֽׁים׃ ױ
10O	2	12		80640	וַיֵּצֵא֙ אַבְנֵ֣ר בֶּן־נֵ֔ר וְעַבְדֵ֖י אִֽישׁ־בּ֣שֶׁת בֶּן־שָׁא֑וּל מִמַּֽחֲנַ֖יִם גִּבְעֹֽונָה׃
10O	2	13		80650	וְיֹואָ֨ב בֶּן־צְרוּיָ֜ה וְעַבְדֵ֤י דָוִד֨ יָֽצְא֔וּ וַיִּפְגְּשׁ֛וּם עַל־בְּרֵכַ֥ת גִּבְעֹ֖ון יַחְדָּ֑ו וַיֵּ֨שְׁב֜וּ אֵ֤לֶּה עַל־הַבְּרֵכָה֙ מִזֶּ֔ה וְאֵ֥לֶּה עַל־הַבְּרֵכָ֖ה מִזֶּֽה׃
10O	2	14		80660	וַיֹּ֤אמֶר אַבְנֵר֨ אֶל־יֹואָ֔ב יָק֤וּמוּ נָא֨ הַנְּעָרִ֔ים וִישַֽׂחֲק֖וּ לְפָנֵ֑ינוּ וַיֹּ֥אמֶר יֹואָ֖ב יָקֻֽמוּ׃
10O	2	15		80670	וַיָּקֻ֖מוּ וַיַּֽעַבְר֣וּ בְּמִסְפָּ֑ר שְׁנֵ֧ים עָשָׂ֣ר לְבִנְיָמִ֗ן וּלְאִֽישׁ־בּ֨שֶׁת֨ בֶּן־שָׁא֔וּל וּשְׁנֵ֥ים עָשָׂ֖ר מֵֽעַבְדֵ֥י דָוִֽד׃
10O	2	16		80680	וַיַּֽחֲזִ֜קוּ אִ֣ישׁ ׀ בְּרֹ֣אשׁ רֵעֵ֗הוּ וְחַרְבֹּו֙ בְּצַ֣ד רֵעֵ֔הוּ וַיִּפְּל֖וּ יַחְדָּ֑ו וַיִּקְרָא֙ לַמָּקֹ֣ום הַה֔וּא חֶלְקַ֥ת הַצֻּרִ֖ים אֲשֶׁ֥ר בְּגִבְעֹֽון׃
10O	2	17		80690	וַתְּהִ֧י הַמִּלְחָמָ֛ה קָשָׁ֥ה עַד־מְאֹ֖ד בַּיֹּ֣ום הַה֑וּא וַיִּנָּ֤גֶף אַבְנֵר֙ וְאַנְשֵׁ֣י יִשְׂרָאֵ֔ל לִפְנֵ֖י עַבְדֵ֥י דָוִֽד׃
10O	2	18		80700	וַיִּ֣הְיוּ שָׁ֗ם שְׁלשָׁה֨ בְּנֵ֣י צְרוּיָ֔ה יֹואָ֥ב וַֽאֲבִישַׁ֖י וַֽעֲשָׂהאֵ֑ל וַֽעֲשָׂהאֵל֨ קַ֣ל בְּרַגְלָ֔יו כְּאַחַ֥ד הַצְּבָיִ֖ם אֲשֶׁ֥ר בַּשָּׂדֶֽה׃
10O	2	19		80710	וַיִּרְדֹּ֥ף עֲשָׂהאֵ֖ל אַֽחֲרֵ֣י אַבְנֵ֑ר וְלֹֽא־נָטָ֣ה לָלֶ֗כֶת עַלֽ־הַיָּמִין֙ וְעַל־הַשְּׂמֹ֔אל מֵאַֽחֲרֵ֖י אַבְנֵֽר׃
10O	2	20		80720	וַיִּ֤פֶן אַבְנֵר֨ אַֽחֲרָ֔יו וַיֹּ֕אמֶר הַֽאַתָּ֥ה זֶ֖ה עֲשָׂהאֵ֑ל וַיֹּ֖אמֶר אָנֹֽכִי׃
10O	2	21		80730	וַיֹּ֧אמֶר לֹ֣ו אַבְנֵ֗ר נְטֵ֤ה לְךָ֙ עַל־יְמִֽינְךָ֨ אֹ֣ו עַל־שְׂמֹאלֶ֔ךָ וֶֽאֱחֹ֣ז לְךָ֗ אֶחָד֨ מֵֽהַנְּעָרִ֔ים וְקַח־לְךָ֖ אֶת־חֲלִֽצָתֹ֑ו וְלֹֽא־אָבָ֣ה עֲשָׂהאֵ֔ל לָס֖וּר מֵאַֽחֲרָֽיו׃
10O	2	22		80740	וַיֹּ֧סֶף עֹ֣וד אַבְנֵ֗ר לֵאמֹר֙ אֶל־עֲשָׂהאֵ֔ל ס֥וּר לְךָ֖ מֵאַֽחֲרָ֑י לָ֤מָּה אַכֶּ֨כָּה֨ אַ֔רְצָה וְאֵיךְ֨ אֶשָּׂ֣א פָנַ֔י אֶל־יֹואָ֖ב אָחִֽיךָ׃
10O	2	23		80750	וַיְמָאֵ֣ן לָס֗וּר וַיַּכֵּ֣הוּ אַבְנֵר֩ בְּאַֽחֲרֵ֨י הַֽחֲנִ֜ית אֶל־הַחֹ֗מֶשׁ וַתֵּצֵ֤א הַֽחֲנִית֙ מֵאַֽחֲרָ֔יו וַיִּפָּל־שָׁ֖ם וַיָּ֣מָת תַּחְתָּ֑ו֯ וַיְהִ֡י כָּל־הַבָּ֣א אֶל־הַמָּקֹום֩ אֲשֶׁר־נָ֨פַל שָׁ֧ם עֲשָׂהאֵ֛ל וַיָּמֹ֖ת וַיַּֽעֲמֹֽדוּ׃
10O	2	24		80760	וַיִּרְדְּפ֛וּ יֹואָ֥ב וַֽאֲבִישַׁ֖י אַֽחֲרֵ֣י אַבְנֵ֑ר וְהַשֶּׁ֣מֶשׁ בָּ֔אָה וְהֵ֗מָּה בָּ֚אוּ עַד־גִּבְעַ֣ת אַמָּ֔ה אֲשֶׁר֨ עַל־פְּנֵי־גִ֔יחַ דֶּ֖רֶךְ מִדְבַּ֥ר גִּבְעֹֽון׃
10O	2	25		80770	וַיִּתְקַבְּצ֤וּ בְנֵֽי־בִנְיָמִן֙ אַֽחֲרֵ֣י אַבְנֵ֔ר וַיִּֽהְי֖וּ לַֽאֲגֻדָּ֣ה אֶחָ֑ת וַיַּ֣עַמְד֔וּ עַל־רֹ֖אשׁ גִּבְעָ֥ה אֶחָֽת׃
10O	2	26		80780	וַיִּקְרָ֨א אַבְנֵ֜ר אֶל־יֹואָ֗ב וַיֹּ֨אמֶר֨ הֲלָנֶ֨צַח֨ תֹּ֣אכַל חֶ֔רֶב הֲלֹ֣וא יָדַ֔עְתָּה כִּֽי־מָרָ֥ה תִֽהְיֶ֖ה בָּאַֽחֲרֹונָ֑ה וְעַד־מָתַי֨ לֹֽא־תֹאמַ֣ר לָעָ֔ם לָשׁ֖וּב מֵאַֽחֲרֵ֥י אֲחֵיהֶֽם׃
10O	2	27		80790	וַיֹּ֣אמֶר יֹואָ֔ב חַ֚י הָֽאֱלֹהִ֔ים כִּ֥י לוּלֵ֖א דִּבַּ֑֯רְתָּ כִּ֣י אָ֤ז מֵֽהַבֹּ֨קֶר֨ נַֽעֲלָ֣ה הָעָ֔ם אִ֖ישׁ מֵאַֽחֲרֵ֥י אָחִֽיו׃
10O	2	28		80800	וַיִּתְקַ֤ע יֹואָב֙ בַּשֹּׁופָ֔ר וַיַּֽעַמְדוּ֙ כָּל־הָעָ֔ם וְלֹֽא־יִרְדְּפ֥וּ עֹ֖וד אַֽחֲרֵ֣י יִשְׂרָאֵ֑ל וְלֹא־יָֽסְפ֥וּ עֹ֖וד לְהִלָּחֵֽם׃
10O	2	29		80810	וְאַבְנֵ֣ר וַֽאֲנָשָׁ֗יו הָֽלְכוּ֨ בָּֽעֲרָבָ֔ה כֹּ֖ל הַלַּ֣יְלָה הַה֑וּא וַיַּֽעַבְר֣וּ אֶת־הַיַּרְדֵּ֗ן וַיֵּֽלְכוּ֙ כָּל־הַבִּתְרֹ֔ון וַיָּבֹ֖אוּ מַחֲנָֽיִם׃
10O	2	30		80820	וְיֹואָ֗ב שָׁ֚ב מֵאַֽחֲרֵ֣י אַבְנֵ֔ר וַיִּקְבֹּ֖ץ אֶת־כָּל־הָעָ֑ם וַיִּפָּ֨קְד֜וּ מֵֽעַבְדֵ֥י דָוִ֛ד תִּשְׁעָֽה־עָשָׂ֥ר אִ֖ישׁ וַֽעֲשָׂהאֵֽל׃
10O	2	31		80830	וְעַבְדֵ֣י דָוִ֗ד הִכּוּ֨ מִבִּנְיָמִ֔ן וּבְאַנְשֵׁ֖י אַבְנֵ֑ר שְׁלֽשׁ־מֵאֹ֧ות וְשִׁשִּׁ֛ים אִ֖ישׁ מֵֽתוּ׃
10O	2	32		80840	וַיִּשְׂאוּ֨ אֶת־עֲשָׂהאֵ֔ל וַיִּקְבְּרֻ֨הוּ֨ בְּקֶ֣בֶר אָבִ֔יו אֲשֶׁ֖ר בֵּ֣ית לָ֑חֶם וַיֵּֽלְכ֣וּ כָל־הַלַּ֗יְלָה יֹואָב֙ וַֽאֲנָשָׁ֔יו וַיֵּאֹ֥ר לָהֶ֖ם בְּחֶבְרֹֽון׃ ײ
10O	3	1		80850	וַתְּהִ֤י הַמִּלְחָמָה֨ אֲרֻכָּ֔ה בֵּ֚ין בֵּ֣ית שָׁא֔וּל וּבֵ֖ין בֵּ֣ית דָּוִ֑ד וְדָוִד֨ הֹלֵ֣ךְ וְחָזֵ֔ק וּבֵ֥ית שָׁא֖וּל הֹֽלְכִ֥ים וְדַלִּֽים׃ ױ
10O	3	2		80860	וַיִָּֽ֯לְד֧וּ לְדָוִ֛ד בָּנִ֖ים בְּחֶבְרֹ֑ון וַיְהִ֤י בְכֹורֹו֙ אַמְנֹ֔ון לַֽאֲחִינֹ֖עַם הַיִּזְרְעֵאלִֽית׃
10O	3	3		80870	וּמִשְׁנֵ֣הוּ כִלְאָ֔ב לַֽאֲבִיגִַ֕ל֯ אֵ֖שֶׁת נָבָ֣ל הַכַּרְמְלִ֑י וְהַשְּׁלִשִׁי֙ אַבְשָׁלֹ֣ום בֶּן־מַֽעֲכָ֔ה בַּת־תַּלְמַ֖י מֶ֥לֶךְ גְּשֽׁוּר׃
10O	3	4		80880	וְהָֽרְבִיעִ֖י אֲדֹֽנִיָּ֣ה בֶן־חַגִּ֑ית וְהַֽחֲמִישִׁ֖י שְׁפַטְיָ֥ה בֶן־אֲבִיטָֽל׃
10O	3	5		80890	וְהַשִּׁשִּׁ֣י יִתְרְעָ֔ם לְעֶגְלָ֖ה אֵ֣שֶׁת דָּוִ֑ד אֵ֛לֶּה יֻלְּד֥וּ לְדָוִ֖ד בְּחֶבְרֹֽון׃ ײ
10O	3	6		80900	וַיְהִ֗י בִּֽהְיֹות֙ הַמִּלְחָמָ֔ה בֵּ֚ין בֵּ֣ית שָׁא֔וּל וּבֵ֖ין בֵּ֣ית דָּוִ֑ד וְאַבְנֵ֛ר הָיָ֥ה מִתְחַזֵּ֖ק בְּבֵ֥ית שָׁאֽוּל׃
10O	3	7		80910	וּלְשָׁא֣וּל פִּלֶ֔גֶשׁ וּשְׁמָ֖הּ רִצְפָּ֣ה בַת־אַיָּ֑ה וַיֹּ֨אמֶר֨ אֶל־אַבְנֵ֔ר מַדּ֥וּעַ בָּ֖אתָה אֶל־פִּילֶ֥גֶשׁ אָבִֽי׃
10O	3	8		80920	וַיִּחַר֩ לְאַבְ֙נֵר מְאֹ֜ד עַל־דִּבְרֵ֣י אִֽישׁ־בּ֗שֶׁת וַיֹּ֨אמֶר֨ הֲרֹ֨אשׁ כֶּ֣לֶב אָ֯נֹכִי֮ אֲשֶׁ֣ר לִֽיהוּדָה֒ הַ֙יֹּום אֶֽעֱשֶׂה־חֶ֜סֶד עִם־בֵּ֣ית ׀ שָׁא֣וּל אָבִ֗יךָ אֶל־אֶחָיו֨ וְאֶל־מֵ֣רֵעֵ֔הוּ וְלֹ֥א הִמְצִיתִ֖ךָ בְּיַ֣ד דָּוִ֑ד וַתִּפְקֹ֥ד עָלַ֛י עֲֺו֥ן הָֽאִשָּׁ֖ה הַיֹּֽום׃
10O	3	9		80930	כֹּה־יַֽעֲשֶׂ֤ה אֱלֹהִים֨ לְאַבְנֵ֔ר וְכֹ֖ה יֹסִ֣יף לֹ֑ו כִּ֗י כַּֽאֲשֶׁ֨ר נִשְׁבַּ֤ע יְהֺוָה֙ לְדָוִ֔ד כִּי־כֵ֖ן אֶֽעֱשֶׂה־לֹּֽו׃
10O	3	10		80940	לְהַֽעֲבִ֥יר הַמַּמְלָכָ֖ה מִבֵּ֣ית שָׁא֑וּל וּלְהָקִ֞ים אֶת־כִּסֵּ֣א דָוִ֗ד עַל־יִשְׂרָאֵל֨ וְעַל־יְהוּדָ֔ה מִדָּ֖ן וְעַד־בְּאֵ֥ר שָֽׁבַע׃
10O	3	11		80950	וְלֹֽא־יָכֹ֣ל עֹ֔וד לְהָשִׁ֥יב אֶת־אַבְנֵ֖ר דָּבָ֑ר מִיִּרְאָתֹ֖ו אֹתֹֽו׃ ױ
10O	3	12		80960	וַיִּשְׁלַח֩ אַבְנֵ֨ר מַלְאָכִ֧ים ׀ אֶל־דָּוִ֛ד תַּחְתָּ֥ו֯ לֵאמֹ֖ר לְמִי־אָ֑רֶץ לֵאמֹ֗ר כָּרְתָ֤ה בְרִֽיתְךָ֙ אִתִּ֔י וְהִנֵּה֙ יָדִ֣י עִמָּ֔ךְ לְהָסֵ֥ב אֵלֶ֖יךָ אֶת־כָּל־יִשְׂרָאֵֽל׃
10O	3	13		80970	וַיֹּ֣אמֶר טֹ֔וב אֲנִ֕י אֶכְרֹ֥ת אִתְּךָ֖ בְּרִ֑ית אַ֣ךְ דָּבָ֣ר אֶחָ֡ד אָנֹכִי֩ שֹׁאֵ֨ל מֵֽאִתְּךָ֤ לֵאמֹר֨ לֹֽא־תִרְאֶ֣ה אֶת־פָּנַ֔י כִּ֣י ׀ אִם־לִפְנֵ֣י הֱבִֽיאֲךָ֗ אֵ֚ת מִיכַ֣ל בַּת־שָׁא֔וּל בְּבֹֽואֲךָ֖ לִרְאֹ֥ות אֶת־פָּנָֽי׃ ױ
10O	3	14		80980	וַיִּשְׁלַ֤ח דָּוִד֨ מַלְאָכִ֔ים אֶל־אִֽישׁ־בּ֥שֶׁת בֶּן־שָׁא֖וּל לֵאמֹ֑ר תְּנָ֤ה אֶת־אִשְׁתִּי֙ אֶת־מִיכַ֔ל אֲשֶׁר֨ אֵרַ֣שְׂתִּי לִ֔י בְּמֵאָ֖ה עָרְלֹ֥ות פְּלִשְׁתִּֽים׃
10O	3	15		80990	וַיִּשְׁלַח֨ אִ֣ישׁ בֹּ֔שֶׁת וַיִּקָּחֶ֖הָ מֵעִ֣ם אִ֑ישׁ מֵעִ֖ם פַּלְטִיאֵ֥ל בֶּן־לָֽוִ֯שׁ׃
10O	3	16		81000	וַיֵּ֨לֶךְ אִתָּ֜הּ אִישָׁ֗הּ הָלֹ֧וךְ וּבָכֹ֛ה אַֽחֲרֶ֖יהָ עַד־בַּֽחֻרִ֑ים וַיֹּ֨אמֶר אֵלָ֥יו אַבְנֵ֛ר לֵ֥ךְ שׁ֖וּב וַיָּשֹֽׁב׃ ױ
10O	3	17		81010	וּדְבַר־אַבְנֵ֣ר הָיָ֔ה עִם־זִקְנֵ֥י יִשְׂרָאֵ֖ל לֵאמֹ֑ר גַּם־תְּמֹול֨ גַּם־שִׁלְשֹׁ֔ם הֱיִיתֶ֞ם מְבַקְשִׁ֧ים אֶת־דָּוִ֛ד לְמֶ֖לֶךְ עֲלֵיכֶֽם׃
10O	3	18		81020	וְעַתָּ֖ה עֲשׂ֑וּ כִּ֣י יְהֺוָ֗ה אָמַ֤ר אֶל־דָּוִד֙ לֵאמֹ֔ר בְּיַ֣ד ׀ דָּוִ֣ד עַבְדִּ֗י הֹושִׁ֜יעַ אֶת־עַמִּ֤י יִשְׂרָאֵל֨ מִיַּ֣ד פְּלִשְׁתִּ֔ים וּמִיַּ֖ד כָּל־אֹֽיְבֵיהֶֽם׃
10O	3	19		81030	וַיְדַבֵּ֥ר גַּם־אַבְנֵ֖ר בְּאָזְנֵ֣י בִנְיָמִ֑ין וַיֵּ֣לֶךְ גַּם־אַבְנֵ֗ר לְדַבֵּ֞ר בְּאָזְנֵ֤י דָוִד֙ בְּחֶבְרֹ֔ון אֵ֤ת כָּל־אֲשֶׁר־טֹוב֙ בְּעֵינֵ֣י יִשְׂרָאֵ֔ל וּבְעֵינֵ֖י כָּל־בֵּ֥ית בִּנְיָמִֽן׃
10O	3	20		81040	וַיָּבֹ֨א אַבְנֵ֤ר אֶל־דָּוִד֨ חֶבְרֹ֔ון וְאִתֹּ֖ו עֶשְׂרִ֣ים אֲנָשִׁ֑ים וַיַּ֨עַשׂ דָּוִ֧ד לְאַבְנֵ֛ר וְלַֽאֲנָשִׁ֥ים אֲשֶׁר־אִתֹּ֖ו מִשְׁתֶּֽה׃
10O	3	21		81050	וַיֹּ֣אמֶר אַבְנֵ֣ר אֶל־דָּוִ֡ד אָק֣וּמָה ׀ וְֽאֵלֵ֡כָה וְאֶקְבְּצָה֩ אֶל־אֲדֹנִ֨י הַמֶּ֜לֶךְ אֶת־כָּל־יִשְׂרָאֵ֗ל וְיִכְרְת֤וּ אִתְּךָ֙ בְּרִ֔ית וּמָ֣לַכְתָּ֔ בְּכֹ֖ל אֲשֶׁר־תְּאַוֶּ֣ה נַפְשֶׁ֑ךָ וַיְּשַׁלַּ֥ח דָּוִ֛ד אֶת־אַבְנֵ֖ר וַיֵּ֥לֶךְ בְּשָׁלֹֽום׃
10O	3	22		81060	וְהִנֵּה֩ עַבְדֵ֨י דָוִ֤ד וְיֹואָב֨ בָּ֣א מֵֽהַגְּד֔וּד וְשָׁלָ֥ל רָ֖ב עִמָּ֣ם הֵבִ֑יאוּ וְאַבְנֵ֗ר אֵינֶ֤נּוּ עִם־דָּוִד֨ בְּחֶבְרֹ֔ון כִּ֥י שִׁלְּחֹ֖ו וַיֵּ֥לֶךְ בְּשָׁלֹֽום׃
10O	3	23		81070	וְיֹואָ֛ב וְכָל־הַצָּבָ֥א אֲשֶׁר־אִתֹּ֖ו בָּ֑אוּ וַיַּגִּ֤דוּ לְיֹואָב֨ לֵאמֹ֔ר בָּֽא־אַבְנֵ֤ר בֶּן־נֵר֙ אֶל־הַמֶּ֔לֶךְ וַֽיְשַׁלְּחֵ֖הוּ וַיֵּ֥לֶךְ בְּשָׁלֹֽום׃
10O	3	24		81080	וַיָּבֹ֤א יֹואָב֨ אֶל־הַמֶּ֔לֶךְ וַיֹּ֖אמֶר מֶ֣ה עָשִׂ֑יתָה הִנֵּה־בָ֤א אַבְנֵר֨ אֵלֶ֔יךָ לָֽמָּה־זֶּ֥ה שִׁלַּחְתֹּ֖ו וַיֵּ֥לֶךְ הָלֹֽוךְ׃
10O	3	25		81090	יָדַ֨עְתָּ֨ אֶת־אַבְנֵ֣ר בֶּן־נֵ֔ר כִּ֥י לְפַתֹּֽתְךָ֖ בָּ֑א וְלָדַ֜עַת אֶת־מֹוצָֽאֲךָ֨ וְאֶת־מֹ֣בָ֯ואֶ֔ךָ וְלָדַ֕עַת אֵ֛ת כָּל־אֲשֶׁ֥ר אַתָּ֖ה עֹשֶֽׂה׃
10O	3	26		81100	וַיֵּצֵ֤א יֹואָב֙ מֵעִ֣ם דָּוִ֔ד וַיִּשְׁלַ֤ח מַלְאָכִים֨ אַֽחֲרֵ֣י אַבְנֵ֔ר וַיָּשִׁ֥בוּ אֹתֹ֖ו מִבֹּ֣ור הַסִּרָ֑ה וְדָוִ֖ד לֹ֥א יָדָֽע׃
10O	3	27		81110	וַיָּ֤שָׁב אַבְנֵר֨ חֶבְרֹ֔ון וַיַּטֵּ֤הוּ יֹואָב֙ אֶל־תֹּ֣וךְ הַשַּׁ֔עַר לְדַּבֵּ֥ר אִתֹּ֖ו בַּשֶּׁ֑לִי וַיַּכֵּ֤הוּ שָׁם֙ הַחֹ֔מֶשׁ וַיָּ֕מָת בְּדַ֖ם עֲשָׂהאֵ֥ל אָחִֽיו׃
10O	3	28		81120	וַיִּשְׁמַ֤ע דָּוִד֙ מֵאַ֣חֲרֵי כֵ֔ן וַיֹּ֕אמֶר נָקִ֨י אָֽנֹכִ֧י וּמַמְלַכְתִּ֛י מֵעִ֥ם יְהֺוָ֖ה עַד־עֹולָ֑ם מִדְּמֵ֖י אַבְנֵ֥ר בֶּן־נֵֽר׃
10O	3	29		81130	יָחֻ֨לוּ֨ עַל־רֹ֣אשׁ יֹואָ֔ב וְאֶ֖ל כָּל־בֵּ֣ית אָבִ֑יו וְאַל־יִכָּרֵ֣ת מִבֵּ֣ית יֹואָ֡ב זָ֠ב וּמְצֹרָ֞ע וּמַֽחֲזִ֥יק בַּפֶּ֛לֶךְ וְנֹפֵ֥ל בַּחֶ֖רֶב וַֽחֲסַר־לָֽחֶם׃
10O	3	30		81140	וְיֹואָב֨ וַֽאֲבִישַׁ֣י אָחִ֔יו הָֽרְג֖וּ לְאַבְנֵ֑ר עַל֩ אֲשֶׁ֨ר הֵמִ֜ית אֶת־עֲשָׂהאֵ֧ל אֲחִיהֶ֛ם בְּגִבְעֹ֖ון בַּמִּלְחָמָֽה׃
10O	3	31		81150	וַיֹּאמֶר֩ דָּוִ֨ד אֶל־יֹואָ֜ב וְאֶל־כָּל־הָעָ֣ם אֲשֶׁר־אִתֹּ֗ו קִרְע֤וּ בִגְדֵיכֶם֙ וְחִגְר֣וּ שַׂקִּ֔ים וְסִפְד֖וּ לִפְנֵ֣י אַבְנֵ֑ר וְהַמֶּ֣לֶךְ דָּוִ֔ד הֹלֵ֖ךְ אַֽחֲרֵ֥י הַמִּטָּֽה׃
10O	3	32		81160	וַיִּקְבְּר֥וּ אֶת־אַבְנֵ֖ר בְּחֶבְרֹ֑ון וַיִשָּׂ֧א הַמֶּ֣לֶךְ אֶת־קֹולֹ֗ו וַיֵּ֨בְךְּ֨ אֶל־קֶ֣בֶר אַבְנֵ֔ר וַיִּבְכּ֖וּ כָּל־הָעָֽם׃ ױ
10O	3	33		81170	וַיְקֹנֵ֥ן הַמֶּ֛לֶךְ אֶל־אַבְנֵ֖ר וַיֹּאמַ֑ר הַכְּמֹ֥ות נָבָ֖ל יָמ֥וּת אַבְנֵֽר׃
10O	3	34		81180	יָדֶ֣֯ךָ לֹֽא־אֲסֻרֹ֗ות וְרַגְלֶ֨יךָ֨ לֹֽא־לִנְחֻשְׁתַּ֣יִם הֻ֯גָּ֔שׁוּ כִּנְפֹ֛ול לִפְנֵ֥י בְנֵֽי־עַוְלָ֖ה נָפָ֑לְתָּ וַיֹּסִ֥פוּ כָל־הָעָ֖ם לִבְכֹּ֥ות עָלָֽיו׃
10O	3	35		81190	וַיָּבֹ֣א כָל־הָעָ֗ם לְהַבְרֹ֧ות אֶת־דָּוִ֛ד לֶ֖חֶם בְּעֹ֣וד הַיֹּ֑ום וַיִּשָּׁבַ֨ע דָּוִ֜ד לֵאמֹ֗ר כֹּ֣ה יַֽעֲשֶׂה־לִּ֤י אֱלֹהִים֙ וְכֹ֣ה יֹסִ֔יף כִּ֣י אִם־לִפְנֵ֧י בֹֽוא־הַשֶּׁ֛מֶשׁ אֶטְעַם־לֶ֖חֶם אֹ֥ו כָל־מְאֽוּמָה׃
10O	3	36		81200	וְכָל־הָעָ֣ם הִכִּ֔ירוּ וַיִּיטַ֖ב בְּעֵֽינֵיהֶ֑ם כְּכֹל֨ אֲשֶׁ֣ר עָשָׂ֣ה הַמֶּ֔לֶךְ בְּעֵינֵ֥י כָל־הָעָ֖ם טֹֽוב׃
10O	3	37		81210	וַיֵּֽדְע֧וּ כָל־הָעָ֛ם וְכָל־יִשְׂרָאֵ֖ל בַּיֹּ֣ום הַה֑וּא כִּ֣י לֹ֤א הָֽיְתָה֨ מֵֽהַמֶּ֔לֶךְ לְהָמִ֖ית אֶת־אַבְנֵ֥ר בֶּן־נֵֽר׃ ױ
10O	3	38		81220	וַיֹּ֥אמֶר הַמֶּ֖לֶךְ אֶל־עֲבָדָ֑יו הֲלֹ֣וא תֵֽדְע֔וּ כִּי־שַׂ֣ר וְגָדֹ֗ול נָפַ֛ל הַיֹּ֥ום הַזֶּ֖ה בְּיִשְׂרָאֵֽל׃
10O	3	39		81230	וְאָנֹכִ֨י הַיֹּ֥ום רַךְ֙ וּמָשׁ֣וּחַ מֶ֔לֶךְ וְהָֽאֲנָשִׁ֥ים הָאֵ֛לֶּה בְּנֵ֥י צְרוּיָ֖ה קָשִׁ֣ים מִמֶּ֑נִּי יְשַׁלֵּ֧ם יְהֺוָ֛ה לְעֹשֵׂ֥ה הָֽרָעָ֖ה כְּרָֽעָתֹֽו׃ ײ
10O	4	1		81240	וַיִּשְׁמַ֣ע בֶּן־שָׁא֗וּל כִּ֣י מֵ֤ת אַבְנֵר֙ בְּחֶבְרֹ֔ון וַיִּרְפּ֖וּ יָדָ֑יו וְכָל־יִשְׂרָאֵ֖ל נִבְהָֽלוּ׃
10O	4	2		81250	וּשְׁנֵ֣י אֲנָשִׁ֣ים שָׂרֵֽי־גְדוּדִ֣ים הָי֪וּ בֶן־שָׁא֟וּל שֵׁם֩ הָֽאֶחָ֨ד בַּֽעֲנָ֜ה וְשֵׁ֧ם הַשֵּׁנִ֣י רֵכָ֗ב בְּנֵ֛י רִמֹּ֥ון הַבְּאֶֽרֹתִ֖י מִבְּנֵ֣י בִנְיָמִ֑ן כִּ֚י גַּם־בְּאֵרֹ֔ות תֵּֽחָשֵׁ֖ב עַל־בִּנְיָמִֽן׃
10O	4	3		81260	וַיִּבְרְח֥וּ הַבְּאֵֽרֹתִ֖ים גִּתָּ֑יְמָה וַיִּֽהְיוּ־שָׁ֣ם גָּרִ֔ים עַ֖ד הַיֹּ֥ום הַזֶּֽה׃ ײ
10O	4	4		81270	וְלִיהֹֽונָתָן֙ בֶּן־שָׁא֔וּל בֵּ֖ן נְכֵ֣ה רַגְלָ֑יִם בֶּן־חָמֵ֣שׁ שָׁנִ֣ים הָיָ֡ה בְּבֹ֣א שְׁמֻעַת֩ שָׁא֨וּל וִיהֹֽונָתָ֜ן מִיִּזְרְעֶ֗אל וַתִּשָּׂאֵ֤הוּ אֹֽמַנְתֹּו֙ וַתָּנֹ֔ס וַיְהִ֞י בְּחָפְזָ֥הּ לָנ֛וּס וַיִּפֹּ֥ל וַיִּפָּסֵ֖חַ וּשְׁמֹ֥ו מְפִיבֽשֶׁת׃
10O	4	5		81280	וַיֵּ֨לְכ֜וּ בְּנֵֽי־רִמֹּ֤ון הַבְּאֵֽרֹתִי֨ רֵכָ֣ב וּבַֽעֲנָ֔ה וַיָּבֹ֨אוּ֨ כְּחֹ֣ם הַיֹּ֔ום אֶל־בֵּ֖ית אִ֣ישׁ בּ֑שֶׁת וְה֣וּא שֹׁכֵ֔ב אֵ֖ת מִשְׁכַּ֥ב הַצָּֽהֳרָֽיִם׃
10O	4	6		81290	וְ֠הֵנָּה בָּ֜אוּ עַד־תֹּ֤וךְ הַבַּ֨יִת֨ לֹֽקְחֵ֣י חִטִּ֔ים וַיַּכֻּ֖הוּ אֶל־הַחֹ֑מֶשׁ וְרֵכָ֛ב וּבַֽעֲנָ֥ה אָחִ֖יו נִמְלָֽטוּ׃
10O	4	7		81300	וַיָּבֹ֣אוּ הַבַּ֗יִת וְהֽוּא־שֹׁכֵ֤ב עַל־מִטָּתֹו֨ בַּֽחֲדַ֣ר מִשְׁכָּבֹ֔ו וַיַּכֻּ֨הוּ֙ וַיְמִתֻ֔הוּ וַיָּסִ֖ירוּ אֶת־רֹאשֹׁ֑ו וַיִּקְחוּ֙ אֶת־רֹאשֹׁ֔ו וַיֵּֽלְכ֛וּ דֶּ֥רֶךְ הָֽעֲרָבָ֖ה כָּל־הַלָּֽיְלָה׃
10O	4	8		81310	וַ֠יָּבִאוּ אֶת־רֹ֨אשׁ אִֽישׁ־בּ֥שֶׁת אֶל־דָּוִד֮ חֶבְרֹון֒ וַיֹּֽאמְר֙וּ אֶל־הַמֶּ֔לֶךְ הִנֵּה־רֹ֣אשׁ אִֽישׁ־בּ֗שֶׁת בֶּן־שָׁאוּל֨ אֹֽיִבְךָ֔ אֲשֶׁ֥ר בִּקֵּ֖שׁ אֶת־נַפְשֶׁ֑ךָ וַיִּתֵּ֣ן יְ֠הֺוָה לַֽאדֹנִ֨י הַמֶּ֤לֶךְ נְקָמֹות֙ הַיֹּ֣ום הַזֶּ֔ה מִשָּׁא֖וּל וּמִזַּרְעֹֽו׃ 
10O	4	9		81320	וַיַּ֨עַן דָּוִ֜ד אֶת־רֵכָ֣ב ׀ וְאֶת־בַּֽעֲנָ֣ה אָחִ֗יו בְּנֵ֛י רִמֹּ֥ון הַבְּאֵֽרֹתִ֖י וַיֹּ֣אמֶר לָהֶ֑ם חַי־יְהֺוָ֕ה אֲשֶׁר־פָּדָ֥ה אֶת־נַפְשִׁ֖י מִכָּל־צָרָֽה׃
10O	4	10		81330	כִּ֣י הַמַּגִּיד֩ לִ֨י לֵאמֹ֜ר הִנֵּה־מֵ֣ת שָׁא֗וּל וְהֽוּא־הָיָ֤ה כִמְבַשֵּׂר֨ בְּעֵינָ֔יו וָאֹֽחֲזָ֣ה בֹ֔ו וָֽאֶהְרְגֵ֖הוּ בְּצִקְלָ֑ג אֲשֶׁ֥ר לְתִתִּי־לֹ֖ו בְּשׂרָֽה׃
10O	4	11		81340	אַ֞ף כִּֽי־אֲנָשִׁ֣ים רְשָׁעִ֗ים הָֽרְג֧וּ אֶת־אִֽישׁ־צַדִּ֛יק בְּבֵיתֹ֖ו עַל־מִשְׁכָּבֹ֑ו וְעַתָּ֗ה הֲלֹ֨וא אֲבַקֵּ֤שׁ אֶת־דָּמֹו֙ מִיֶּדְכֶ֔ם וּבִֽעַרְתִּ֥י אֶתְכֶ֖ם מִן־הָאָֽרֶץ׃
10O	4	12		81350	וַיְצַו֩ דָּוִ֨ד אֶת־הַנְּעָרִ֜ים וַיַּֽהַרְגּ֗וּם וַיְקַצְּצ֤וּ אֶת־יְדֵיהֶם֨ וְאֶת־רַגְלֵיהֶ֔ם וַיִּתְל֥וּ עַל־הַבְּרֵכָ֖ה בְּחֶבְרֹ֑ון וְאֵ֨ת רֹ֤אשׁ אִֽישׁ־בֹּ֙שֶׁת֙ לָקָ֔֯חוּ וַיִּקְבְּר֥וּ בְקֶֽבֶר־אַבְנֵ֖ר בְּחֶבְרֹֽון׃ ײ
10O	5	1		81360	וַיָּבֹ֜אוּ כָּל־שִׁבְטֵ֧י יִשְׂרָאֵ֛ל אֶל־דָּוִ֖ד חֶבְרֹ֑ונָה וַיֹּֽאמְר֣וּ לֵאמֹ֔ר הִֽנְנ֛וּ עַצְמְךָ֥ וּבְשָֽׂרְךָ֖ אֲנָֽחְנוּ׃
10O	5	2		81370	גַּם־אֶתְמֹ֣ול גַּם־שִׁלְשֹׁ֗ום בִּֽהְיֹ֨ות שָׁא֥וּל מֶ֨לֶךְ֨ עָלֵ֔ינוּ אַתָּ֗ה הָיִיתָה ַ֯מֹּוצִ֥יא וְהַמֵּבִ֖י֯ אֶת־יִשְׂרָאֵ֑ל ױ֯ וַ֙יֹּאמֶר יְהֺוָ֜ה לְךָ֗ אַתָּה֨ תִרְעֶ֤ה אֶת־עַמִּי֨ אֶת־יִשְׂרָאֵ֔ל וְאַתָּ֛ה תִּֽהְיֶ֥ה לְנָגִ֖יד עַל־יִשְׂרָאֵֽל׃
10O	5	3		81380	וַ֠יָּבֹאוּ כָּל־זִקְנֵ֨י יִשְׂרָאֵ֤ל אֶל־הַמֶּ֨לֶךְ֨ חֶבְרֹ֔ונָה וַיִּכְרֹ֣ת לָהֶם֩ הַמֶּ֨לֶךְ דָּוִ֥ד בְּרִ֛ית בְּחֶבְרֹ֖ון לִפְנֵ֣י יְהֺוָ֑ה וַיִּמְשְׁח֧וּ אֶת־דָּוִ֛ד לְמֶ֖לֶךְ עַל־יִשְׂרָאֵֽל׃ ױ
10O	5	4		81390	בֶּן־שְׁלשִׁ֥ים שָׁנָ֛ה דָּוִ֖ד בְּמָלְכֹ֑ו אַרְבָּעִ֥ים שָׁנָ֖ה מָלָֽךְ׃
10O	5	5		81400	בְּחֶבְרֹון֙ מָלַ֣ךְ עַל־יְהוּדָ֔ה שֶׁ֥בַע שָׁנִ֖ים וְשִׁשָּׁ֣ה חֳדָשִׁ֑ים וּבִירֽוּשָׁלִַ֣ם מָלַ֗ךְ שְׁלשִׁ֤ים וְשָׁלשׁ֙ שָׁנָ֔ה עַ֥ל כָּל־יִשְׂרָאֵ֖ל וִֽיהוּדָֽה׃
10O	5	6		81410	וַיֵּ֨לֶךְ הַמֶּ֤לֶךְ וַֽאֲנָשָׁיו֙ יְר֣וּשָׁלִַ֔ם אֶל־הַיְבֻסִ֖י יֹושֵׁ֣ב הָאָ֑רֶץ וַיֹּ֨אמֶר לְדָוִ֤ד לֵאמֹר֙ לֹֽא־תָבֹ֣וא הֵ֔נָּה כִּ֣י אִם־הֱסִֽירְךָ֗ הַֽעִוְרִ֤ים וְהַפִּסְחִים֨ לֵאמֹ֔ר לֹֽא־יָבֹ֥וא דָוִ֖ד הֵֽנָּה׃
10O	5	7		81420	וַיִּלְכֹּ֣ד דָּוִ֔ד אֵ֖ת מְצֻדַ֣ת צִיֹּ֑ון הִ֖יא עִ֥יר דָּוִֽד׃
10O	5	8		81430	וַ֙יֹּאמֶר דָּוִ֜ד בַּיֹּ֣ום הַה֗וּא כָּל־מַכֵּ֤ה יְבוּסִ֙י וְיִגַּ֣ע בַּצִּנֹּ֔ור וְאֶת־הַפִּסְחִים֙ וְאֶת־הַ֣עִוְרִ֔ים שְׂנֻאֵ֖ו֯ נֶ֣פֶשׁ דָּוִ֑ד עַל־כֵּן֙ יֹ֣אמְר֔וּ עִוֵּ֣ר וּפִסֵּ֔חַ לֹ֥א יָבֹ֖וא אֶל־הַבָּֽיִת׃
10O	5	9		81440	וַיֵּ֤שֶׁב דָּוִד֨ בַּמְּצֻדָ֔ה וַיִּקְרָא־לָ֖הּ עִ֣יר דָּוִ֑ד וַיִּ֤בֶן דָּוִד֙ סָבִ֔יב מִן־הַמִּלֹּ֖וא וָבָֽיְתָה׃
10O	5	10		81450	וַיֵּ֥לֶךְ דָּוִ֖ד הָלֹ֣וךְ וְגָדֹ֑ול וַֽיהֺוָ֛ה אֱלֹהֵ֥י צְבָאֹ֖ות עִמֹּֽו׃ ײ
10O	5	11		81460	וַיִּשְׁלַח֩ חִירָ֨ם מֶֽלֶךְ־צֹ֥ר מַלְאָכִים֮ אֶל־דָּוִד֒ וַֽעֲצֵ֣י אֲרָזִ֔ים וְחָֽרָשֵׁ֣י עֵ֔ץ וְחָֽרָשֵׁ֖י אֶ֣בֶן קִ֑יר וַיִּבְנוּ־בַ֖יִת לְדָוִֽד׃
10O	5	12		81470	וַיֵּ֣דַע דָּוִ֔ד כִּֽי־הֱכִינֹ֧ו יְהֺוָ֛ה לְמֶ֖לֶךְ עַל־יִשְׂרָאֵ֑ל וְכִי֙ נִשֵּׂ֣א מַמְלַכְתֹּ֔ו בַּעֲב֖וּר עַמֹּ֥ו יִשְׂרָאֵֽל׃ ױ
10O	5	13		81480	וַיִּקַּח֩ דָּוִ֨ד עֹ֜וד פִּֽלַגְשִׁ֤ים וְנָשִׁים֙ מִיר֣וּשָׁלִַ֔ם אַֽחֲרֵ֖י בֹּאֹ֣ו מֵֽחֶבְרֹ֑ון וַיִּוָּ֥לְדוּ עֹ֛וד לְדָוִ֖ד בָּנִ֥ים וּבָנֹֽות׃
10O	5	14		81490	וְאֵ֗לֶּה שְׁמֹ֛ות הַיִּלֹּדִ֥ים לֹ֖ו בִּירֽוּשָׁלִָ֑ם שַׁמּ֣וּעַ וְשֹׁובָ֔ב וְנָתָ֖ן וּשְׁלֹמֹֽה׃
10O	5	15		81500	וְיִבְחָ֥ר וֶֽאֱלִישׁ֖וּעַ וְנֶ֥פֶג וְיָפִֽיעַ׃
10O	5	16		81510	וֶֽאֱלִֽישָׁמָ֥ע וְאֶלְיָדָ֖ע וֶֽאֱלִיפָֽלֶט׃ ױ
10O	5	17		81520	וַיִּשְׁמְע֣וּ פְלִשְׁתִּ֗ים כִּי־מָֽשְׁחוּ֨ אֶת־דָּוִ֤ד לְמֶ֙לֶךְ֨ עַל־יִשְׂרָאֵ֔ל וַיַּֽעֲל֥וּ כָל־פְּלִשְׁתִּ֖ים לְבַקֵּ֣שׁ אֶת־דָּוִ֑ד וַיִּשְׁמַ֣ע דָּוִ֔ד וַיֵּ֖רֶד אֶל־הַמְּצוּדָֽה׃
10O	5	18		81530	וּפְלִשְׁתִּ֖ים בָּ֑אוּ וַיִּנָּֽטְשׁ֖וּ בְּעֵ֥מֶק רְפָאִֽים׃
10O	5	19		81540	וַיִּשְׁאַ֨ל דָּוִ֤ד בַּֽיהֺוָה֙ לֵאמֹ֔ר הַאֶֽעֱלֶה֙ אֶל־פְּלִשְׁתִּ֔ים הֲתִתְּנֵ֖ם בְּיָדִ֑י ױ֯ וַיֹּ֨אמֶר יְהֺוָ֤ה אֶל־דָּוִד֨ עֲלֵ֔ה כִּֽי־נָתֹ֥ן אֶתֵּ֛ן אֶת־הַפְּלִשְׁתִּ֖ים בְּיָדֶֽךָ׃
10O	5	20		81550	וַיָּבֹ֨א דָוִ֥ד בְּבַֽעַל־פְּרָצִים֮ וַיַּכֵּ֣ם שָׁ֣ם דָּוִד֒ וַיֹּ֕אמֶר פָּרַ֨ץ יְהֺוָ֧ה אֶת־אֹֽיְבַ֛י לְפָנַ֖י כְּפֶ֣רֶץ מָ֑יִם עַל־כֵּ֗ן קָרָ֛א שֵֽׁם־הַמָּקֹ֥ום הַה֖וּא בַּ֥עַל פְּרָצִֽים׃
10O	5	21		81560	וַיַּֽעַזְבוּ־שָׁ֖ם אֶת־עֲצַבֵּיהֶ֑ם וַיִּשָּׂאֵ֥ם דָּוִ֖ד וַֽאֲנָשָֽׁיו׃ ױ
10O	5	22		81570	וַיֹּסִ֥פוּ עֹ֛וד פְּלִשְׁתִּ֖ים לַֽעֲלֹ֑ות וַיִּנָּֽטְשׁ֖וּ בְּעֵ֥מֶק רְפָאִֽים׃
10O	5	23		81580	וַיִּשְׁאַ֤ל דָּוִד֨ בַּֽיהֺוָ֔ה וַיֹּ֖אמֶר לֹ֣א תַֽעֲלֶ֑ה הָסֵב֨ אֶל־אַ֣חֲרֵיהֶ֔ם וּבָ֥אתָ לָהֶ֖ם מִמּ֥וּל בְּכָאִֽים׃
10O	5	24		81590	וִ֠יהִי בְּֽ֯שָׁמְעֲךָ֞ אֶת־קֹ֧ול צְעָדָ֛ה בְּרָאשֵׁ֥י הַבְּכָאִ֖ים אָ֣ז תֶּֽחֱרָ֑ץ כִּ֣י אָ֗ז יָצָ֤א יְהֺוָה֙ לְפָנֶ֔יךָ לְהַכֹּ֖ות בְּמַֽחֲנֵ֥ה פְלִשְׁתִּֽים׃
10O	5	25		81600	וַיַּ֤עַשׂ דָּוִד֨ כֵּ֔ן כַּֽאֲשֶׁ֥ר צִוָּ֖הוּ יְהֺוָ֑ה וַיַּךְ֨ אֶת־פְּלִשְׁתִּ֔ים מִגֶּ֖בַע עַד־בֹּֽאֲךָ֥ גָֽזֶר׃ ײ
10O	6	1		81610	֯וַיֹּ֨סֶף עֹ֥וד דָּוִ֛ד אֶת־כָּל־בָּח֥וּר בְּיִשְׂרָאֵ֖ל שְׁלשִׁ֥ים אָֽלֶף׃
10O	6	2		81620	וַיָּ֣קָם ׀ וַיֵּ֣לֶךְ דָּוִ֗ד וְכָל־הָעָם֨ אֲשֶׁ֣ר אִתֹּ֔ו מִבַּֽעֲלֵ֖י יְהוּדָ֑ה לְהַֽעֲלֹ֣ות מִשָּׁ֗ם אֵ֚ת אֲרֹ֣ון הָֽאֱלֹהִ֔ים אֲשֶׁר־נִקְרָ֣א שֵׁ֗ם שֵׁ֣ם יְהֺוָ֧ה צְבָאֹ֛ות ישֵׁ֥ב הַכְּרֻבִ֖ים עָלָֽיו׃
10O	6	3		81630	וַיַּרְכִּ֜בוּ אֶת־אֲרֹ֤ון הָֽאֱלֹהִים֨ אֶל־עֲגָלָ֣ה חֲדָשָׁ֔ה וַ֙יִּשָּׂאֻ֔הוּ מִבֵּ֥ית אֲבִֽינָדָ֖ב אֲשֶׁ֣ר בַּגִּבְעָ֑ה וְעֻזָּ֣א וְאַחְיֹ֗ו בְּנֵי֙ אֲבִֽינָדָ֔ב נֹֽהֲגִ֖ים אֶת־הָֽעֲגָלָ֥ה חֲדָשָֽׁה׃
10O	6	4		81640	וַיִּשָּׂאֻ֗הוּ מִבֵּ֤ית אֲבִֽינָדָב֨ אֲשֶׁ֣ר בַּגִּבְעָ֔ה עִ֖ם אֲרֹ֣ון הָֽאֱלֹהִ֑ים וְאַחְיֹ֕ו הֹלֵ֖ךְ לִפְנֵ֥י הָֽאָרֹֽון׃
10O	6	5		81650	וְדָוִ֣ד ׀ וְכָל־בֵּ֣ית יִשְׂרָאֵ֗ל מְשַֽׂחֲקִים֙ לִפְנֵ֣י יְהֺוָ֔ה בְּכֹ֖ל עֲצֵ֣י בְרֹושִׁ֑ים וּבְכִנֹּרֹ֤ות וּבִנְבָלִים֙ וּבְתֻפִּ֔ים וּבִמְנַֽעַנְעִ֖ים וּבְצֶלְצֶלִֽים׃
10O	6	6		81660	וַיָּבֹ֖אוּ עַד־גֹּ֣רֶן נָכֹ֑ון וַיִּשְׁלַ֨ח עֻזָּ֜א אֶל־אֲרֹ֤ון הָֽאֱלֹהִים֙ וַיֹּ֣אחֶז בֹּ֔ו כִּ֥י שָֽׁמְט֖וּ הַבָּקָֽר׃
10O	6	7		81670	וַיִּֽחַר־אַ֤ף יְהֺוָה֨ בְּעֻזָּ֔ה וַיַּכֵּ֥הוּ שָׁ֛ם הָֽאֱלֹהִ֖ים עַל־הַשַּׁ֑֯ל וַיָּ֣מָת שָׁ֔ם עִ֖ם אֲרֹ֥ון הָֽאֱלֹהִֽים׃
10O	6	8		81680	וַיִּ֣חַר לְדָוִ֔ד עַל֩ אֲשֶׁ֨ר פָּרַ֧ץ יְהֺוָ֛ה פֶּ֖רֶץ בְּעֻזָּ֑ה וַיִּקְרָ֞א לַמָּקֹ֤ום הַהוּא֙ פֶּ֣רֶץ עֻזָּ֔ה עַ֖ד הַיֹּ֥ום הַזֶּֽה׃
10O	6	9		81690	וַיִּרָ֥א דָוִ֛ד אֶת־יְהֺוָ֖ה בַּיֹּ֣ום הַה֑וּא וַיֹּ֕אמֶר אֵ֛יךְ יָבֹ֥וא אֵלַ֖י אֲרֹ֥ון יְהֺוָֽה׃
10O	6	10		81700	וְלֹֽא־אָבָ֣ה דָוִ֗ד לְהָסִ֥יר אֵלָ֛יו אֶת־אֲרֹ֥ון יְהֺוָ֖ה עַל־עִ֣יר דָּוִ֑ד וַיַּטֵּ֣הוּ דָוִ֔ד בֵּ֥ית עֹבֵֽד־אֱדֹ֖ם הַגִּתִּֽי׃
10O	6	11		81710	וַיֵּשֶׁב֩ אֲרֹ֨ון יְהֺוָ֜ה בֵּ֣ית עֹבֵ֥ד אֱדֹ֛ם הַגִּתִּ֖י שְׁלשָׁ֣ה חֳדָשִׁ֑ים וַיְבָ֧רֶךְ יְהֺוָ֛ה אֶת־עֹבֵ֥ד אֱדֹ֖ם וְאֶת־כָּל־בֵּיתֹֽו׃
10O	6	12		81720	וַיֻּגַּ֞ד לַמֶּ֣לֶךְ דָּוִד֮ לֵאמֹר֒ בֵּרַ֣ךְ יְהֺוָ֗ה אֶת־בֵּ֨ית עֹבֵ֤ד אֱדֹם֙ וְאֶת־כָּל־אֲשֶׁר־לֹ֔ו בַּֽעֲב֖וּר אֲרֹ֣ון הָֽאֱלֹהִ֑ים וַיֵּ֣לֶךְ דָּוִ֗ד וַיַּעַל֩ אֶת־אֲרֹ֨ון הָֽאֱלֹהִ֜ים מִבֵּ֨ית עֹבֵ֥ד אֱדֹ֛ם עִ֥יר דָּוִ֖ד בְּשִׂמְחָֽה׃
10O	6	13		81730	וַיְהִ֗י כִּ֧י צָֽעֲד֛וּ נֹֽשְׂאֵ֥י אֲרֹֽון־יְהֺוָ֖ה שִׁשָּׁ֣ה צְעָדִ֑ים וַיִּזְבַּ֖ח שֹׁ֥ור וּמְרִֽיא׃
10O	6	14		81740	וְדָוִ֛ד מְכַרְכֵּ֥ר בְּכָל־עֹ֖ז לִפְנֵ֣י יְהֺוָ֑ה וְדָוִ֕ד חָג֖וּר אֵפֹ֥וד בָּֽד׃
10O	6	15		81750	וְדָוִד֨ וְכָל־בֵּ֣ית יִשְׂרָאֵ֔ל מַֽעֲלִ֖ים אֶת־אֲרֹ֣ון יְהֺוָ֑ה בִּתְרוּעָ֖ה וּבְקֹ֥ול שֹׁופָֽר׃
10O	6	16		81760	וְהָיָה֙ אֲרֹ֣ון יְהֺוָ֔ה בָּ֖א עִ֣יר דָּוִ֑ד וּמִיכַ֨ל בַּת־שָׁא֜וּל נִשְׁקְפָ֣ה ׀ בְּעַ֣ד הַֽחַלֹּ֗ון וַתֵּ֨רֶא אֶת־הַמֶּ֤לֶךְ דָּוִד֨ מְפַזֵּ֤ז וּמְכַרְכֵּר֨ לִפְנֵ֣י יְהֺוָ֔ה וַתִּ֥בֶז לֹ֖ו בְּלִבָּֽהּ׃
10O	6	17		81770	וַיָּבִ֜אוּ אֶת־אֲרֹ֣ון יְהֺוָ֗ה וַיַּצִּ֤גוּ אֹתֹו֙ בִּמְקֹומֹ֔ו בְּתֹ֣וךְ הָאֹ֔הֶל אֲשֶׁ֥ר נָֽטָה־לֹ֖ו דָּוִ֑ד וַיַּ֨עַל דָּוִ֥ד עֹלֹ֛ות לִפְנֵ֥י יְהֺוָ֖ה וּשְׁלָמִֽים׃
10O	6	18		81780	וַיְכַ֣ל דָּוִ֔ד מֵֽהַֽעֲלֹ֥ות הָֽעֹולָ֖ה וְהַשְּׁלָמִ֑ים וַיְבָ֣רֶךְ אֶת־הָעָ֔ם בְּשֵׁ֖ם יְהֺוָ֥ה צְבָאֹֽות׃
10O	6	19		81790	וַיְחַלֵּ֨ק לְכָל־הָעָ֜ם לְכָל־הֲמֹ֣ון יִשְׂרָאֵל֮ לְמֵאִ֣ישׁ וְעַד־אִשָּׁה֒ לְאִ֗ישׁ חַלַּ֥ת לֶ֨חֶם֙ אַחַ֔ת וְאֶשְׁפָּ֣ר אֶחָ֔ד וַֽאֲשִׁישָׁ֖ה אֶחָ֑ת וַיֵּ֥לֶךְ כָּל־הָעָ֖ם אִ֥ישׁ לְבֵיתֹֽו׃֯
10O	6	20		81800	וַיָּ֥שָׁב דָּוִ֖ד לְבָרֵ֣ךְ אֶת־בֵּיתֹ֑ו ױ֯ וַתֵּצֵ֞א מִיכַ֤ל בַּת־שָׁאוּל֨ לִקְרַ֣את דָּוִ֔ד וַתֹּ֗אמֶר מַה־נִּכְבַּ֨ד הַיֹּ֜ום מֶ֣לֶךְ יִשְׂרָאֵ֗ל אֲשֶׁ֨ר נִגְלָ֤ה הַיֹּום֙ לְעֵינֵי֨ אַמְהֹ֣ות עֲבָדָ֔יו כְּהִגָּלֹ֥ות נִגְלֹ֖ות אַחַ֥ד הָֽרֵקִֽים׃
10O	6	21		81810	וַיֹּ֣אמֶר דָּוִד֮ אֶל־מִיכַל֒ לִפְנֵ֣י יְהֺוָ֗ה אֲשֶׁ֨ר בָּֽחַר־בִּ֤י מֵֽאָבִיךְ֙ וּמִכָּל־בֵּיתֹ֔ו לְצַ֙וֺּת אֹתִ֥י נָגִ֛יד עַל־עַ֥ם יְהֺוָ֖ה עַל־יִשְׂרָאֵ֑ל וְשִֽׂחַקְתִּ֖י לִפְנֵ֥י יְהֺוָֽה׃
10O	6	22		81820	וּנְקַלֹּ֤תִי עֹוד֨ מִזֹּ֔את וְהָיִ֥יתִי שָׁפָ֖ל בְּעֵינָ֑י וְעִם־הָֽאֲמָהֹות֙ אֲשֶׁ֣ר אָמַ֔רְתְּ עִמָּ֖ם אִכָּבֵֽדָה׃
10O	6	23		81830	וּלְמִיכַל֨ בַּת־שָׁא֔וּל לֹא־הָ֥יָה לָ֖הּ יָ֑֯לֶד עַ֖ד יֹ֥ום מֹותָֽהּ׃ ײ
10O	7	1		81840	וַיְהִ֕י כִּֽי־יָשַׁ֥ב הַמֶּ֖לֶךְ בְּבֵיתֹ֑ו וַֽיהֺוָ֛ה הֵנִֽיחַ־לֹ֥ו מִסָּבִ֖יב מִכָּל־אֹֽיְבָֽיו׃
10O	7	2		81850	וַיֹּ֤אמֶר הַמֶּ֨לֶךְ֨ אֶל־נָתָ֣ן הַנָּבִ֔יא רְאֵ֣ה נָ֔א אָֽנֹכִ֥י יֹושֵׁ֖ב בְּבֵ֣ית אֲרָזִ֑ים וַֽאֲרֹון֨ הָֽאֱלֹהִ֔ים ישֵׁ֖ב בְּתֹ֥וךְ הַיְרִיעָֽה׃
10O	7	3		81860	וַיֹּ֤אמֶר נָתָן֨ אֶל־הַמֶּ֔לֶךְ כֹּ֛ל אֲשֶׁ֥ר בִּלְבָֽבְךָ֖ לֵ֣ךְ עֲשֵׂ֑ה כִּ֥י יְהֺוָ֖ה עִמָּֽךְ׃ ױ
10O	7	4		81870	וַיְהִ֖י בַּלַּ֣יְלָה הַה֑וּא ױ֯ וַיְהִי֙ דְּבַר־יְהֺוָ֔ה אֶל־נָתָ֖ן לֵאמֹֽר׃
10O	7	5		81880	לֵ֤ךְ וְאָֽמַרְתָּ֨ אֶל־עַבְדִּ֣י אֶל־דָּוִ֔ד כֹּ֖ה אָמַ֣ר יְהֺוָ֑ה הַֽאַתָּ֛ה תִּבְנֶה־לִּ֥י בַ֖יִת לְשִׁבְתִּֽי׃
10O	7	6		81890	כִּ֣י לֹ֤א יָשַׁ֨בְתִּי֙ בְּבַ֔יִת לְ֠מִיֹּום הַֽעֲלֹתִ֞י אֶת־בְּנֵ֤י יִשְׂרָאֵל֨ מִמִּצְרַ֔יִם וְעַ֖ד הַיֹּ֣ום הַזֶּ֑ה וָאֶֽהְיֶה֙ מִתְהַלֵּ֔ךְ בְּאֹ֖הֶל וּבְמִשְׁכָּֽן׃
10O	7	7		81900	בְּכֹ֥ל אֲשֶׁר־הִתְהַלַּכְתִּי֮ בְּכָל־בְּנֵ֣י יִשְׂרָאֵל֒ הֲדָבָ֣ר דִּבַּ֗רְתִּי אֶת־אַחַד֙ שִׁבְטֵ֣י יִשְׂרָאֵ֔ל אֲשֶׁ֣ר צִוִּ֗יתִי לִרְעֹ֛ות אֶת־עַמִּ֥י אֶת־יִשְׂרָאֵ֖ל לֵאמֹ֑ר לָ֛מָּה לֹֽא־בְנִיתֶ֥ם לִ֖י בֵּ֥ית אֲרָזִֽים׃
10O	7	8		81910	וְ֠עַתָּה כֹּֽה־תֹאמַ֞ר לְעַבְדִּ֣י לְדָוִ֗ד כֹּ֤ה אָמַר֨ יְהֺוָ֣ה צְבָאֹ֔ות אֲנִ֤י לְקַחְתִּ֨יךָ֨ מִן־הַנָּוֶ֔ה מֵֽאַחַ֖ר הַצֹּ֑אן לִֽהְיֹ֣ות נָגִ֔יד עַל־עַמִּ֖י עַל־יִשְׂרָאֵֽל׃
10O	7	9		81920	וָאֶֽהְיֶ֣ה עִמְּךָ֗ בְּכֹל֨ אֲשֶׁ֣ר הָלַ֔כְתָּ וָֽאַכְרִ֥תָה אֶת־כָּל־אֹֽיְבֶ֖יךָ מִפָּנֶ֑יךָ וְעָשִׂ֤תִי לְךָ֨ שֵׁ֣ם גָּדֹ֔ול כְּשֵׁ֥ם הַגְּדֹלִ֖ים אֲשֶׁ֥ר בָּאָֽרֶץ׃
10O	7	10		81930	וְשַׂמְתִּ֣י מָ֠קֹום לְעַמִּ֨י לְיִשְׂרָאֵ֤ל וּנְטַעְתִּיו֨ וְשָׁכַ֣ן תַּחְתָּ֔יו וְלֹ֥א יִרְגַּז֭ עֹ֑וד וְלֹֽא־יֹסִ֤יפוּ בְנֵֽי־עַוְלָה֙ לְעַנֹּותֹ֔ו כַּֽאֲשֶׁ֥ר בָּרִֽאשֹׁונָֽה׃
10O	7	11		81940	וּלְמִן־הַיֹּ֗ום אֲשֶׁ֨ר צִוִּ֤יתִי שֹֽׁפְטִים֨ עַל־עַמִּ֣י יִשְׂרָאֵ֔ל וַֽהֲנִיחֹ֥תִי לְךָ֖ מִכָּל־אֹֽיְבֶ֑יךָ וְהִגִּ֤יד לְךָ֙ יְהֺוָ֔ה כִּי־בַ֖יִת יַֽעֲשֶׂה־לְּךָ֥ יְהֺוָֽה׃
10O	7	12		81950	כִּ֣י ׀ יִמְלְא֣וּ יָמֶ֗יךָ וְשָֽׁכַבְתָּ֙ אֶת־אֲבֹתֶ֔יךָ וַֽהֲקִֽימֹתִ֤י אֶֽת־זַרְעֲךָ֙ אַֽחֲרֶ֔יךָ אֲשֶׁ֥ר יֵצֵ֖א מִמֵּעֶ֑יךָ וַֽהֲכִֽינֹתִ֖י אֶת־מַמְלַכְתֹּֽו׃
10O	7	13		81960	ה֥וּא יִבְנֶה־בַּ֖יִת לִשְׁמִ֑י וְכֹֽנַנְתִּ֛י אֶת־כִּסֵּ֥א מַמְלַכְתֹּ֖ו עַד־עֹולָֽם׃
10O	7	14		81970	אֲנִי֙ אֶֽהְיֶה־לֹּ֣ו לְאָ֔ב וְה֖וּא יִֽהְיֶה־לִּ֣י לְבֵ֑ן אֲשֶׁר֨ בְּהַ֣עֲֺותֹ֔ו וְהֹֽכַחְתִּיו֙ בְּשֵׁ֣בֶט אֲנָשִׁ֔ים וּבְנִגְעֵ֖י בְּנֵ֥י אָדָֽם׃
10O	7	15		81980	וְחַסְדִּ֖י לֹֽא־יָס֣וּר מִמֶּ֑נּוּ כַּֽאֲשֶׁ֤ר הֲסִרֹ֨תִי֨ מֵעִ֣ם שָׁא֔וּל אֲשֶׁ֥ר הֲסִרֹ֖תִי מִלְּפָנֶֽיךָ׃
10O	7	16		81990	וְנֶאְמַ֨ן בֵּֽיתְךָ֧ וּמַמְלַכְתְּךָ֛ עַד־עֹולָ֖ם לְפָנֶ֑יךָ כִּסְאֲךָ֕ יִהְיֶ֥ה נָכֹ֖ון עַד־עֹולָֽם׃
10O	7	17		82000	כְּכֹל֨ הַדְּבָרִ֣ים הָאֵ֔לֶּה וּכְכֹ֖ל הַֽחִזָּיֹ֣ון הַזֶּ֑ה כֵּ֛ן דִּבֶּ֥ר נָתָ֖ן אֶל־דָּוִֽד׃ ױ
10O	7	18		82010	וַיָּבֹא֨ הַמֶּ֣לֶּךְ דָּוִ֔ד וַיֵּ֖שֶׁב לִפְנֵ֣י יְהֺוָ֑ה וַיֹּ֗אמֶר מִ֣י אָֽנֹכִ֞י אֲדֹנָ֤י יֱהוִֹה֙ וּמִ֣י בֵיתִ֔י כִּ֥י הֲבִֽאֹתַ֖נִי עַד־הֲלֹֽם׃
10O	7	19		82020	וַתִּקְטַן֩ עֹ֨וד זֹ֤את בְּעֵינֶ֙יךָ֙ אֲדֹנָ֣י יֱהוִֹ֔ה וַתְּדַבֵּ֛ר גַּ֥ם אֶל־בֵּֽית־עַבְדְּךָ֖ לְמֵֽרָחֹ֑וק וְזֹ֛את תֹּורַ֥ת הָֽאָדָ֖ם אֲדֹנָ֥י יֱהוִֹֽה׃
10O	7	20		82030	וּמַה־יֹּוסִ֥יף דָּוִ֛ד עֹ֖וד לְדַבֵּ֣ר אֵלֶ֑יךָ וְאַתָּ֛ה יָדַ֥עְתָּ אֶֽת־עַבְדְּךָ֖ אֲדֹנָ֥י יֱהוִֹֽה׃
10O	7	21		82040	בַּֽעֲב֤וּר דְּבָֽרְךָ֨ וּכְלִבְּךָ֔ עָשִׂ֕יתָ אֵ֥ת כָּל־הַגְּדוּ֯לָּ֖ה הַזֹּ֑את לְהֹודִ֖יעַ אֶת־עַבְדֶּֽךָ׃
10O	7	22		82050	עַל־כֵּ֥ן גָּדַ֖לְתָּ יְהֺוָ֣ה אֱלֹהִ֑ים כִּי־אֵ֣ין כָּמֹ֗וךָ וְאֵ֤ין אֱלֹהִים֙ ז֣וּלָתֶ֔ךָ בְּכֹ֥ל אֲשֶׁר־שָׁמַ֖עְנוּ בְּאָזְנֵֽינוּ׃
10O	7	23		82060	וּמִ֤י כְעַמְּךָ֨ כְּיִשְׂרָאֵ֔ל גֹּ֥וי אֶחָ֖ד בָּאָ֑רֶץ אֲשֶׁ֣ר הָלְכֽוּ־אֱ֠לֹהִים לִפְדֹּֽות־לֹ֨ו לְעָ֜ם וְלָשׂ֧וּם לֹ֣ו שֵׁ֗ם וְלַֽעֲשֹׂ֨ות לָכֶ֜ם הַגְּדוּ֯לָּ֤ה וְנֹֽרָאֹות֨ לְאַרְצֶ֔ךָ מִפְּנֵ֣י עַמְּךָ֗ אֲשֶׁ֨ר פָּדִיתָ֤ לְּךָ֨ מִמִּצְרַ֔יִם גֹּויִ֖ם וֵאלֹהָֽיו׃
10O	7	24		82070	וַתְּכֹ֣ונֵֽן לְ֠ךָ אֶת־עַמְּךָ֨ יִשְׂרָאֵ֧ל ׀ לְךָ֛ לְעָ֖ם עַד־עֹולָ֑ם וְאַתָּ֣ה יְהֺוָ֔ה הָיִ֥יתָ לָהֶ֖ם לֵֽאלֹהִֽים׃
10O	7	25		82080	וְעַתָּה֙ יְהֺוָ֣ה אֱלֹהִ֔ים הַדָּבָ֗ר אֲשֶׁ֨ר דִּבַּ֤רְתָּ עַל־עַבְדְּךָ֙ וְעַל־בֵּיתֹ֔ו הָקֵ֖ם עַד־עֹולָ֑ם וַֽעֲשֵׂ֖ה כַּֽאֲשֶׁ֥ר דִּבַּֽ֯רְתָּ׃
10O	7	26		82090	וְיִגְדַּ֨ל שִׁמְךָ֤ עַד־עֹולָם֙ לֵאמֹ֔ר יְהֺוָ֣ה צְבָאֹ֔ות אֱלֹהִ֖ים עַל־יִשְׂרָאֵ֑ל וּבֵית֙ עַבְדְּךָ֣ דָוִ֔ד יִֽהְיֶ֥ה נָכֹ֖ון לְפָנֶֽיךָ׃
10O	7	27		82100	כִּֽי־אַתָּה֩ יְהֺוָ֨ה צְבָאֹ֜ות אֱלֹהֵ֣י יִשְׂרָאֵ֗ל גָּלִ֜יתָה אֶת־אֹ֤זֶן עַבְדְּךָ֙ לֵאמֹ֔ר בַּ֖יִת אֶבְנֶה־לָּ֑ךְ עַל־כֵּ֗ן מָצָ֤א עַבְדְּךָ֨ אֶת־לִבֹּ֔ו לְהִתְפַּלֵּ֣ל אֵלֶ֔יךָ אֶת־הַתְּפִלָּ֖ה הַזֹּֽאת׃
10O	7	28		82110	וְעַתָּ֣ה ׀ אֲדֹנָ֣י יֱהוִֹ֗ה אַתָּה־הוּא֙ הָֽאֱלֹהִ֔ים וּדְבָרֶ֖יךָ יִֽהְי֣וּ אֱמֶ֑ת וַתְּדַבֵּר֙ אֶל־עַבְדְּךָ֔ אֶת־הַטֹּובָ֖ה הַזֹּֽאת׃
10O	7	29		82120	וְעַתָּ֗ה הֹואֵל֨ וּבָרֵךְ֨ אֶת־בֵּ֣ית עַבְדְּךָ֔ לִֽהְיֹ֥ות לְעֹולָ֖ם לְפָנֶ֑יךָ כִּֽי־אַתָּ֞ה אֲדֹנָ֤י יֱהוִֹה֙ דִּבַּ֔רְתָּ וּמִבִּרְכָ֣תְךָ֔ יְבֹרַ֥ךְ בֵּֽית־עַבְדְּךָ֖ לְעֹולָֽם׃
10O	8	1		82130	וַיְהִי֨ אַֽחֲרֵי־כֵ֔ן וַיַּ֥ךְ דָּוִ֛ד אֶת־פְּלִשְׁתִּ֖ים וַיַּכְנִיעֵ֑ם וַיִּקַּ֥ח דָּוִ֛ד אֶת־מֶ֥תֶג הָֽאַמָּ֖ה מִיַּ֥ד פְּלִשְׁתִּֽים׃
10O	8	2		82140	וַיַּ֣ךְ אֶת־מֹואָ֗ב וַיְמַדְּדֵ֤ם בַּחֶ֨בֶל֨ הַשְׁכֵּ֣ב אֹותָ֣ם אַ֔רְצָה וַיְמַדֵּ֤ד שְׁנֵֽי־חֲבָלִים֨ לְהָמִ֔ית וּמְלֹ֥א הַחֶ֖בֶל לְהַֽחֲיֹ֑ות וַתְּהִ֤י מֹואָב֙ לְדָוִ֔ד לַֽעֲבָדִ֖ים נֹֽשְׂאֵ֥י מִנְחָֽה׃
10O	8	3		82150	וַיַּ֣ךְ דָּוִ֔ד אֶת־הֲדַדְעֶ֥זֶר בֶּן־רְחֹ֖ב מֶ֣לֶךְ צֹובָ֑ה בְּלֶכְתֹּ֕ו לְהָשִׁ֥יב יָדֹ֖ו בִּנְהַר־ְָֽ֯׃ 
10O	8	4		82160	וַיִּלְכֹּ֨ד דָּוִ֜ד מִמֶּ֗נּוּ אֶ֤לֶף וּשְׁבַע־מֵאֹות֨ פָּֽרָשִׁ֔ים וְעֶשְׂרִ֥ים אֶ֖לֶף אִ֣ישׁ רַגְלִ֑י וַיְעַקֵּ֤ר דָּוִד֨ אֶת־כָּל־הָרֶ֔כֶב וַיֹּותֵ֥ר מִמֶּ֖נּוּ מֵ֥אָה רָֽכֶב׃
10O	8	5		82170	וַתָּבֹא֨ אֲרַ֣ם דַּמֶּ֔שֶׂק לַעְזֹ֕ר לַֽהֲדַדְעֶ֖זֶר מֶ֣לֶךְ צֹובָ֑ה וַיַּ֤ךְ דָּוִד֙ בַּֽאֲרָ֔ם עֶשְׂרִֽים־וּשְׁנַ֥יִם אֶ֖לֶף אִֽישׁ׃
10O	8	6		82180	וַיָּ֨שֶׂם דָּוִ֤ד נְצִבִים֙ בַּֽאֲרַ֣ם דַּמֶּ֔שֶׂק וַתְּהִ֤י אֲרָם֙ לְדָוִ֔ד לַֽעֲבָדִ֖ים נֹֽושְׂאֵ֣י מִנְחָ֑ה וַיּ֤שַׁע יְהֺוָה֙ אֶת־דָּוִ֔ד בְּכֹ֖ל אֲשֶׁ֥ר הָלָֽךְ׃
10O	8	7		82190	וַיִּקַּ֣ח דָּוִ֗ד אֵ֚ת שִׁלְטֵ֣י הַזָּהָ֔ב אֲשֶׁ֣ר הָי֔וּ אֶ֖ל עַבְדֵ֣י הֲדַדְעָ֑זֶר וַיְבִיאֵ֖ם יְרוּשָׁלִָֽם׃
10O	8	8		82200	וּמִבֶּ֥טַח וּמִבֵּֽרֹתַ֖י עָרֵ֣י הֲדַדְעָ֑זֶר לָקַ֞ח הַמֶּ֧לֶךְ דָּוִ֛ד נְח֖שֶׁת הַרְבֵּ֥ה מְאֹֽד׃ ײ
10O	8	9		82210	וַיִּשְׁמַ֕ע תֹּ֖עִי מֶ֣לֶךְ חֲמָ֑ת כִּ֚י הִכָּ֣ה דָוִ֔ד אֵ֖ת כָּל־חֵ֥יל הֲדַדְעָֽזֶר׃
10O	8	10		82220	וַיִּשְׁלַ֣ח תֹּ֣עִי אֶת־יֹֽורָם־בְּנֹ֣ו אֶל־הַמֶּֽלֶךְ־דָּ֠וִד לִשְׁאָל־לֹ֨ו לְשָׁלֹ֜ום וּלְבָֽרְכֹ֗ו עַל֩ אֲשֶׁ֨ר נִלְחַ֤ם בַּֽהֲדַדְעֶ֨זֶר֨ וַיַּכֵּ֔הוּ כִּי־אִ֛ישׁ מִלְחֲמֹ֥ות תֹּ֖עִי הָיָ֣ה הֲדַדְעָ֑זֶר וּבְיָדֹ֗ו הָי֛וּ כְּלֵֽי־כֶ֥סֶף וּכְלֵֽי־זָהָ֖ב וּכְלֵ֥י נְחֽשֶׁת׃
10O	8	11		82230	גַּם־אֹתָ֕ם הִקְדִּ֛ישׁ הַמֶּ֥לֶךְ דָּוִ֖ד לַֽיהֺוָ֑ה עִם־הַכֶּ֤סֶף וְהַזָּהָב֙ אֲשֶׁ֣ר הִקְדִּ֔ישׁ מִכָּל־הַגֹּויִ֖ם אֲשֶׁ֥ר כִּבֵּֽשׁ׃
10O	8	12		82240	מֵֽאֲרָ֤ם וּמִמֹּואָב֨ וּמִבְּנֵ֣י עַמֹּ֔ון וּמִפְּלִשְׁתִּ֖ים וּמֵֽעֲמָלֵ֑ק וּמִשְּׁלַ֛ל הֲדַדְעֶ֥זֶר בֶּן־רְחֹ֖ב מֶ֥לֶךְ צֹובָֽה׃
10O	8	13		82250	וַיַּ֤עַשׂ דָּוִד֨ שֵׁ֔ם בְּשֻׁבֹ֕ו מֵֽהַכֹּותֹ֥ו אֶת־אֲרָ֖ם בְּגֵיא־מֶ֑לַח שְׁמֹונָ֥ה עָשָׂ֖ר אָֽלֶף׃
10O	8	14		82260	וַיָּ֨שֶׂם בֶּאֱדֹ֜ום נְצִבִ֗ים בְּכָל־אֱדֹום֨ שָׂ֣ם נְצִבִ֔ים וַיְהִ֥י כָל־אֱדֹ֖ום עֲבָדִ֣ים לְדָוִ֑ד וַיֹּ֤ושַׁע יְהֺוָה֙ אֶת־דָּוִ֔ד בְּכֹ֖ל אֲשֶׁ֥ר הָלָֽךְ׃
10O	8	15		82270	וַיִּמְלֹ֥ךְ דָּוִ֖ד עַל־כָּל־יִשְׂרָאֵ֑ל וַיְהִ֣י דָוִ֗ד עֹשֶׂ֛ה מִשְׁפָּ֥ט וּצְדָקָ֖ה לְכָל־עַמֹּֽו׃
10O	8	16		82280	וְיֹואָ֥ב בֶּן־צְרוּיָ֖ה עַל־הַצָּבָ֑א וִיהֹֽושָׁפָ֥ט בֶּן־אֲחִיל֖וּד מַזְכִּֽיר׃
10O	8	17		82290	וְצָדֹ֧וק בֶּן־אֲחִיט֛וּב וַֽאֲחִימֶ֥לֶךְ בֶּן־אֶבְיָתָ֖ר כֹּֽהֲנִ֑ים וּשְׂרָיָ֖ה סֹופֵֽר׃
10O	8	18		82300	וּבְנָיָ֙הוּ֙ בֶּן־יְהֹ֣ויָדָ֔ע וְהַכְּרֵתִ֖י וְהַפְּלֵתִ֑י וּבְנֵ֥י דָוִ֖ד כֹּֽהֲנִ֥ים הָיֽוּ׃ ײ
10O	9	1		82310	וַיֹּ֣אמֶר דָּוִ֔ד הֲכִ֣י יֶשׁ־עֹ֔וד אֲשֶׁ֥ר נֹותַ֖ר לְבֵ֣ית שָׁא֑וּל וְאֶֽעֱשֶׂ֤ה עִמֹּו֙ חֶ֔סֶד בַּֽעֲב֖וּר יְהֹֽונָתָֽן׃
10O	9	2		82320	וּלְבֵ֨ית שָׁא֥וּל עֶ֙בֶד֙ וּשְׁמֹ֣ו צִיבָ֔א וַיִּקְרְאוּ־לֹ֖ו אֶל־דָּוִ֑ד וַיֹּ֨אמֶר הַמֶּ֧לֶךְ אֵלָ֛יו הַֽאַתָּ֥ה צִיבָ֖א וַיֹּ֥אמֶר עַבְדֶּֽךָ׃
10O	9	3		82330	וַיֹּ֣אמֶר הַמֶּ֗לֶךְ הַאֶ֨פֶס עֹ֥וד אִישׁ֙ לְבֵ֣ית שָׁא֔וּל וְאֶֽעֱשֶׂ֥ה עִמֹּ֖ו חֶ֣סֶד אֱלֹהִ֑ים וַיֹּ֤אמֶר צִיבָא֙ אֶל־הַמֶּ֔לֶךְ עֹ֛וד בֵּ֥ן לִיהֹֽונָתָ֖ן נְכֵ֥ה רַגְלָֽיִם׃
10O	9	4		82340	וַיֹּֽאמֶר־לֹ֥ו הַמֶּ֖לֶךְ אֵיפֹ֣ה ה֑וּא וַיֹּ֤אמֶר צִיבָא֙ אֶל־הַמֶּ֔לֶךְ הִנֵּה־ה֗וּא בֵּ֛ית מָכִ֥יר בֶּן־עַמִּיאֵ֖ל בְּלֹ֥ו דְבָֽר׃
10O	9	5		82350	וַיִּשְׁלַ֖ח הַמֶּ֣לֶךְ דָּוִ֑ד וַיִּקָּחֵ֗הוּ מִבֵּ֛ית מָכִ֥יר בֶּן־עַמִּיאֵ֖ל מִלֹּ֥ו דְבָֽר׃
10O	9	6		82360	וַ֠יָּבֹא מְפִיבֹ֨שֶׁת בֶּן־יְהֹֽונָתָ֤ן בֶּן־שָׁאוּל֨ אֶל־דָּוִ֔ד וַיִּפֹּ֥ל עַל־פָּנָ֖יו וַיִּשְׁתָּ֑חוּ וַיֹּ֤אמֶר דָּוִד֙ מְפִיבֹ֔שֶׁת וַיֹּ֖אמֶר הִנֵּ֥ה עַבְדֶּֽךָ׃
10O	9	7		82370	וַיֹּאמֶר֩ לֹ֨ו דָוִ֜ד אַל־תִּירָ֗א כִּ֣י עָשׂה֩ אֶֽעֱשֶׂ֨ה עִמְּךָ֥ חֶ֨סֶד֨ בַּֽעֲבוּר֨ יְהֹֽונָתָ֣ן אָבִ֔יךָ וַֽהֲשִֽׁבֹתִ֣י לְךָ֔ אֶת־כָּל־שְׂדֵ֖ה שָׁא֣וּל אָבִ֑יךָ וְאַתָּ֗ה תֹּ֥אכַל לֶ֛חֶם עַל־שֻׁלְחָנִ֖י תָּמִֽיד׃
10O	9	8		82380	וַיִּשְׁתַּ֕חוּ וַיֹּ֖אמֶר מֶ֣ה עַבְדֶּ֑ךָ כִּ֣י פָנִ֔יתָ אֶל־הַכֶּ֥לֶב הַמֵּ֖ת אֲשֶׁ֥ר כָּמֹֽונִי׃
10O	9	9		82390	וַיִּקְרָ֣א הַמֶּ֗לֶךְ אֶל־צִיבָ֛א נַ֥עַר שָׁא֖וּל וַיֹּ֣אמֶר אֵלָ֑יו כֹּל֩ אֲשֶׁ֨ר הָיָ֤ה לְשָׁאוּל֨ וּלְכָל־בֵּיתֹ֔ו נָתַ֖תִּי לְבֶן־אֲדֹנֶֽיךָ׃
10O	9	10		82400	וְעָבַ֣דְתָּ לֹּ֣ו אֶֽת־הָאֲדָמָ֡ה אַתָּה֩ וּבָנֶ֨יךָ וַֽעֲבָדֶ֜יךָ וְהֵבֵ֗אתָ וְהָיָ֨ה לְבֶן־אֲדֹנֶ֤יךָ לֶּ֨חֶם֙ וַֽאֲכָלֹ֔ו וּמְפִיב֨שֶׁת֙ בֶּן־אֲדֹנֶ֔יךָ יֹאכַ֥ל תָּמִ֛יד לֶ֖חֶם עַל־שֻׁלְחָנִ֑י וּלְצִיבָ֗א חֲמִשָּׁ֥ה עָשָׂ֛ר בָּנִ֖ים וְעֶשְׂרִ֥ים עֲבָדִֽים׃
10O	9	11		82410	וַיֹּ֤אמֶר צִיבָא֨ אֶל־הַמֶּ֔לֶךְ כְּכֹל֩ אֲשֶׁ֨ר יְצַוֶּ֜ה אֲדֹנִ֤י הַמֶּ֨לֶךְ֨ אֶת־עַבְדֹּ֔ו כֵּ֖ן יַֽעֲשֶׂ֣ה עַבְדֶּ֑ךָ וּמְפִיב֗שֶׁת אֹכֵל֨ עַל־שֻׁלְחָנִ֔י כְּאַחַ֖ד מִבְּנֵ֥י הַמֶּֽלֶךְ׃
10O	9	12		82420	וְלִמְפִיב֥שֶׁת בֵּ֯ן־קָטָ֖ן וּשְׁמֹ֣ו מִיכָ֑א וְכֹל֨ מֹושַׁ֣ב בֵּית־צִיבָ֔א עֲבָדִ֖ים לִמְפִיבֽשֶׁת׃
10O	9	13		82430	וּמְפִיב֗שֶׁת ישֵׁב֙ בִּיר֣וּשָׁלִַ֔ם כִּ֣י עַל־שֻׁלְחַ֥ן הַמֶּ֛לֶךְ תָּמִ֖יד ה֣וּא אֹכֵ֑ל וְה֥וּא פִּסֵּ֖חַ שְׁתֵּ֥י רַגְלָֽיו׃ ײ
10O	10	1		82440	וַיְהִי֨ אַֽחֲרֵי־כֵ֔ן וַיָּ֕מָת מֶ֖לֶךְ בְּנֵ֣י עַמֹּ֑ון וַיִּמְלֹ֛ךְ חָנ֥וּן בְּנֹ֖ו תַּחְתָּֽיו׃
10O	10	2		82450	וַיֹּ֨אמֶר דָּוִ֜ד אֶֽעֱשֶׂה־חֶ֣סֶד ׀ עִם־חָנ֣וּן בֶּן־נָחָ֗שׁ כַּֽאֲשֶׁר֩ עָשָׂ֨ה אָבִ֤יו עִמָּדִי֙ חֶ֔סֶד וַיִּשְׁלַ֨ח דָּוִ֧ד לְנַֽחֲמֹ֛ו בְּיַ֥ד עֲבָדָ֖יו אֶל־אָבִ֑יו וַיָּבֹ֨אוּ֨ עַבְדֵ֣י דָוִ֔ד אֶ֖רֶץ בְּנֵ֥י עַמֹּֽון׃
10O	10	3		82460	וַיֹּֽאמְרוּ֩ שָׂרֵ֨י בְנֵֽי־עַמֹּ֜ון אֶל־חָנ֣וּן אֲדֹֽנֵיהֶ֗ם הַֽמְכַבֵּ֨ד דָּוִ֤ד אֶת־אָבִ֨יךָ֨ בְּעֵינֶ֔יךָ כִּֽי־שָׁלַ֥ח לְךָ֖ מְנַֽחֲמִ֑ים הֲ֠לֹוא בַּֽעֲב֞וּר חֲקֹ֤ר אֶת־הָעִ֯יר֙ וּלְרַגְּלָ֣הּ וּלְהָפְכָ֔הּ שָׁלַ֥ח דָּוִ֛ד אֶת־עֲבָדָ֖יו אֵלֶֽיךָ׃
10O	10	4		82470	וַיִּקַּ֨ח חָנ֜וּן אֶת־עַבְדֵ֣י דָוִ֗ד וַיְגַלַּח֨ אֶת־חֲצִ֣י זְקָנָ֔ם וַיִּכְרֹ֧ת אֶת־מַדְוֵיהֶ֛ם בַּחֵ֖צִי עַ֣ד שְׁתֹֽותֵיהֶ֑ם וַיְשַׁלְּחֵֽם׃
10O	10	5		82480	וַיַּגִּ֤דוּ לְדָוִד֙ וַיִּשְׁלַ֣ח לִקְרָאתָ֔ם כִּֽי־הָי֥וּ הָֽאֲנָשִׁ֖ים נִכְלָמִ֣ים מְאֹ֑ד וַיֹּ֤אמֶר הַמֶּ֨לֶךְ֙ שְׁב֣וּ בִֽירֵחֹ֔ו עַד־יְצַמַּ֥ח זְקַנְכֶ֖ם וְשַׁבְתֶּֽם׃
10O	10	6		82490	וַיִּרְאוּ֙ בְּנֵ֣י עַמֹּ֔ון כִּ֥י נִבְאֲשׁ֖וּ בְּדָוִ֑ד וַיִּשְׁלְח֣וּ בְנֵֽי־עַמֹּ֡ון וַיִּשְׂכְּרוּ֩ אֶת־אֲרַ֨ם בֵּֽית־רְחֹ֜וב וְאֶת־אֲרַ֣ם צֹובָ֗א עֶשְׂרִ֥ים אֶ֨לֶף֙ רַגְלִ֔י וְאֶת־מֶ֤לֶךְ מַֽעֲכָה֨ אֶ֣לֶף אִ֔ישׁ וְאִ֣ישׁ טֹ֔וב שְׁנֵֽים־עָשָׂ֥ר אֶ֖לֶף אִֽישׁ׃
10O	10	7		82500	וַיִּשְׁמַ֖ע דָּוִ֑ד וַיִּשְׁלַח֨ אֶת־יֹואָ֔ב וְאֵ֥ת כָּל־הַצָּבָ֖א הַגִּבֹּורִֽים׃
10O	10	8		82510	וַיֵּֽצְאוּ֙ בְּנֵ֣י עַמֹּ֔ון וַיַּֽעַרְכ֥וּ מִלְחָמָ֖ה פֶּ֣תַח הַשָּׁ֑עַר וַֽאֲרַ֨ם צֹובָ֤א וּרְחֹוב֨ וְאִֽישׁ־טֹ֣וב וּמַֽעֲכָ֔ה לְבַדָּ֖ם בַּשָּׂדֶֽה׃
10O	10	9		82520	וַיַּ֣רְא יֹואָ֔ב כִּי־הָֽיְתָ֤ה אֵלָיו֙ פְּנֵ֣י הַמִּלְחָמָ֔ה מִפָּנִ֖ים וּמֵֽאָחֹ֑ור וַיִּבְחַ֗ר מִכֹּל֨ בְּחוּרֵ֣י ב֯יִשְׂרָאֵ֔ל וַיַּֽעֲרֹ֖ךְ לִקְרַ֥את אֲרָֽם׃
10O	10	10		82530	וְאֵת֙ יֶ֣תֶר הָעָ֔ם נָתַ֕ן בְּיַ֖ד אַבְשַׁ֣י אָחִ֑יו וַיַּֽעֲרֹ֕ךְ לִקְרַ֖את בְּנֵ֥י עַמֹּֽון׃
10O	10	11		82540	וַיֹּ֗אמֶר אִם־תֶּֽחֱזַ֤ק אֲרָם֨ מִמֶּ֔נִּי וְהָיִ֥תָה לִּ֖י לִֽישׁוּעָ֑ה וְאִם־בְּנֵ֤י עַמֹּון֙ יֶֽחֶזְק֣וּ מִמְּךָ֔ וְהָֽלַכְתִּ֖י לְהֹושִׁ֥יעַֽ לָֽךְ׃
10O	10	12		82550	חֲזַ֤ק וְנִתְחַזַּק֨ בְּעַ֣ד עַמֵּ֔נוּ וּבְעַ֖ד עָרֵ֣י אֱלֹהֵ֑ינוּ וַֽיהֺוָ֔ה יַֽעֲשֶׂ֥ה הַטֹּ֖וב בְּעֵינָֽיו׃
10O	10	13		82560	וַיִּגַּ֣שׁ יֹואָ֗ב וְהָעָם֙ אֲשֶׁ֣ר עִמֹּ֔ו לַמִּלְחָמָ֖ה בַּֽאֲרָ֑ם וַיָּנֻ֖סוּ מִפָּנָֽיו׃
10O	10	14		82570	וּבְנֵ֨י עַמֹּ֤ון ׀ רָאוּ֙ כִּי־נָ֣ס אֲרָ֔ם וַיָּנֻ֙סוּ֙ מִפְּנֵ֣י אֲבִישַׁ֔י וַיָּבֹ֖אוּ הָעִ֑יר וַיָּ֣שָׁב יֹואָ֗ב מֵעַל֨ בְּנֵ֣י עַמֹּ֔ון וַיָּבֹ֖א יְרֽוּשָׁלִָֽם׃
10O	10	15		82580	וַיַּ֣רְא אֲרָ֔ם כִּ֥י נִגַּ֖ף לִפְנֵ֣י יִשְׂרָאֵ֑ל וַיֵּאָֽסְפ֖וּ יָֽחַד׃
10O	10	16		82590	וַיִּשְׁלַ֣ח הֲדַדְעֶ֗זֶר וַיֹּצֵ֤א אֶת־אֲרָם֙ אֲשֶׁר֙ מֵעֵ֣בֶר הַנָּהָ֔ר וַיָּבֹ֖אוּ חֵילָ֑ם וְשֹׁובַ֛ךְ שַׂר־צְבָ֥א הֲדַדְעֶ֖זֶר לִפְנֵיהֶֽם׃
10O	10	17		82600	וַיֻּגַּ֣ד לְדָוִ֗ד וַיֶּֽאֱסֹ֤ף אֶת־כָּל־יִשְׂרָאֵל֨ וַיַּֽעֲבֹ֣ר אֶת־הַיַּרְדֵּ֔ן וַיָּבֹ֖א חֵלָ֑א֯מָה וַיַּֽעַרְכ֤וּ אֲרָם֙ לִקְרַ֣את דָּוִ֔ד וַיִּלָּֽחֲמ֖וּ עִמֹּֽו׃
10O	10	18		82610	וַיָּ֣נָס אֲרָם֮ מִפְּנֵ֣י יִשְׂרָאֵל֒ וַיַּֽהֲרֹ֨ג דָּוִ֜ד מֵֽאֲרָ֗ם שְׁבַ֤ע מֵאֹות֙ רֶ֔כֶב וְאַרְבָּעִ֥ים אֶ֖לֶף פָּֽרָשִׁ֑ים וְאֵ֨ת שֹׁובַ֧ךְ שַׂר־צְבָאֹ֛ו הִכָּ֖ה וַיָּ֥מָת שָֽׁם׃
10O	10	19		82620	וַיִּרְא֨וּ כָל־הַמְּלָכִ֜ים עַבְדֵ֣י הֲדַדְעֶ֗זֶר כִּ֤י נִגְּפוּ֙ לִפְנֵ֣י יִשְׂרָאֵ֔ל וַיַּשְׁלִ֥מוּ אֶת־יִשְׂרָאֵ֖ל וַיַּֽעַבְד֑וּם וַיִּֽרְא֣וּ אֲרָ֔ם לְהֹושִׁ֥יעַ עֹ֖וד אֶת־בְּנֵ֥י עַמֹּֽון׃ ײ
10O	11	1		82630	וַיְהִי֩ לִתְשׁוּבַ֨ת הַשָּׁנָ֜ה לְעֵ֣ת ׀ צֵ֣את הַמַּלְא֯כִ֗ים וַיִּשְׁלַ֣ח דָּוִ֡ד אֶת־יֹואָב֩ וְאֶת־עֲבָדָ֨יו עִמֹּ֜ו וְאֶת־כָּל־יִשְׂרָאֵ֗ל וַיַּשְׁחִ֙תוּ֙ אֶת־בְּנֵ֣י עַמֹּ֔ון וַיָּצֻ֖רוּ עַל־רַבָּ֑ה וְדָוִ֖ד יֹושֵׁ֥ב בִּירֽוּשָׁלִָֽם׃
10O	11	2		82640	וַיְהִ֣י ׀ לְעֵ֣ת הָעֶ֗רֶב וַיָּ֨קָם דָּוִ֜ד מֵעַ֤ל מִשְׁכָּבֹו֙ וַיִּתְהַלֵּךְ֙ עַל־גַּ֣ג בֵּֽית־הַמֶּ֔לֶךְ וַיַּ֥רְא אִשָּׁ֛ה רֹחֶ֖צֶת מֵעַ֣ל הַגָּ֑ג וְהָ֣אִשָּׁ֔ה טֹובַ֥ת מַרְאֶ֖ה מְאֹֽד׃
10O	11	3		82650	וַיִּשְׁלַ֣ח דָּוִ֔ד וַיִּדְר֖שׁ לָֽאִשָּׁ֑ה וַיֹּ֗אמֶר הֲלֹוא־זֹאת֙ בַּת־שֶׁ֣בַע בַּת־אֱלִיעָ֔ם אֵ֖שֶׁת אֽוּרִיָּ֥ה הַֽחִתִּֽי׃
10O	11	4		82660	וַיִּשְׁלַח֩ דָּוִ֨ד מַלְאָכִ֜ים וַיִּקָּחֶ֗הָ וַתָּבֹ֤וא אֵלָיו֙ וַיִּשְׁכַּ֣ב עִמָּ֗הּ וְהִ֥יא מִתְקַדֶּ֖שֶׁת מִטֻּמְאָתָ֑הּ וַתָּ֖שָׁב אֶל־בֵּיתָֽהּ׃
10O	11	5		82670	וַתַּ֖הַר הָֽאִשָּׁ֑ה וַתִּשְׁלַח֨ וַתַּגֵּ֣ד לְדָוִ֔ד וַתֹּ֖אמֶר הָרָ֥ה אָנֹֽכִי׃
10O	11	6		82680	וַיִּשְׁלַ֤ח דָּוִד֨ אֶל־יֹואָ֔ב שְׁלַ֣ח אֵלַ֔י אֶת־אֽוּרִיָּ֖ה הַֽחִתִּ֑י וַיִּשְׁלַ֥ח יֹואָ֛ב אֶת־אֽוּרִיָּ֖ה אֶל־דָּוִֽד׃
10O	11	7		82690	וַיָּבֹ֥א אֽוּרִיָּ֖ה אֵלָ֑יו וַיִּשְׁאַ֣ל דָּוִ֗ד לִשְׁלֹ֤ום יֹואָב֙ וְלִשְׁלֹ֣ום הָעָ֔ם וְלִשְׁלֹ֖ום הַמִּלְחָמָֽה׃
10O	11	8		82700	וַיֹּ֤אמֶר דָּוִד֨ לְא֣וּרִיָּ֔ה רֵ֥ד לְבֵֽיתְךָ֖ וּרְחַ֣ץ רַגְלֶ֑יךָ וַיֵּצֵ֤א אֽוּרִיָּה֨ מִבֵּ֣ית הַמֶּ֔לֶךְ וַתֵּצֵ֥א אַֽחֲרָ֖יו מַשְׂאַ֥ת הַמֶּֽלֶךְ׃
10O	11	9		82710	וַיִּשְׁכַּ֣ב אֽוּרִיָּ֗ה פֶּ֚תַח בֵּ֣ית הַמֶּ֔לֶךְ אֵ֖ת כָּל־עַבְדֵ֣י אֲדֹנָ֑יו וְלֹ֥א יָרַ֖ד אֶל־בֵּיתֹֽו׃
10O	11	10		82720	וַיַּגִּ֤דוּ לְדָוִד֙ לֵאמֹ֔ר לֹֽא־יָרַ֥ד אֽוּרִיָּ֖ה אֶל־בֵּיתֹ֑ו וַיֹּ֨אמֶר דָּוִ֜ד אֶל־אֽוּרִיָּ֗ה הֲלֹ֤וא מִדֶּ֨רֶךְ֨ אַתָּ֣ה בָ֔א מַדּ֖וּעַ לֹֽא־יָרַ֥דְתָּ אֶל־בֵּיתֶֽךָ׃
10O	11	11		82730	וַיֹּ֨אמֶר אֽוּרִיָּ֜ה אֶל־דָּוִ֗ד הָֽ֠אָרֹון וְיִשְׂרָאֵ֨ל וִֽיהוּדָ֜ה יֽשְׁבִ֣ים בַּסֻּכֹּ֗ות וַֽאדֹנִ֨י יֹואָ֜ב וְעַבְדֵ֤י אֲדֹנִ֨י עַל־פְּנֵ֤י הַשָּׂדֶה֙ חֹנִ֔ים וַֽאֲנִ֞י אָבֹ֧וא אֶל־בֵּיתִ֛י לֶֽאֱכֹ֥ל וְלִשְׁתֹּ֖ות וְלִשְׁכַּ֣ב עִם־אִשְׁתִּ֑י חַ֯יֶּ֙ךָ֨ וְחֵ֣י נַפְשֶׁ֔ךָ אִם־אֶֽעֱשֶׂ֖ה אֶת־הַדָּבָ֥ר הַזֶּֽה׃
10O	11	12		82740	וַ֙יֹּאמֶר דָּוִ֜ד אֶל־אֽוּרִיָּ֗ה שֵׁ֥ב בָּזֶ֛ה גַּם־הַיֹּ֖ום וּמָחָ֣ר אֲשַׁלְּחֶ֑ךָּ וַיֵּ֨שֶׁב אֽוּרִיָּ֧ה בִירֽוּשָׁלִַ֛ם בַּיֹּ֥ום הַה֖וּא וּמִמָּֽחֳרָֽת׃
10O	11	13		82750	וַיִּקְרָא־לֹ֣ו דָוִ֗ד וַיֹּ֧אכַל לְפָנָ֛יו וַיֵּ֖שְׁתְּ וַיְשַׁכְּרֵ֑הוּ וַיֵּצֵ֣א בָעֶ֗רֶב לִשְׁכַּ֤ב בְּמִשְׁכָּבֹו֙ עִם־עַבְדֵ֣י אֲדֹנָ֔יו וְאֶל־בֵּיתֹ֖ו לֹ֥א יָרָֽד׃
10O	11	14		82760	וַיְהִ֣י בַבֹּ֔קֶר וַיִּכְתֹּ֥ב דָּוִ֛ד סֵ֖פֶר אֶל־יֹואָ֑ב וַיִּשְׁלַ֖ח בְּיַ֥ד אֽוּרִיָּֽה׃
10O	11	15		82770	וַיִּכְתֹּ֥ב בַּסֵּ֖פֶר לֵאמֹ֑ר הָב֣וּ אֶת־אֽוּרִיָּ֗ה אֶל־מוּל֨ פְּנֵ֤י הַמִּלְחָמָה֙ הַֽחֲזָקָ֔ה וְשַׁבְתֶּ֥ם מֵאַֽחֲרָ֖יו וְנִכָּ֥ה וָמֵֽת׃
10O	11	16		82780	וַיְהִ֕י בִּשְׁמֹ֥ור יֹואָ֖ב אֶל־הָעִ֑יר וַיִּתֵּן֙ אֶת־א֣וּרִיָּ֔ה אֶל־הַמָּקֹום֨ אֲשֶׁ֣ר יָדַ֔ע כִּ֥י אַנְשֵׁי־חַ֖יִל שָֽׁם׃
10O	11	17		82790	וַיֵּ֨צְא֜וּ אַנְשֵׁ֤י הָעִיר֨ וַיִּלָּֽחֲמ֣וּ אֶת־יֹואָ֔ב וַיִּפֹּ֥ל מִן־הָעָ֖ם מֵֽעַבְדֵ֣י דָוִ֑ד וַיָּ֕מָת גַּ֖ם אֽוּרִיָּ֥ה הַֽחִתִּֽי׃
10O	11	18		82800	וַיִּשְׁלַ֖ח יֹואָ֑ב וַיַּגֵּ֣ד לְדָוִ֔ד אֶ֖ת כָּל־דִּבְרֵ֥י הַמִּלְחָמָֽה׃
10O	11	19		82810	וַיְצַ֥ו אֶת־הַמַּלְאָ֖ךְ לֵאמֹ֑ר כְּכַלֹּֽותְךָ֗ אֵ֛ת כָּל־דִּבְרֵ֥י הַמִּלְחָמָ֖ה לְדַבֵּ֥ר אֶל־הַמֶּֽלֶךְ׃
10O	11	20		82820	וְהָיָ֗ה אִם־תַּֽעֲלֶה֙ חֲמַ֣ת הַמֶּ֔לֶךְ וְאָמַ֣ר לְךָ֔ מַדּ֛וּעַ נִגַּשְׁתֶּ֥ם אֶל־הָעִ֖יר לְהִלָּחֵ֑ם הֲלֹ֣וא יְדַעְתֶּ֔ם אֵ֥ת אֲשֶׁר־יֹר֖וּ מֵעַ֥ל הַֽחֹומָֽה׃
10O	11	21		82830	מִֽי־הִכָּ֞ה אֶת־אֲבִימֶ֣לֶךְ בֶּן־יְרֻבֶּ֗שֶׁת הֲלֹ֣וא אִשָּׁ֡ה הִשְׁלִ֣יכָה עָלָיו֩ פֶּ֨לַח רֶ֜כֶב מֵעַ֤ל הַֽחֹומָה֙ וַיָּ֣מָת בְּתֵבֵ֔ץ לָ֥מָּה נִגַּשְׁתֶּ֖ם אֶל־הַֽחֹומָ֑ה וְאָ֣מַרְתָּ֔ גַּ֗ם עַבְדְּךָ֛ אֽוּרִיָּ֥ה הַֽחִתִּ֖י מֵֽת׃
10O	11	22		82840	וַיֵּ֖לֶךְ הַמַּלְאָ֑ךְ וַיָּבֹא֙ וַיַּגֵּ֣ד לְדָוִ֔ד אֵ֛ת כָּל־אֲשֶׁ֥ר שְׁלָחֹ֖ו יֹואָֽב׃
10O	11	23		82850	וַיֹּ֤אמֶר הַמַּלְאָךְ֨ אֶל־דָּוִ֔ד כִּי־גָֽבְר֤וּ עָלֵ֨ינוּ֨ הָֽאֲנָשִׁ֔ים וַיֵּֽצְא֥וּ אֵלֵ֖ינוּ הַשָּׂדֶ֑ה וַנִּֽהְיֶ֥ה עֲלֵיהֶ֖ם עַד־פֶּ֥תַח הַשָּֽׁעַר׃
10O	11	24		82860	וַיֹּר֨א֯וּ הַמֹּורִ֤א֯ים אֶל־עֲבָדֶ֨יךָ֙ מֵעַ֣ל הַֽחֹומָ֔ה וַיָּמ֖וּתוּ מֵֽעַבְדֵ֣י הַמֶּ֑לֶךְ וְגַ֗ם עַבְדְּךָ֛ אֽוּרִיָּ֥ה הַֽחִתִּ֖י מֵֽת׃
10O	11	25		82870	וַיֹּ֨אמֶר דָּוִ֜ד אֶל־הַמַּלְאָ֗ךְ כֹּֽה־תֹאמַ֤ר אֶל־יֹואָב֙ אַל־יֵרַ֤ע בְּעֵינֶ֨יךָ֨ אֶת־הַדָּבָ֣ר הַזֶּ֔ה כִּֽי־כָזֹ֥ה וְכָזֶ֖ה תֹּאכַ֣ל הֶחָ֑רֶב הַחֲזֵ֨ק מִלְחַמְתְּךָ֧ אֶל־הָעִ֛יר וְהָרְסָ֖הּ וְחַזְּקֵֽהוּ׃
10O	11	26		82880	וַתִּשְׁמַע֨ אֵ֣שֶׁת אֽוּרִיָּ֔ה כִּי־מֵ֖ת אֽוּרִיָּ֣ה אִישָׁ֑הּ וַתִּסְפֹּ֖ד עַל־בַּעְלָֽהּ׃
10O	11	27		82890	וַיַּֽעֲבֹ֣ר הָאֵ֗בֶל וַיִּשְׁלַ֨ח דָּוִ֜ד וַיַּֽאַסְפָ֤הּ אֶל־בֵּיתֹו֙ וַתְּהִי־לֹ֣ו לְאִשָּׁ֔ה וַתֵּ֥לֶד לֹ֖ו בֵּ֑ן וַיֵּ֧רַע הַדָּבָ֛ר אֲשֶׁר־עָשָׂ֥ה דָוִ֖ד בְּעֵינֵ֥י יְהֺוָֽה׃ ײ
10O	12	1		82900	וַיִּשְׁלַ֧ח יְהֺוָ֛ה אֶת־נָתָ֖ן אֶל־דָּוִ֑ד וַיָּבֹ֣א אֵלָ֗יו וַיֹּ֤אמֶר לֹו֙ שְׁנֵ֣י אֲנָשִׁ֗ים הָיוּ֙ בְּעִ֣יר אֶחָ֔ת אֶחָ֥ד עָשִׁ֖יר וְאֶחָ֥ד רָֽא֯שׁ׃
10O	12	2		82910	לְעָשִׁ֗יר הָיָ֛ה צֹ֥אן וּבָקָ֖ר הַרְבֵּ֥ה מְאֹֽד׃
10O	12	3		82920	וְלָרָ֣שׁ אֵֽין־כֹּ֗ל כִּי֩ אִם־כִּבְשָׂ֨ה אַחַ֤ת קְטַנָּה֨ אֲשֶׁ֣ר קָנָ֔ה וַיְחַיֶּ֕הָ וַתִּגְדַּ֥ל עִמֹּ֛ו וְעִם־בָּנָ֖יו יַחְדָּ֑ו מִפִּתֹּ֨ו תֹאכַ֜ל וּמִכֹּסֹ֤ו תִשְׁתֶּה֙ וּבְחֵיקֹ֣ו תִשְׁכָּ֔֯ב וַתְּהִי־לֹ֖ו כְּבַֽת׃
10O	12	4		82930	וַיָּבֹ֣א הֵלֶךְ֮ לְאִ֣ישׁ הֶֽעָשִׁיר֒ וַיַּחְמֹ֗ל לָקַ֤חַת מִצֹּאנֹו֙ וּמִבְּקָרֹ֔ו לַֽעֲשֹׂ֕ות לָֽאֹרֵ֖חַ הַבָּ֣א לֹ֑ו וַיִּקַּ֗ח אֶת־כִּבְשַׂת֙ הָאִ֣ישׁ הָרָ֔א֯שׁ וַיַּֽעֲשֶׂ֕הָ לָאִ֖ישׁ הַבָּ֥א אֵלָֽיו׃
10O	12	5		82940	וַיִּֽחַר־אַ֥ף דָּוִ֛ד בָּאִ֖ישׁ מְאֹ֑ד וַיֹּ֨אמֶר֨ אֶל־נָתָ֔ן חַי־יְהֺוָ֕ה כִּ֣י בֶן־מָ֔וֶת הָאִ֖ישׁ הָֽעֹשֶׂ֥ה זֹֽאת׃
10O	12	6		82950	וְאֶת־הַכִּבְשָׂ֖ה יְשַׁלֵּ֣ם אַרְבַּעְתָּ֑יִם עֵ֗קֶב אֲשֶׁ֤ר עָשָׂה֙ אֶת־הַדָּבָ֣ר הַזֶּ֔ה וְעַ֖ל אֲשֶׁ֥ר לֹֽא־חָמָֽל׃ ױ
10O	12	7		82960	וַיֹּ֧אמֶר נָתָ֛ן אֶל־דָּוִ֖ד אַתָּ֣ה הָאִ֑ישׁ כֹּֽה־אָמַ֨ר יְהֺוָ֜ה אֱלֹהֵ֣י יִשְׂרָאֵ֗ל אָֽנֹכִ֞י מְשַׁחְתִּ֤יךָ לְמֶ֨לֶךְ֨ עַל־יִשְׂרָאֵ֔ל וְאָֽנֹכִ֥י הִצַּלְתִּ֖יךָ מִיַּ֥ד שָׁאֽוּל׃
10O	12	8		82970	וָֽאֶתְּנָ֨ה לְךָ֜ אֶת־בֵּ֣ית אֲדֹנֶ֗יךָ וְאֶת־נְשֵׁ֤י אֲדֹ֙נֶיךָ֨ בְּחֵיקֶ֔ךָ וָֽאֶתְּנָ֣ה לְךָ֔ אֶת־בֵּ֥ית יִשְׂרָאֵ֖ל וִֽיהוּדָ֑ה וְאִ֨ם־מְעָ֔֯ט וְאֹסִ֥פָה לְּךָ֖ כָּהֵ֥נָּה וְכָהֵֽנָּה׃
10O	12	9		82980	מַדּ֜וּעַ בָּזִ֣יתָ ׀ אֶת־דְּבַ֣ר יְהֺוָ֗ה לַֽעֲשֹׂ֣ות הָרַע֮ בְּעֵינָ֯ו֒ אֵ֣ת אֽוּרִיָּ֤ה הַֽחִתִּי֙ הִכִּ֣יתָ בַחֶ֔רֶב וְאֶ֨ת־אִשְׁתֹּ֔ו לָקַ֥חְתָּ לְּךָ֖ לְאִשָּׁ֑ה וְאֹתֹ֣ו הָרַ֔גְתָּ בְּחֶ֖רֶב בְּנֵ֥י עַמֹּֽון׃
10O	12	10		82990	וְעַתָּ֗ה לֹֽא־תָס֥וּר חֶ֛רֶב מִבֵּֽיתְךָ֖ עַד־עֹולָ֑ם עֵ֚קֶב כִּ֣י בְזִתָ֔נִי וַתִּקַּ֗ח אֶת־אֵ֨שֶׁת֨ אֽוּרִיָּ֣ה הַֽחִתִּ֔י לִֽהְיֹ֥ות לְךָ֖ לְאִשָּֽׁה׃ ױ
10O	12	11		83000	כֹּ֣ה ׀ אָמַ֣ר יְהֺוָ֗ה הִֽנְנִי֩ מֵקִ֨ים עָלֶ֤יךָ רָעָה֨ מִבֵּיתֶ֔ךָ וְלָֽקַחְתִּ֤י אֶת־נָשֶׁ֨יךָ֨ לְעֵינֶ֔יךָ וְנָֽתַתִּ֖י לְרֵעֶ֑יךָ וְשָׁכַב֨ עִם־נָשֶׁ֔יךָ לְעֵינֵ֖י הַשֶּׁ֥מֶשׁ הַזֹּֽאת׃
10O	12	12		83010	כִּ֥י אַתָּ֖ה עָשִׂ֣יתָ בַסָּ֑תֶר וַֽאֲנִ֗י אֶֽעֱשֶׂה֙ אֶת־הַדָּבָ֣ר הַזֶּ֔ה נֶ֥גֶד כָּל־יִשְׂרָאֵ֖ל וְנֶ֥גֶד הַשָּֽׁמֶשׁ׃ ױ
10O	12	13		83020	וַיֹּ֤אמֶר דָּוִד֙ אֶל־נָתָ֔ן חָטָ֖אתִי לַֽיהֺוָ֑ה ױ֯ וַיֹּ֨אמֶר נָתָ֜ן אֶל־דָּוִ֗ד גַּם־יְהֺוָ֛ה הֶֽעֱבִ֥יר חַטָּֽאתְךָ֖ לֹ֥א תָמֽוּת׃
10O	12	14		83030	אֶ֗פֶס כִּֽי־נִאֵ֤ץ נִאַ֙צְתָּ֨ אֶת־אֹֽיְבֵ֣י יְהֺוָ֔ה בַּדָּבָ֖ר הַזֶּ֑ה גַּ֗ם הַבֵּ֛ן הַיִּלֹּ֥וד לְךָ֖ מֹ֥ות יָמֽוּת׃
10O	12	15		83040	וַיֵּ֥לֶךְ נָתָ֖ן אֶל־בֵּיתֹ֑ו וַיִּגֹּ֨ף יְהֺוָ֜ה אֶת־הַיֶּ֗לֶד אֲשֶׁ֨ר יָֽלְדָ֧ה אֵֽשֶׁת־אֽוּרִיָּ֛ה לְדָוִ֖ד וַיֵּֽאָנַֽ֯שׁ׃
10O	12	16		83050	וַיְבַקֵּ֥שׁ דָּוִ֛ד אֶת־הָֽאֱלֹהִ֖ים בְּעַ֣ד הַנָּ֑עַר וַיָּ֤צָם דָּוִד֨ צֹ֔ום וּבָ֥א וְלָ֖ן וְשָׁכַ֥ב אָֽרְצָה׃
10O	12	17		83060	וַיָּקֻ֜מוּ זִקְנֵ֤י בֵיתֹו֙ עָלָ֔יו לַֽהֲקִימֹ֖ו מִן־הָאָ֑רֶץ וְלֹ֣א אָבָ֔ה וְלֹֽא־בָרָ֥ה אִתָּ֖ם לָֽחֶם׃
10O	12	18		83070	וַיְהִ֛י בַּיֹּ֥ום הַשְּׁבִיעִ֖י וַיָּ֣מָת הַיָּ֑לֶד וַיִּֽרְאוּ֩ עַבְדֵ֨י דָוִ֜ד לְהַגִּֽיד־לֹ֣ו ׀ כִּי־מֵ֣ת הַיֶּ֗לֶד כִּ֤י אָֽמְרוּ֙ הִנֵּה֩ בִֽהְיֹ֨ות הַיֶּ֜לֶד חַ֗י דִּבַּ֤רְנוּ אֵלָיו֙ וְלֹֽא־שָׁמַ֣ע בְּקֹולֵ֔נוּ וְאֵ֨יךְ נֹאמַ֥ר אֵלָ֛יו מֵ֥ת הַיֶּ֖לֶד וְעָשָׂ֥ה רָעָֽה׃
10O	12	19		83080	וַיַּ֣רְא דָּוִ֗ד כִּ֤י עֲבָדָיו֙ מִתְלַֽחֲשִׁ֔ים וַיָּ֥בֶן דָּוִ֖ד כִּי־מֵ֣ת הַיָּ֑לֶד וַיֹּ֨אמֶר דָּוִ֧ד אֶל־עֲבָדָ֛יו הֲמֵ֥ת הַיֶּ֖לֶד וַיֹּ֥אמְרוּ מֵֽת׃
10O	12	20		83090	וַיָּקָם֩ דָּוִ֨ד מֵֽהָאָ֜רֶץ וַיִּרְחַ֣ץ וַיָּ֗סֶךְ וַיְחַלֵּף֙ שִׂמְלֹתָ֔ו֯ וַיָּבֹ֥א בֵֽית־יְהֺוָ֖ה וַיִּשְׁתָּ֑חוּ וַיָּבֹא֨ אֶל־בֵּיתֹ֔ו וַיִּשְׁאַ֕ל וַיָּשִׂ֥ימוּ לֹ֛ו לֶ֖חֶם וַיֹּאכַֽל׃
10O	12	21		83100	וַיֹּֽאמְר֤וּ עֲבָדָיו֨ אֵלָ֔יו מָ֛ה הַדָּבָ֥ר הַזֶּ֖ה אֲשֶׁ֣ר עָשִׂ֑יתָה בַּֽעֲב֞וּר הַיֶּ֤לֶד חַי֙ צַ֣מְתָּ וַתֵּ֔בְךְּ וְכַֽאֲשֶׁר֨ מֵ֣ת הַיֶּ֔לֶד קַ֖מְתָּ וַתֹּ֥אכַל לָֽחֶם׃
10O	12	22		83110	וַיֹּ֕אמֶר בְּעֹוד֨ הַיֶּ֣לֶד חַ֔י צַ֖מְתִּי וָֽאֶבְכֶּ֑ה כִּ֤י אָמַ֨רְתִּי֨ מִ֣י יֹודֵ֔עַ יְ֯חַנַּ֥נִי יְהֺוָ֖ה וְחַ֥י הַיָּֽלֶד׃
10O	12	23		83120	וְעַתָּ֣ה ׀ מֵ֗ת לָ֤מָּה זֶּה֨ אֲנִ֣י צָ֔ם הַֽאוּכַ֥ל לַֽהֲשִׁיבֹ֖ו עֹ֑וד אֲנִי֨ הֹלֵ֣ךְ אֵלָ֔יו וְה֖וּא לֹֽא־יָשׁ֥וּב אֵלָֽי׃
10O	12	24		83130	וַיְנַחֵ֣ם דָּוִ֗ד אֵ֚ת בַּת־שֶׁ֣בַע אִשְׁתֹּ֔ו וַיָּבֹ֥א אֵלֶ֖יהָ וַיִּשְׁכַּ֣ב עִמָּ֑הּ וַתֵּ֣לֶד בֵּ֗ן וַיִּ֯קְרָ֤א אֶת־שְׁמֹו֙ שְׁלֹמֹ֔ה וַֽיהֺוָ֖ה אֲהֵבֹֽו׃ 
10O	12	25		83140	וַיִּשְׁלַ֗ח בְּיַד֨ נָתָ֣ן הַנָּבִ֔יא וַיִּקְרָ֥א אֶת־שְׁמֹ֖ו יְדִ֣ידְיָ֑הּ בַּֽעֲב֖וּר יְהֺוָֽה׃ ױ
10O	12	26		83150	וַיִּלָּ֣חֶם יֹואָ֔ב בְּרַבַּ֖ת בְּנֵ֣י עַמֹּ֑ון וַיִּלְכֹּ֖ד אֶת־עִ֥יר הַמְּלוּכָֽה׃
10O	12	27		83160	וַיִּשְׁלַ֥ח יֹואָ֛ב מַלְאָכִ֖ים אֶל־דָּוִ֑ד וַיֹּ֨אמֶר֨ נִלְחַ֣מְתִּי בְרַבָּ֔ה גַּם־לָכַ֖דְתִּי אֶת־עִ֥יר הַמָּֽיִם׃
10O	12	28		83170	וְעַתָּ֗ה אֱסֹף֨ אֶת־יֶ֣תֶר הָעָ֔ם וַֽחֲנֵ֥ה עַל־הָעִ֖יר וְלָכְדָ֑הּ פֶּן־אֶלְכֹּ֤ד אֲנִי֙ אֶת־הָעִ֔יר וְנִקְרָ֥א שְׁמִ֖י עָלֶֽיהָ׃
10O	12	29		83180	וַיֶּֽאֱסֹ֥ף דָּוִ֛ד אֶת־כָּל־הָעָ֖ם וַיֵּ֣לֶךְ רַבָּ֑תָה וַיִּלָּ֥חֶם בָּ֖הּ וַֽיִּלְכְּדָֽהּ׃
10O	12	30		83190	וַיִּקַּ֣ח אֶת־עֲטֶ֣רֶת מַלְכָּם֩ מֵעַ֨ל רֹאשֹׁ֜ו וּמִשְׁקָלָ֗הּ כִּכַּ֤ר זָהָב֙ וְאֶ֣בֶן יְקָרָ֔ה וַתְּהִ֖י עַל־רֹ֣אשׁ דָּוִ֑ד וּשְׁלַ֥ל הָעִ֛יר הֹוצִ֖יא הַרְבֵּ֥ה מְאֹֽד׃
10O	12	31		83200	וְאֶת־הָעָ֨ם אֲשֶׁר־בָּ֜הּ הֹוצִ֗יא וַיָּ֣שֶׂם בַּ֠מְּגֵרָה וּבַֽחֲרִצֵ֨י הַבַּרְזֶ֜ל וּבְמַגְזְרֹ֣ת הַבַּרְזֶ֗ל וְהֶֽעֱבִ֤יר אֹותָם֙ בַּמַּלְכֵּ֔ן֯ וְכֵ֣ן יַֽעֲשֶׂ֔ה לְכֹ֖ל עָרֵ֣י בְנֵֽי־עַמֹּ֑ון וַיָּ֧שָׁב דָּוִ֛ד וְכָל־הָעָ֖ם יְרֽוּשָׁלִָֽם׃ ײ
10O	13	1		83210	וַיְהִ֣י אַֽחֲרֵי־כֵ֗ן וּלְאַבְשָׁלֹ֧ום בֶּן־דָּוִ֛ד אָחֹ֥ות יָפָ֖ה וּשְׁמָ֣הּ תָּמָ֑ר וַיֶּֽאֱהָבֶ֖הָ אַמְנֹ֥ון בֶּן־דָּוִֽד׃
10O	13	2		83220	וַיֵּ֨צֶר לְאַמְנֹ֜ון לְהִתְחַלֹּ֗ות בַּֽעֲבוּר֨ תָּמָ֣ר אֲחֹתֹ֔ו כִּ֥י בְתוּלָ֖ה הִ֑יא וַיִּפָּלֵא֨ בְּעֵינֵ֣י אַמְנֹ֔ון לַֽעֲשֹׂ֥ות לָ֖הּ מְאֽוּמָה׃
10O	13	3		83230	וּלְאַמְנֹ֣ון רֵ֗עַ וּשְׁמֹו֙ יֹֽונָדָ֔ב בֶּן־שִׁמְעָ֖ה אֲחִ֣י דָוִ֑ד וְיֹ֣ונָדָ֔ב אִ֥ישׁ חָכָ֖ם מְאֹֽד׃
10O	13	4		83240	וַיֹּ֣אמֶר לֹ֗ו מַדּ֣וּעַ אַ֠תָּה כָּ֣כָה דַּ֤ל בֶּן־הַמֶּ֨לֶךְ֨ בַּבֹּ֣קֶר בַּבֹּ֔קֶר הֲלֹ֖וא תַּגִּ֣יד לִ֑י וַיֹּ֤אמֶר לֹו֙ אַמְנֹ֔ון אֶת־תָּמָ֗ר אֲחֹ֛ות אַבְשָׁלֹ֥ם אָחִ֖י אֲנִ֥י אֹהֵֽב׃
10O	13	5		83250	וַיֹּ֤אמֶר לֹו֙ יְהֹ֣ונָדָ֔ב שְׁכַ֥ב עַל־מִשְׁכָּֽבְךָ֖ וְהִתְחָ֑ל וּבָ֧א אָבִ֣יךָ לִרְאֹותֶ֗ךָ וְאָֽמַרְתָּ֣ אֵלָ֡יו תָּ֣בֹא נָא֩ תָמָ֨ר אֲחֹותִ֜י וְתַבְרֵ֣נִי לֶ֗חֶם וְעָֽשְׂתָ֤ה לְעֵינַי֙ אֶת־הַבִּרְיָ֔ה לְמַ֨עַן֨ אֲשֶׁ֣ר אֶרְאֶ֔ה וְאָֽכַלְתִּ֖י מִיָּדָֽהּ׃
10O	13	6		83260	וַיִּשְׁכַּ֥ב אַמְנֹ֖ון וַיִּתְחָ֑ל וַיָּבֹ֨א הַמֶּ֜לֶךְ לִרְאֹותֹ֗ו וַיֹּ֨אמֶר אַמְנֹ֤ון אֶל־הַמֶּ֨לֶךְ֨ תָּֽבֹוא־נָ֞א תָּמָ֣ר אֲחֹותִ֗י וּתְלַבֵּ֤ב לְעֵינַי֙ שְׁתֵּ֣י לְבִבֹ֔ות וְאֶבְרֶ֖ה מִיָּדָֽהּ׃
10O	13	7		83270	וַיִּשְׁלַ֥ח דָּוִ֛ד אֶל־תָּמָ֖ר הַבַּ֣יְתָה לֵאמֹ֑ר לְכִ֣י נָ֗א בֵּ֚ית אַמְנֹ֣ון אָחִ֔יךְ וַֽעֲשִׂי־לֹ֖ו הַבִּרְיָֽה׃
10O	13	8		83280	וַתֵּ֣לֶךְ תָּמָ֗ר בֵּ֛ית אַמְנֹ֥ון אָחִ֖יהָ וְה֣וּא שֹׁכֵ֑ב וַתִּקַּ֨ח אֶת־הַבָּצֵ֤ק וַתָּ֨לָו֯שׁ֨ וַתְּלַבֵּ֣ב לְעֵינָ֔יו וַתְּבַשֵּׁ֖ל אֶת־הַלְּבִבֹֽות׃
10O	13	9		83290	וַתִּקַּ֤ח אֶת־הַמַּשְׂרֵת֨ וַתִּצֹ֣ק לְפָנָ֔יו וַיְמָאֵ֖ן לֶֽאֱכֹ֑ול וַיֹּ֣אמֶר אַמְנֹ֗ון הֹוצִ֤יאוּ כָל־אִישׁ֙ מֵֽעָלַ֔י וַיֵּֽצְא֥וּ כָל־אִ֖ישׁ מֵֽעָלָֽיו׃
10O	13	10		83300	וַיֹּ֨אמֶר אַמְנֹ֜ון אֶל־תָּמָ֗ר הָבִ֤יאִי הַבִּרְיָה֨ הַחֶדֶ֔ר וְאֶבְרֶ֖ה מִיָּדֵ֑ךְ וַתִּקַּ֣ח תָּמָ֗ר אֶת־הַלְּבִבֹות֨ אֲשֶׁ֣ר עָשָׂ֔תָ֯ה וַתָּבֵ֛א לְאַמְנֹ֥ון אָחִ֖יהָ הֶחָֽדְרָה׃
10O	13	11		83310	וַתַּגֵּ֥שׁ אֵלָ֖יו לֶֽאֱכֹ֑ל וַיַּֽחֲזֶק־בָּהּ֙ וַיֹּ֣אמֶר לָ֔הּ בֹּ֛ואִי שִׁכְבִ֥י עִמִּ֖י אֲחֹותִֽי׃
10O	13	12		83320	וַתֹּ֣אמֶר לֹ֗ו אַל־אָחִי֙ אַל־תְּעַנֵּ֔נִי כִּ֛י לֹא־יֵֽעָשֶׂ֥ה כֵ֖ן בְּיִשְׂרָאֵ֑ל אַֽל־תַּעֲשֵׂ֖֯ה אֶת־הַנְּבָלָ֥ה הַזֹּֽאת׃
10O	13	13		83330	וַֽאֲנִ֗י אָ֤נָה אֹולִיךְ֨ אֶת־חֶרְפָּתִ֔י וְאַתָּ֗ה תִּֽהְיֶ֛ה כְּאַחַ֥ד הַנְּבָלִ֖ים בְּיִשְׂרָאֵ֑ל וְעַתָּה֨ דַּבֶּר־נָ֣א אֶל־הַמֶּ֔לֶךְ כִּ֛י לֹ֥א יִמְנָעֵ֖נִי מִמֶּֽךָּ׃
10O	13	14		83340	וְלֹ֥א אָבָ֖ה לִשְׁמֹ֣עַ בְּקֹולָ֑הּ וַיֶּֽחֱזַ֤ק מִמֶּ֨נָּה֨ וַיְעַנֶּ֔הָ וַיִּשְׁכַּ֖ב אֹתָֽהּ׃
10O	13	15		83350	וַיִּשְׂנָאֶ֣הָ אַמְנֹ֗ון שִׂנְאָ֤ה גְּדֹולָה֨ מְאֹ֔ד כִּ֣י גְדֹולָ֗ה הַשִּׂנְאָה֨ אֲשֶׁ֣ר שְׂנֵאָ֔הּ מֵאַֽהֲבָ֖ה אֲשֶׁ֣ר אֲהֵבָ֑הּ וַיֹּֽאמֶר־לָ֥הּ אַמְנֹ֖ון ק֥וּמִי לֵֽכִי׃
10O	13	16		83360	וַתֹּ֣אמֶר לֹ֗ו אַל־אֹודֹ֞ת הָֽרָעָ֤ה הַגְּדֹולָה֨ הַזֹּ֔את מֵֽאַחֶ֛רֶת אֲשֶׁר־עָשִׂ֥יתָ עִמִּ֖י לְשַׁלְּחֵ֑נִי וְלֹ֥א אָבָ֖ה לִשְׁמֹ֥עַ לָֽהּ׃
10O	13	17		83370	וַיִּקְרָ֗א אֶת־נַֽעֲרֹו֙ מְשָׁ֣רְתֹ֔ו וַיֹּ֕אמֶר שִׁלְחוּ־נָ֥א אֶת־זֹ֛את מֵֽעָלַ֖י הַח֑וּצָה וּנְעֹ֥ל הַדֶּ֖לֶת אַֽחֲרֶֽיהָ׃
10O	13	18		83380	וְעָלֶ֨יהָ֨ כְּתֹ֣נֶת פַּסִּ֔ים כִּי֩ כֵ֨ן תִּלְבַּ֧שְׁןָ בְּנֹֽות־הַמֶּ֛לֶךְ הַבְּתוּלֹ֖ת מְעִילִ֑ים וַיֹּצֵ֨א אֹותָ֤הּ מְשָֽׁרְתֹו֙ הַח֔וּץ וְנָעַ֥ל הַדֶּ֖לֶת אַֽחֲרֶֽיהָ׃
10O	13	19		83390	וַתִּקַּ֨ח תָּמָ֥ר אֵ֨פֶר֨ עַל־רֹאשָׁ֔הּ וּכְתֹ֧נֶת הַפַּסִּ֛ים אֲשֶׁ֥ר עָלֶ֖יהָ קָרָ֑עָה וַתָּ֤שֶׂם יָדָהּ֙ עַל־רֹאשָׁ֔הּ וַתֵּ֥לֶךְ הָלֹ֖וךְ וְזָעָֽקָה׃
10O	13	20		83400	וַיֹּ֨אמֶר אֵלֶ֜יהָ אַבְשָׁלֹ֣ום אָחִ֗יהָ הַֽאֲמִינֹ֣ון אָחִיךְ֮ הָיָ֣ה עִמָּךְ֒ וְעַתָּ֞ה אֲחֹותִ֤י הַֽחֲרִ֨ישִׁי֨ אָחִ֣יךְ ה֔וּא אַל־תָּשִׁ֥יתִי אֶת־לִבֵּ֖ךְ לַדָּבָ֣ר הַזֶּ֑ה וַתֵּ֤שֶׁב תָּמָר֨ וְשֹׁ֣מֵמָ֔ה בֵּ֖ית אַבְשָׁלֹ֥ום אָחִֽיהָ׃
10O	13	21		83410	וְהַמֶּ֣לֶךְ דָּוִ֔ד שָׁמַ֕ע אֵ֥ת כָּל־הַדְּבָרִ֖ים הָאֵ֑לֶּה וַיִּ֥חַר לֹ֖ו מְאֹֽד׃
10O	13	22		83420	וְלֹֽא־דִבֶּ֧ר אַבְשָׁלֹ֛ום עִם־אַמְנֹ֖ון לְמֵרָ֣ע וְעַד־טֹ֑וב כִּֽי־שָׂנֵ֤א אַבְשָׁלֹום֨ אֶת־אַמְנֹ֔ון עַל־דְּבַר֨ אֲשֶׁ֣ר עִנָּ֔ה אֵ֖ת תָּמָ֥ר אֲחֹתֹֽו׃ ױ
10O	13	23		83430	וַֽיְהִי֙ לִשְׁנָתַ֣יִם יָמִ֔ים וַיִּֽהְי֤וּ גֹֽזְזִים֨ לְאַבְשָׁלֹ֔ום בְּבַ֥עַל חָצֹ֖ור אֲשֶׁ֣ר עִם־אֶפְרָ֑יִם וַיִּקְרָ֥א אַבְשָׁלֹ֖ום לְכָל־בְּנֵ֥י הַמֶּֽלֶךְ׃
10O	13	24		83440	וַיָּבֹ֤א אַבְשָׁלֹום֨ אֶל־הַמֶּ֔לֶךְ וַיֹּ֕אמֶר הִנֵּה־נָ֥א גֹֽזְזִ֖ים לְעַבְדֶּ֑ךָ יֵֽלֶךְ־נָ֥א הַמֶּ֛לֶךְ וַֽעֲבָדָ֖יו עִם־עַבְדֶּֽךָ׃
10O	13	25		83450	וַיֹּ֨אמֶר הַמֶּ֜לֶךְ אֶל־אַבְשָׁלֹ֗ום אַל־בְּנִי֙ אַל־נָ֤א נֵלֵךְ֨ כֻּלָּ֔נוּ וְלֹ֥א נִכְבַּ֖ד עָלֶ֑יךָ וַיִּפְרָץ־בֹּ֛ו וְלֹֽא־אָבָ֥ה לָלֶ֖כֶת וַיְבָֽרְכֵֽהוּ׃
10O	13	26		83460	וַ֙יֹּאמֶר֨ אַבְשָׁלֹ֔ום וָלֹ֕א יֵֽלֶךְ־נָ֥א אִתָּ֖נוּ אַמְנֹ֣ון אָחִ֑י וַיֹּ֤אמֶר לֹו֙ הַמֶּ֔לֶךְ לָ֥מָּה יֵלֵ֖ךְ עִמָּֽךְ׃
10O	13	27		83470	וַיִּפְרָץ־בֹּ֖ו אַבְשָׁלֹ֑ום וַיִּשְׁלַ֤ח אִתֹּו֙ אֶת־אַמְנֹ֔ון וְאֵ֖ת כָּל־בְּנֵ֥י הַמֶּֽלֶךְ׃ 
10O	13	28		83480	וַיְצַו֩ אַבְשָׁלֹ֨ום אֶת־נְעָרָ֜יו לֵאמֹ֗ר רְאוּ־נָ֠א כְּטֹ֨וב לֵֽב־אַמְנֹ֤ון בַּיַּ֙יִן֨ וְאָֽמַרְתִּ֨י אֲלֵיכֶ֜ם הַכּ֧וּ אֶת־אַמְנֹ֛ון וַֽהֲמִתֶּ֥ם אֹתֹ֖ו אַל־תִּירָ֑אוּ הֲלֹ֗וא כִּ֤י אָֽנֹכִי֙ צִוִּ֣יתִי אֶתְכֶ֔ם חִזְק֖וּ וִֽהְי֥וּ לִבְנֵי־חָֽיִל׃
10O	13	29		83490	וַיַּֽעֲשׂ֞וּ נַֽעֲרֵ֤י אַבְשָׁלֹום֙ לְאַמְנֹ֔ון כַּֽאֲשֶׁ֥ר צִוָּ֖ה אַבְשָׁלֹ֑ום וַיָּקֻ֣מוּ ׀ כָּל־בְּנֵ֣י הַמֶּ֗לֶךְ וַיִּרְכְּב֛וּ אִ֥ישׁ עַל־פִּרְדֹּ֖ו וַיָּנֻֽסוּ׃
10O	13	30		83500	וַיְהִי֙ הֵ֣מָּה בַדֶּ֔רֶךְ וְהַשְּׁמֻעָ֣ה בָ֔אָה אֶל־דָּוִ֖ד לֵאמֹ֑ר הִכָּ֤ה אַבְשָׁלֹום֨ אֶת־כָּל־בְּנֵ֣י הַמֶּ֔לֶךְ וְלֹֽא־נֹותַ֥ר מֵהֶ֖ם אֶחָֽד׃
10O	13	31		83510	וַיָּ֧קָם הַמֶּ֛לֶךְ וַיִּקְרַ֥ע אֶת־בְּגָדָ֖יו וַיִּשְׁכַּ֣ב אָ֑רְצָה וְכָל־עֲבָדָ֥יו נִצָּבִ֖ים קְרֻעֵ֥י בְגָדִֽים׃
10O	13	32		83520	וַיַּ֡עַן יֹֽונָדָ֣ב ׀ בֶּן־שִׁמְעָ֨ה אֲחִֽי־דָוִ֜ד וַיֹּ֗אמֶר אַל־יֹאמַ֤ר אֲדֹנִי֨ אֵ֣ת כָּל־הַנְּעָרִ֤ים בְּנֵֽי־הַמֶּ֨לֶךְ֨ הֵמִ֔יתוּ כִּֽי־אַמְנֹ֥ון לְבַדֹּ֖ו מֵ֑ת כִּֽי־עַל־פִּ֤י אַבְשָׁלֹום֙ הָיְתָ֣ה שׂיּ֯מָ֔ה מִיֹּום֙ עַנֹּתֹ֔ו אֵ֖ת תָּמָ֥ר אֲחֹתֹֽו׃
10O	13	33		83530	וְעַתָּ֡ה אַל־יָשֵׂם֩ אֲדֹנִ֨י הַמֶּ֤לֶךְ אֶ֯ל־לִבֹּו֙ דָּבָ֣ר לֵאמֹ֔ר כָּל־בְּנֵ֥י הַמֶּ֖לֶךְ מֵ֑תוּ כִּֽ־א֯ם אַמְנֹ֥ון לְבַדֹּ֖ו מֵֽת׃
10O	13	34		83540	וַיִּבְרַ֖ח אַבְשָׁלֹ֑ום וַיִּשָּׂ֞א הַנַּ֤עַר הַצֹּפֶה֨ אֶת־עֵינָ֔ו֯ וַיַּ֗רְא וְהִנֵּ֨ה עַם־רַ֜ב הֹֽלְכִ֥ים מִדֶּ֛רֶךְ אַֽחֲרָ֖יו מִצַּ֥ד הָהָֽר׃
10O	13	35		83550	וַיֹּ֤אמֶר יֹֽונָדָב֨ אֶל־הַמֶּ֔לֶךְ הִנֵּ֥ה בְנֵֽי־הַמֶּ֖לֶךְ בָּ֑אוּ כִּדְבַ֥ר עַבְדְּךָ֖ כֵּ֥ן הָיָֽה׃
10O	13	36		83560	וַיְהִ֣י ׀ כְּכַלֹּתֹ֣ו לְדַבֵּ֗ר וְהִנֵּ֤ה בְנֵֽי־הַמֶּ֨לֶךְ֨ בָּ֔אוּ וַיִּשְׂא֥וּ קֹולָ֖ם וַיִּבְכּ֑וּ וְגַם־הַמֶּ֨לֶךְ֨ וְכָל־עֲבָדָ֔יו בָּכ֕וּ בְּכִ֖י גָּדֹ֥ול מְאֹֽד׃
10O	13	37		83570	וְאַבְשָׁלֹ֣ום בָּרַ֔ח וַיֵּ֛לֶךְ אֶל־תַּלְמַ֥י בֶּן־עַמִּיח֖֯וּר מֶ֣לֶךְ גְּשׁ֑וּר וַיִּתְאַבֵּ֥ל עַל־בְּנֹ֖ו כָּל־הַיָּמִֽים׃
10O	13	38		83580	וְאַבְשָׁלֹ֥ום בָּרַ֖ח וַיֵּ֣לֶךְ גְּשׁ֑וּר וַֽיְהִי־שָׁ֖ם שָׁל֥שׁ שָׁנִֽים׃
10O	13	39		83590	וַתְּכַל֨ דָּוִ֣ד הַמֶּ֔לֶךְ לָצֵ֖את אֶל־אַבְשָׁלֹ֑ום כִּֽי־נִחַ֥ם עַל־אַמְנֹ֖ון כִּֽי־מֵֽת׃ ײ
10O	14	1		83600	וַיֵּ֖דַע יֹואָ֣ב בֶּן־צְרֻיָ֑ה כִּי־לֵ֥ב הַמֶּ֖לֶךְ עַל־אַבְשָׁלֹֽום׃
10O	14	2		83610	וַיִּשְׁלַ֤ח יֹואָב֙ תְּקֹ֔ועָה וַיִּקַּ֥ח מִשָּׁ֖ם אִשָּׁ֣ה חֲכָמָ֑ה וַיֹּ֣אמֶר אֵ֠לֶיהָ הִתְאַבְּלִי־נָ֞א וְלִבְשִׁי־נָ֣א בִגְדֵי־אֵ֗בֶל וְאַל־תָּס֨וּכִי֨ שֶׁ֔מֶן וְהָיִ֕ית כְּאִשָּׁ֗ה זֶ֚ה יָמִ֣ים רַבִּ֔ים מִתְאַבֶּ֖לֶת עַל־מֵֽת׃
10O	14	3		83620	וּבָאת֙ אֶל־הַמֶּ֔לֶךְ וְדִבַּ֥רְתְּ אֵלָ֖יו כַּדָּבָ֣ר הַזֶּ֑ה וַיָּ֧שֶׂם יֹואָ֛ב אֶת־הַדְּבָרִ֖ים בְּפִֽיהָ׃
10O	14	4		83630	וַ֠תֹּאמֶר הָֽאִשָּׁ֤ה הַתְּקֹעִית֨ אֶל־הַמֶּ֔לֶךְ וַתִּפֹּ֧ל עַל־אַפֶּ֛יהָ אַ֖רְצָה וַתִּשְׁתָּ֑חוּ וַתֹּ֖אמֶר הֹושִׁ֥עָה הַמֶּֽלֶךְ׃ ײ
10O	14	5		83640	וַיֹּֽאמֶר־לָ֥הּ הַמֶּ֖לֶךְ מַה־לָּ֑ךְ וַתֹּ֗אמֶר אֲבָ֛ל אִשָּֽׁה־אַלְמָנָ֥ה אָ֖נִי וַיָּ֥מָת אִישִֽׁי׃
10O	14	6		83650	וּלְשִׁפְחָֽתְךָ֨ שְׁנֵ֣י בָנִ֔ים וַיִּנָּצ֤וּ שְׁנֵיהֶם֙ בַּשָּׂדֶ֔ה וְאֵ֥ין מַצִּ֖יל בֵּֽינֵיהֶ֑ם וַיַּכֹּ֧ו הָֽאֶחָ֛ד אֶת־הָֽאֶחָ֖ד וַיָּ֥מֶת אֹתֹֽו׃
10O	14	7		83660	וְהִנֵּה֩ קָ֨מָה כָל־הַמִּשְׁפָּחָ֜ה עַל־שִׁפְחָתֶ֗ךָ וַיֹּֽאמְרוּ֙ תְּנִ֣י ׀ אֶת־מַכֵּ֣ה אָחִ֗יו וּנְמִתֵ֨הוּ֨ בְּנֶ֤פֶשׁ אָחִיו֙ אֲשֶׁ֣ר הָרָ֔֯ג וְנַשְׁמִ֖ידָה גַּ֣ם אֶת־הַיֹּורֵ֑שׁ וְכִבּ֗וּ אֶת־גַּֽחַלְתִּי֨ אֲשֶׁ֣ר נִשְׁאָ֔רָה לְבִלְתִּ֧י שִֽׂו֯ם־לְאִישִׁ֛י שֵׁ֥ם וּשְׁאֵרִ֖ית עַל־פְּנֵ֥י הָֽאֲדָמָֽה׃ ױ
10O	14	8		83670	וַיֹּ֧אמֶר הַמֶּ֛לֶךְ אֶל־הָֽאִשָּׁ֖ה לְכִ֣י לְבֵיתֵ֑ךְ וַֽאֲנִ֖י אֲצַוֶּ֥ה עָלָֽיִךְ׃
10O	14	9		83680	וַתֹּ֜אמֶר הָֽאִשָּׁ֤ה הַתְּקֹועִית֨ אֶל־הַמֶּ֔לֶךְ עָלַ֞י אֲדֹנִ֥י הַמֶּ֛לֶךְ הֶֽעָֺו֖ן וְעַל־בֵּ֣ית אָבִ֑י וְהַמֶּ֥לֶךְ וְכִסְאֹ֖ו נָקִֽי׃ ױ
10O	14	10		83690	וַיֹּ֖אמֶר הַמֶּ֑לֶךְ הַֽמְדַבֵּ֤ר אֵלַ֨יִךְ֨ וַֽהֲבֵאתֹ֣ו אֵלַ֔י וְלֹֽא־יֹסִ֥יף עֹ֖וד לָגַ֥עַת בָּֽךְ׃
10O	14	11		83700	וַתֹּאמֶר֩ יִזְכָּר־נָ֨א הַמֶּ֜לֶךְ אֶת־יְהֺוָ֣ה אֱלֹהֶ֗יךָ מֵֽהַרְבַּ֞י֯ת גֹּאֵ֤ל הַדָּם֨ לְשַׁחֵ֔ת וְלֹ֥א יַשְׁמִ֖ידוּ אֶת־בְּנִ֑י וַיֹּ֨אמֶר֨ חַי־יְהֺוָ֔ה אִם־יִפֹּ֛ל מִשַּֽׂעֲרַ֥ת בְּנֵ֖ךְ אָֽרְצָה׃
10O	14	12		83710	וַתֹּ֨אמֶר֨ הָֽאִשָּׁ֔ה תְּדַבֶּר־נָ֧א שִׁפְחָֽתְךָ֛ אֶל־אֲדֹנִ֥י הַמֶּ֖לֶךְ דָּבָ֑ר וַיֹּ֖אמֶר דַּבֵּֽרִי׃
10O	14	13		83720	וַתֹּ֨אמֶר֨ הָֽאִשָּׁ֔ה וְלָ֧מָּה חָשַׁ֛בְתָּה כָּזֹ֖את עַל־עַ֣ם אֱלֹהִ֑ים וּמִדַּבֵּ֨ר הַמֶּ֙לֶךְ הַדָּבָ֤ר הַזֶּה֙ כְּאָשֵׁ֔ם לְבִלְתִּ֛י הָשִׁ֥יב הַמֶּ֖לֶךְ אֶֽת־נִדְּחֹֽו׃
10O	14	14		83730	כִּי־מֹ֣ות נָמ֔וּת וְכַמַּ֨יִם֨ הַנִּגָּרִ֣ים אַ֔רְצָה אֲשֶׁ֖ר לֹ֣א יֵֽאָסֵ֑פוּ וְלֹֽא־יִשָּׂ֤א אֱלֹהִים֨ נֶ֔פֶשׁ וְחָשַׁב֨ מַֽחֲשָׁבֹ֔ות לְבִלְתִּ֛י יִדַּ֥ח מִמֶּ֖נּוּ נִדָּֽח׃
10O	14	15		83740	וְ֠עַתָּה אֲשֶׁר־בָּ֙אתִי לְדַבֵּ֨ר אֶל־הַמֶּ֤לֶךְ אֲדֹנִי֙ אֶת־הַדָּבָ֣ר הַזֶּ֔ה כִּ֥י יֵֽרְאֻ֖נִי הָעָ֑ם וַתֹּ֤אמֶר שִׁפְחָֽתְךָ֨ אֲדַבְּרָה־נָּ֣א אֶל־הַמֶּ֔לֶךְ אוּלַ֛י יַֽעֲשֶׂ֥ה הַמֶּ֖לֶךְ אֶת־דְּבַ֥ר אֲמָתֹֽו׃
10O	14	16		83750	כִּ֚י יִשְׁמַ֣ע הַמֶּ֔לֶךְ לְהַצִּ֥יל אֶת־אֲמָתֹ֖ו מִכַּ֣ף הָאִ֑ישׁ לְהַשְׁמִ֨יד אֹתִ֤י וְאֶת־בְּנִי֨ יַ֔חַד מִנַּֽחֲלַ֖ת אֱלֹהִֽים׃
10O	14	17		83760	וַתֹּ֨אמֶר֙ שִׁפְחָ֣תְךָ֔ יִֽהְיֶה־נָּ֛א דְּבַר־אֲדֹנִ֥י הַמֶּ֖לֶךְ לִמְנֻחָ֑ה כִּ֣י ׀ כְּמַלְאַ֣ךְ הָֽאֱלֹהִ֗ים כֵּ֣ן אֲדֹנִ֤י הַמֶּ֨לֶךְ֨ לִשְׁמֹעַ֨ הַטֹּ֣וב וְהָרָ֔ע וַֽיהֺוָ֥ה אֱלֹהֶ֖יךָ יְהִ֥י עִמָּֽךְ׃ ױ
10O	14	18		83770	וַיַּ֣עַן הַמֶּ֗לֶךְ וַיֹּ֨אמֶר֨ אֶל־הָ֣אִשָּׁ֔ה אַל־נָ֨א תְכַֽחֲדִ֤י מִמֶּ֨נִּי֨ דָּבָ֔ר אֲשֶׁ֥ר אָֽנֹכִ֖י שֹׁאֵ֣ל אֹתָ֑ךְ וַתֹּ֨אמֶר֨ הָ֣אִשָּׁ֔ה יְדַבֶּר־נָ֖א אֲדֹנִ֥י הַמֶּֽלֶךְ׃
10O	14	19		83780	וַיֹּ֣אמֶר הַמֶּ֔לֶךְ הֲיַ֥ד יֹואָ֛ב אִתָּ֖ךְ בְּכָל־זֹ֑את וַתַּ֣עַן הָאִשָּׁ֣ה וַתֹּ֡אמֶר חֵ֣י נַפְשְׁךָ֩ אֲדֹנִ֨י הַמֶּ֜לֶךְ אִם־אִ֣֯שׁ ׀ לְהֵמִ֣ין וּלְהַשְׂמִ֗י֯ל מִכֹּ֤ל אֲשֶׁר־דִּבֶּר֨ אֲדֹנִ֣י הַמֶּ֔לֶךְ כִּֽי־עַבְדְּךָ֤ יֹואָב֨ ה֣וּא צִוָּ֔נִי וְה֗וּא שָׂ֚ם בְּפִ֣י שִׁפְחָֽתְךָ֔ אֵ֥ת כָּל־הַדְּבָרִ֖ים הָאֵֽלֶּה׃
10O	14	20		83790	לְבַֽעֲב֤וּר סַבֵּב֨ אֶת־פְּנֵ֣י הַדָּבָ֔ר עָשָׂ֛ה עַבְדְּךָ֥ יֹואָ֖ב אֶת־הַדָּבָ֣ר הַזֶּ֑ה וַֽאדֹנִ֣י חָכָ֗ם כְּחָכְמַת֨ מַלְאַ֣ךְ הָֽאֱלֹהִ֔ים לָדַ֖עַת אֶת־כָּל־אֲשֶׁ֥ר בָּאָֽרֶץ׃ ױ
10O	14	21		83800	וַיֹּ֤אמֶר הַמֶּ֨לֶךְ֨ אֶל־יֹואָ֔ב הִנֵּה־נָ֥א עָשִׂ֖יתִי אֶת־הַדָּבָ֣ר הַזֶּ֑ה וְלֵ֛ךְ הָשֵׁ֥ב אֶת־הַנַּ֖עַר אֶת־אַבְשָׁלֹֽום׃
10O	14	22		83810	וַיִּפֹּל֩ יֹואָ֨ב אֶל־פָּנָ֥יו אַ֛רְצָה וַיִּשְׁתַּ֖חוּ וַיְבָ֣רֶךְ אֶת־הַמֶּ֑לֶךְ וַיֹּ֣אמֶר יֹואָ֡ב הַיֹּום֩ יָדַ֨ע עַבְדְּךָ֜ כִּֽי־מָצָ֨אתִי חֵ֤ן בְּעֵינֶ֨יךָ֨ אֲדֹנִ֣י הַמֶּ֔לֶךְ אֲשֶׁר־עָשָׂ֥ה הַמֶּ֖לֶךְ אֶת־דְּבַ֥ר עַבְדֶּֽוָ֯׃
10O	14	23		83820	וַיָּ֥קָם יֹואָ֖ב וַיֵּ֣לֶךְ גְּשׁ֑וּרָה וַיָּבֵ֥א אֶת־אַבְשָׁלֹ֖ום יְרוּשָׁלִָֽם׃ ױ
10O	14	24		83830	וַיֹּ֤אמֶר הַמֶּ֨לֶךְ֨ יִסֹּ֣ב אֶל־בֵּיתֹ֔ו וּפָנַ֖י לֹ֣א יִרְאֶ֑ה וַיִּסֹּ֤ב אַבְשָׁלֹום֨ אֶל־בֵּיתֹ֔ו וּפְנֵ֥י הַמֶּ֖לֶךְ לֹ֥א רָאָֽה׃ ױ
10O	14	25		83840	וּכְאַבְשָׁלֹ֗ום לֹֽא־הָיָ֧ה אִֽישׁ־יָפֶ֛ה בְּכָל־יִשְׂרָאֵ֖ל לְהַלֵּ֣ל מְאֹ֑ד מִכַּ֤ף רַגְלֹו֙ וְעַ֣ד קָדְקֳדֹ֔ו לֹא־הָ֥יָה בֹ֖ו מֽוּם׃
10O	14	26		83850	וּבְגַלְּחֹו֮ אֶת־רֹאשֹׁו֒ וְֽ֠הָיָה מִקֵּ֨ץ יָמִ֤ים ׀ לַיָּמִים֙ אֲשֶׁ֣ר יְגַלֵּ֔חַ כִּֽי־כָבֵ֥ד עָלָ֖יו וְגִלְּחֹ֑ו וְשָׁקַל֨ אֶת־שְׂעַ֣ר רֹאשֹׁ֔ו מָאתַ֥יִם שְׁקָלִ֖ים בְּאֶ֥בֶן הַמֶּֽלֶךְ׃
10O	14	27		83860	וַיִּוָּֽלְד֤וּ לְאַבְשָׁלֹום֙ שְׁלֹושָׁ֣ה בָנִ֔ים וּבַ֥ת אַחַ֖ת וּשְׁמָ֣הּ תָּמָ֑ר הִ֣יא הָֽיְתָ֔ה אִשָּׁ֖ה יְפַ֥ת מַרְאֶֽה׃ ײ
10O	14	28		83870	וַיֵּ֧שֶׁב אַבְשָׁלֹ֛ום בִּירֽוּשָׁלִַ֖ם שְׁנָתַ֣יִם יָמִ֑ים וּפְנֵ֥י הַמֶּ֖לֶךְ לֹ֥א רָאָֽה׃
10O	14	29		83880	וַיִּשְׁלַ֨ח אַבְשָׁלֹ֜ום אֶל־יֹואָ֗ב לִשְׁלֹ֤חַ אֹתֹו֙ אֶל־הַמֶּ֔לֶךְ וְלֹ֥א אָבָ֖ה לָבֹ֣וא אֵלָ֑יו וַיִּשְׁלַ֥ח עֹוד֨ שֵׁנִ֔ית וְלֹ֥א אָבָ֖ה לָבֹֽוא׃
10O	14	30		83890	וַיֹּ֨אמֶר אֶל־עֲבָדָ֜יו רְאוּ֩ חֶלְקַ֨ת יֹואָ֤ב אֶל־יָדִי֨ וְלֹו־שָׁ֣ם שְׂעֹרִ֔ים לְכ֖וּ וְהַוצִּית֣יּ֯הָ בָאֵ֑שׁ וַיַּצִּ֜תוּ עַבְדֵ֧י אַבְשָׁלֹ֛ום אֶת־הַחֶלְקָ֖ה בָּאֵֽשׁ׃ ױ
10O	14	31		83900	וַיָּ֣קָם יֹואָ֔ב וַיָּבֹ֥א אֶל־אַבְשָׁלֹ֖ום הַבָּ֑יְתָה וַיֹּ֣אמֶר אֵלָ֔יו לָ֣מָּה הִצִּ֧יתוּ עֲבָדֶ֛ךָ אֶת־הַֽחֶלְקָ֥ה אֲשֶׁר־לִ֖י בָּאֵֽשׁ׃
10O	14	32		83910	וַיֹּ֣אמֶר אַבְשָׁלֹ֣ום אֶל־יֹואָ֡ב הִנֵּ֣ה שָׁלַ֣חְתִּי אֵלֶ֣יךָ ׀ לֵאמֹ֡ר בֹּ֣א הֵ֠נָּה וְאֶשְׁלְחָה֩ אֹֽתְךָ֙ אֶל־הַמֶּ֜לֶךְ לֵאמֹ֗ר לָ֤מָּה בָּ֨אתִי֨ מִגְּשׁ֔וּר טֹ֥וב לִ֖י עֹ֣ד אֲנִי־שָׁ֑ם וְעַתָּ֗ה אֶרְאֶה֨ פְּנֵ֣י הַמֶּ֔לֶךְ וְאִם־יֶשׁ־בִּ֥י עָֺו֖ן וֶֽהֱמִתָֽנִי׃
10O	14	33		83920	וַיָּבֹ֨א יֹואָ֣ב אֶל־הַמֶּלֶךְ֮ וַיַּגֶּד־לֹו֒ וַיִּקְרָ֤א אֶל־אַבְשָׁלֹום֙ וַיָּבֹ֣א אֶל־הַמֶּ֔לֶךְ וַיִּשְׁתַּ֨חוּ לֹ֧ו עַל־אַפָּ֛יו אַ֖רְצָה לִפְנֵ֣י הַמֶּ֑לֶךְ וַיִּשַּׁ֥ק הַמֶּ֖לֶךְ לְאַבְשָׁלֹֽום׃ ײ
10O	15	1		83930	וַיְהִי֨ מֵאַ֣חֲרֵי כֵ֔ן וַיַּ֤עַשׂ לֹו֨ אַבְשָׁלֹ֔ום מֶרְכָּבָ֖ה וְסֻסִ֑ים וַֽחֲמִשִּׁ֥ים אִ֖ישׁ רָצִ֥ים לְפָנָֽיו׃
10O	15	2		83940	וְהִשְׁכִּים֨ אַבְשָׁלֹ֔ום וְעָמַ֕ד עַל־יַ֖ד דֶּ֣רֶךְ הַשָּׁ֑עַר וַיְהִ֡י כָּל־הָאִ֣ישׁ אֲשֶֽׁר־יִֽהְיֶה־לֹּ֣ו רִיב֩ לָבֹ֨וא אֶל־הַמֶּ֜לֶךְ לַמִּשְׁפָּ֗ט וַיִּקְרָ֨א אַבְשָׁלֹ֤ום אֵלָיו֙ וַיֹּ֗אמֶר אֵֽי־מִזֶּ֥ה עִיר֙ אַ֔תָּה וַיֹּ֕אמֶר מֵאַחַ֥ד שִׁבְטֵֽי־יִשְׂרָאֵ֖ל עַבְדֶּֽךָ׃
10O	15	3		83950	וַיֹּ֤אמֶר אֵלָיו֙ אַבְשָׁלֹ֔ום רְאֵ֥ה דְבָרֶ֖ךָ טֹובִ֣ים וּנְכֹחִ֑ים וְשֹׁמֵ֥עַ אֵין־לְךָ֖ מֵאֵ֥ת הַמֶּֽלֶךְ׃
10O	15	4		83960	וַיֹּ֨אמֶר֙ אַבְשָׁלֹ֔ום מִֽי־יְשִׂמֵ֥נִי שֹׁפֵ֖ט בָּאָ֑רֶץ וְעָלַ֗י יָבֹ֥וא כָל־אִ֛ישׁ אֲשֶׁר־יִֽהְיֶה־לֹּ֥ו רִֽיב־וּמִשְׁפָּ֖ט וְהִצְדַּקְתִּֽיו׃
10O	15	5		83970	וְהָיָה֙ בִּֽקְרָב־אִ֔ישׁ לְהִשְׁתַּֽחֲֺו֖ת לֹ֑ו וְשָׁלַ֧ח אֶת־יָדֹ֛ו וְהֶֽחֱזִ֥יק לֹ֖ו וְנָ֥שַׁק לֹֽו׃
10O	15	6		83980	וַיַּ֨עַשׂ אַבְשָׁלֹ֜ום כַּדָּבָ֤ר הַזֶּה֙ לְכָל־יִשְׂרָאֵ֔ל אֲשֶׁר־יָבֹ֥אוּ לַמִּשְׁפָּ֖ט אֶל־הַמֶּ֑לֶךְ וַיְגַנֵּב֙ אַבְשָׁלֹ֔ום אֶת־לֵ֖ב אַנְשֵׁ֥י יִשְׂרָאֵֽל׃
10O	15	7		83990	וַיְהִ֕י מִקֵּ֖ץ אַרְבָּעִ֣ים שָׁנָ֑ה וַיֹּ֤אמֶר אַבְשָׁלֹום֙ אֶל־הַמֶּ֔לֶךְ אֵ֣לְכָה נָּ֗א וַֽאֲשַׁלֵּ֛ם אֶת־נִדְרִ֛י אֲשֶׁר־נָדַ֥רְתִּי לַֽיהֺוָ֖ה בְּחֶבְרֹֽון׃
10O	15	8		84000	כִּי־נֵ֨דֶר֨ נָדַ֣ר עַבְדְּךָ֔ בְּשִׁבְתִּ֥י בִגְשׁ֛וּר בַּֽאֲרָ֖ם לֵאמֹ֑ר אִם־יָשׁ֨יֹ֯ב יְשִׁבֵ֤נִי יְהֺוָה֙ יְר֣וּשָׁלִַ֔ם וְעָֽבַדְתִּ֖י אֶת־יְהֺוָֽה׃
10O	15	9		84010	וַיֹּֽאמֶר־לֹ֥ו הַמֶּ֖לֶךְ לֵ֣ךְ בְּשָׁלֹ֑ום וַיָּ֖קָם וַיֵּ֥לֶךְ חֶבְרֹֽונָה׃ ױ
10O	15	10		84020	וַיִּשְׁלַ֤ח אַבְשָׁלֹום֨ מְרַגְּלִ֔ים בְּכָל־שִׁבְטֵ֥י יִשְׂרָאֵ֖ל לֵאמֹ֑ר כְּשָׁמְעֲכֶם֨ אֶת־קֹ֣ול הַשֹּׁפָ֔ר וַֽאֲמַרְתֶּ֕ם מָלַ֥ךְ אַבְשָׁלֹ֖ום בְּחֶבְרֹֽון׃
10O	15	11		84030	וְאֶת־אַבְשָׁלֹ֗ום הָֽלְכ֞וּ מָאתַ֤יִם אִישׁ֨ מִיר֣וּשָׁלִַ֔ם קְרֻאִ֖ים וְהֹֽלְכִ֣ים לְתֻמָּ֑ם וְלֹ֥א יָֽדְע֖וּ כָּל־דָּבָֽר׃
10O	15	12		84040	וַיִּשְׁלַ֣ח אַ֠בְשָׁלֹום אֶת־אֲחִיתֹ֨פֶל הַגִּֽילֹנִ֜י יֹועֵ֣ץ דָּוִ֗ד מֵֽעִירֹו֙ מִגִּלֹ֔ה בְּזָבְחֹ֖ו אֶת־הַזְּבָחִ֑ים וַיְהִ֤י הַקֶּ֨שֶׁר֙ אַמִּ֔יץ וְהָעָ֕ם הֹולֵ֥ךְ וָרָ֖ב אֶת־אַבְשָׁלֹֽום׃
10O	15	13		84050	וַיָּבֹא֙ הַמַּגִּ֔יד אֶל־דָּוִ֖ד לֵאמֹ֑ר הָיָ֛ה לֶֽב־אִ֥ישׁ יִשְׂרָאֵ֖ל אַֽחֲרֵ֥י אַבְשָׁלֹֽום׃
10O	15	14		84060	וַיֹּ֣אמֶר דָּ֠וִד לְכָל־עֲבָדָ֨יו אֲשֶׁר־אִתֹּ֤ו בִירֽוּשָׁלִַ֨ם֙ ק֣וּמוּ וְנִבְרָ֔֯חָה כִּ֛י לֹא־תִֽהְיֶה־לָּ֥נוּ פְלֵיטָ֖ה מִפְּנֵ֣י אַבְשָׁלֹ֑ם מַֽהֲר֣וּ לָלֶ֗כֶת פֶּן־יְמַהֵ֤ר וְהִשִּׂגָ֙נוּ֙ וְהִדִּ֤יחַ עָלֵ֨ינוּ֙ אֶת־הָ֣רָעָ֔ה וְהִכָּ֥ה הָעִ֖יר לְפִי־חָֽרֶב׃
10O	15	15		84070	וַיֹּֽאמְר֥וּ עַבְדֵֽי־הַמֶּ֖לֶךְ אֶל־הַמֶּ֑לֶךְ כְּכֹ֧ל אֲשֶׁר־יִבְחַ֛ר אֲדֹנִ֥י הַמֶּ֖לֶךְ הִנֵּ֥ה עֲבָדֶֽיךָ׃
10O	15	16		84080	וַיֵּצֵ֥א הַמֶּ֛לֶךְ וְכָל־בֵּיתֹ֖ו בְּרַגְלָ֑יו וַיַּֽעֲזֹ֣ב הַמֶּ֗לֶךְ אֵ֣ת עֶ֧שֶׂר נָשִׁ֛ים פִּֽלַגְשִׁ֖ים לִשְׁמֹ֥ר הַבָּֽיִת׃
10O	15	17		84090	וַיֵּצֵ֥א הַמֶּ֛לֶךְ וְכָל־הָעָ֖ם בְּרַגְלָ֑יו וַיַּֽעַמְד֖וּ בֵּ֥ית הַמֶּרְחָֽק׃
10O	15	18		84100	וְכָל־עֲבָדָיו֙ עֹֽבְרִ֣ים עַל־יָדֹ֔ו וְכָל־הַכְּרֵתִ֖י וְכָל־הַפְּלֵתִ֑י וְכָל־הַגִּתִּ֞ים שֵֽׁשׁ־מֵאֹ֣ות אִ֗ישׁ אֲשֶׁר־בָּ֤אוּ בְרַגְלֹו֙ מִגַּ֔ת עֹֽבְרִ֖ים עַל־פְּנֵ֥י הַמֶּֽלֶךְ׃
10O	15	19		84110	וַיֹּ֤אמֶר הַמֶּ֨לֶךְ֨ אֶל־אִתַּ֣י הַגִּתִּ֔י לָ֧מָּה תֵלֵ֛ךְ גַּם־אַתָּ֖ה אִתָּ֑נוּ שׁ֣וּב וְשֵׁ֤ב עִם־הַמֶּ֨לֶךְ֨ כִּֽי־נָכְרִ֣י אַ֔תָּה וְגַם־גֹּלֶ֥ה אַתָּ֖ה לִמְקֹומֶֽךָ׃
10O	15	20		84120	תְּמֹ֣ול ׀ בֹּואֶ֗ךָ וְהַיֹּ֞ום אֲנִֽו֯עֲךָ֤ עִמָּ֨נוּ֨ לָלֶ֔כֶת וַֽאֲנִ֣י הֹולֵ֔ךְ עַ֥ל אֲשֶׁר־אֲנִ֖י הֹולֵ֑ךְ שׁ֣וּב וְהָשֵׁ֧ב אֶת־אַחֶ֛יךָ עִמָּ֖ךְ חֶ֥סֶד וֶֽאֱמֶֽת׃
10O	15	21		84130	וַיַּ֧עַן אִתַּ֛י אֶת־הַמֶּ֖לֶךְ וַיֹּאמַ֑ר חַי־יְהֺוָ֗ה וְחֵי֨ אֲדֹנִ֣י הַמֶּ֔לֶךְ כִּ֠י א֯ם בִּמְקֹ֞ום אֲשֶׁ֥ר יִֽהְיֶה־שָּׁ֣ם ׀ אֲדֹנִ֣י הַמֶּ֗לֶךְ אִם־לְמָ֨וֶת֨ אִם־לְחַיִּ֔ים כִּי־שָׁ֖ם יִֽהְיֶ֥ה עַבְדֶּֽךָ׃
10O	15	22		84140	וַיֹּ֧אמֶר דָּוִ֛ד אֶל־אִתַּ֖י לֵ֣ךְ וַֽעֲבֹ֑ר וַיַּֽעֲבֹ֞ר אִתַּ֤י הַגִּתִּי֨ וְכָל־אֲנָשָׁ֔יו וְכָל־הַטַּ֖ף אֲשֶׁ֥ר אִתֹּֽו׃
10O	15	23		84150	וְכָל־הָאָ֗רֶץ בֹּוכִים֨ קֹ֣ול גָּדֹ֔ול וְכָל־הָעָ֖ם עֹֽבְרִ֑ים וְהַמֶּ֗לֶךְ עֹבֵר֙ בְּנַ֣חַל קִדְרֹ֔ון וְכָל־הָעָם֨ עֹבְרִ֔ים עַל־פְּנֵי֥ דֶ֖רֶךְ אֶת־הַמִּדְבָּֽר׃
10O	15	24		84160	וְהִנֵּ֨ה גַם־צָדֹ֜וק וְכָל־הַֽלְוִיִּ֣ם אִתֹּ֗ו נֹֽשְׂאִים֨ אֶת־אֲרֹון֙ בְּרִ֣ית הָֽאֱלֹהִ֔ים וַיַּצִּ֨קוּ֙ אֶת־אֲרֹ֣ון הָֽאֱלֹהִ֔ים וַיַּ֖עַל אֶבְיָתָ֑ר עַד־תֹּ֥ם כָּל־הָעָ֖ם לַֽעֲבֹ֥ור מִן־הָעִֽיר׃ ױ
10O	15	25		84170	וַיֹּ֤אמֶר הַמֶּ֨לֶךְ֨ לְצָדֹ֔וק הָשֵׁ֛ב אֶת־אֲרֹ֥ון הָֽאֱלֹהִ֖ים הָעִ֑יר אִם־אֶמְצָ֥א חֵן֙ בְּעֵינֵ֣י יְהֺוָ֔ה וֶֽהֱשִׁבַ֕נִי וְהִרְאַ֥נִי אֹתֹ֖ו וְאֶת־נָוֵֽהוּ׃
10O	15	26		84180	וְאִם֙ כֹּ֣ה יֹאמַ֔ר לֹ֥א חָפַ֖צְתִּי בָּ֑ךְ הִֽנְנִ֕י יַֽעֲשֶׂה־לִּ֕י כַּֽאֲשֶׁ֖ר טֹ֥וב בְּעֵינָֽיו׃ ױ
10O	15	27		84190	וַיֹּ֤אמֶר הַמֶּ֨לֶךְ֙ אֶל־צָדֹ֣וק הַכֹּהֵ֔ן הֲרֹואֶ֣ה אַתָּ֔ה שֻׁ֥בָה הָעִ֖יר בְּשָׁלֹ֑ום וַאֲחִימַ֨עַץ בִּנְךָ֜ וִיהֹֽונָתָ֧ן בֶּן־אֶבְיָתָ֛ר שְׁנֵ֥י בְנֵיכֶ֖ם אִתְּכֶֽם׃
10O	15	28		84200	רְאוּ֙ אָֽנֹכִ֣י מִתְמַהְמֵ֔הַּ בְּעַבְרֹ֖֯ות הַמִּדְבָּ֑ר עַד־בֹּ֥וא דָבָ֛ר מֵֽעִמָּכֶ֖ם לְהַגִּ֥יד לִֽי׃
10O	15	29		84210	וַיָּ֨שֶׁב צָדֹ֧וק וְאֶבְיָתָ֛ר אֶת־אֲרֹ֥ון הָֽאֱלֹהִ֖ים יְרֽוּשָׁלִָ֑ם וַיֵּֽשְׁב֖וּ שָֽׁם׃
10O	15	30		84220	וְדָוִ֡ד עֹלֶה֩ בְמַֽעֲלֵ֨ה הַזֵּיתִ֜ים עֹלֶ֣ה ׀ וּבֹוכֶ֗ה וְרֹ֥אשׁ לֹו֙ חָפ֔וּי וְה֖וּא הֹלֵ֣ךְ יָחֵ֑ף וְכָל־הָעָ֣ם אֲשֶׁר־אִתֹּ֗ו חָפוּ֙ אִ֣ישׁ רֹאשֹׁ֔ו וְעָל֥וּ עָלֹ֖ה וּבָכֹֽה׃
10O	15	31		84230	וְדָוִד֨ הִגִּ֣יד לֵאמֹ֔ר אֲחִיתֹ֥פֶל בַּקּֽשְׁרִ֖ים עִם־אַבְשָׁלֹ֑ום וַיֹּ֣אמֶר דָּוִ֔ד סַכֶּל־נָ֛א אֶת־עֲצַ֥ת אֲחִיתֹ֖פֶל יְהֺוָֽה׃
10O	15	32		84240	וַיְהִ֤י דָוִד֨ בָּ֣א עַד־הָרֹ֔אשׁ אֲשֶׁר־יִשְׁתַּֽחֲוֶ֥ה שָׁ֖ם לֵֽאלֹהִ֑ים וְהִנֵּ֤ה לִקְרָאתֹו֙ חוּשַׁ֣י הָאַרְכִּ֔י קָר֨וּעַ֨ כֻּתָּנְתֹּ֔ו וַֽאֲדָמָ֖ה עַל־רֹאשֹֽׁו׃
10O	15	33		84250	וַיֹּ֥אמֶר לֹ֖ו דָּוִ֑ד אִ֚ם עָבַ֣רְתָּ אִתִּ֔י וְהָיִ֥תָ֯ עָלַ֖י לְמַשָּֽׂא׃
10O	15	34		84260	וְאִם־הָעִ֣יר תָּשׁ֗וּב וְאָֽמַרְתָּ֤ לְאַבְשָׁלֹום֨ עַבְדְּךָ֨ אֲנִ֤י הַמֶּ֨לֶךְ֨ אֶֽהְיֶ֔ה עֶ֣בֶד אָבִ֤יךָ וַֽאֲנִי֨ מֵאָ֔ז וְעַתָּ֖ה וַֽאֲנִ֣י עַבְדֶּ֑ךָ וְהֵֽפַרְתָּ֣ה לִ֔י אֵ֖ת עֲצַ֥ת אֲחִיתֹֽפֶל׃
10O	15	35		84270	וַֽהֲלֹ֤וא עִמְּךָ֨ שָׁ֔ם צָדֹ֥וק וְאֶבְיָתָ֖ר הַכֹּֽהֲנִ֑ים וְהָיָ֗ה כָּל־הַדָּבָר֨ אֲשֶׁ֤ר תִּשְׁמַע֨ מִבֵּ֣ית הַמֶּ֔לֶךְ תַּגִּ֕יד לְצָדֹ֥וק וּלְאֶבְיָתָ֖ר הַכֹּֽהֲנִֽים׃
10O	15	36		84280	הִנֵּה־שָׁ֤ם עִמָּם֙ שְׁנֵ֣י בְנֵיהֶ֔ם אֲחִימַ֣עַץ לְצָדֹ֔וק וִיהֹֽונָתָ֖ן לְאֶבְיָתָ֑ר וּשְׁלַחְתֶּ֤ם בְּיָדָם֨ אֵלַ֔י כָּל־דָּבָ֖ר אֲשֶׁ֥ר תִּשְׁמָֽעוּ׃
10O	15	37		84290	וַיָּבֹ֥א חוּשַׁ֛י רֵעֶ֥ה דָוִ֖ד הָעִ֑יר וְאַ֨בְשָׁלֹ֔ום יָבֹ֖וא יְרֽוּשָׁלִָֽם׃
10O	16	1		84300	וְדָוִ֗ד עָבַ֤ר מְעַט֨ מֵֽהָרֹ֔אשׁ וְהִנֵּ֥ה צִיבָ֛א נַ֥עַר מְפִיב֖שֶׁת לִקְרָאתֹ֑ו וְצֶ֨מֶד חֲמֹרִ֜ים חֲבֻשִׁ֗ים וַֽעֲלֵיהֶם֩ מָאתַ֨יִם לֶ֜חֶם וּמֵאָ֧ה צִמּוּקִ֛ים וּמֵ֥אָה קַ֖יִץ וְנֵ֥בֶל יָֽיִן׃
10O	16	2		84310	וַיֹּ֧אמֶר הַמֶּ֛לֶךְ אֶל־צִיבָ֖א מָה־אֵ֣לֶּה לָּ֑ךְ וַיֹּ֣אמֶר צִ֠יבָא הַֽחֲמֹורִ֨ים לְבֵֽית־הַמֶּ֜לֶךְ לִרְכֹּ֗ב וְל֯הַלֶּ֤חֶם וְהַקַּ֨יִץ֨ לֶֽאֱכֹ֣ול הַנְּעָרִ֔ים וְהַיַּ֕יִן לִשְׁתֹּ֥ות הַיָּעֵ֖ף בַּמִּדְבָּֽר׃
10O	16	3		84320	וַיֹּ֣אמֶר הַמֶּ֔לֶךְ וְאַיֵּ֖ה בֶּן־אֲדֹנֶ֑יךָ וַיֹּ֨אמֶר צִיבָ֜א אֶל־הַמֶּ֗לֶךְ הִנֵּה֨ יֹושֵׁ֣ב בִּירֽוּשָׁלִַ֔ם כִּ֣י אָמַ֔ר הַיֹּ֗ום יָשִׁ֤יבוּ לִי֙ בֵּ֣ית יִשְׂרָאֵ֔ל אֵ֖ת מַמְלְכ֥וּת אָבִֽי׃
10O	16	4		84330	וַיֹּ֤אמֶר הַמֶּ֨לֶךְ֨ לְצִבָ֔א הִנֵּ֣ה לְךָ֔ כֹּ֖ל אֲשֶׁ֣ר לִמְפִיב֑שֶׁת וַיֹּ֤אמֶר צִיבָא֙ הִֽשְׁתַּֽחֲוֵ֔יתִי אֶמְצָא־חֵ֥ן בְּעֵינֶי֖ךָ אֲדֹנִ֥י הַמֶּֽלֶךְ׃
10O	16	5		84340	וּבָ֛א הַמֶּ֥לֶךְ דָּוִ֖ד עַד־בַּֽחוּרִ֑ים וְהִנֵּ֣ה מִשָּׁם֩ אִ֨ישׁ יֹוצֵ֜א מִמִּשְׁפַּ֣חַת בֵּֽית־שָׁא֗וּל וּשְׁמֹו֙ שִׁמְעִ֣י בֶן־גֵּרָ֔א יֹצֵ֥א יָצֹ֖וא וּמְקַלֵּֽל׃
10O	16	6		84350	וַיְסַקֵּ֤ל בָּֽאֲבָנִים֙ אֶת־דָּוִ֔ד וְאֶת־כָּל־עַבְדֵ֖י הַמֶּ֣לֶךְ דָּוִ֑ד וְכָל־הָעָם֙ וְכָל־הַגִּבֹּרִ֔ים מִֽימִינֹ֖ו וּמִשְּׂמֹאלֹֽו׃
10O	16	7		84360	וְכֹֽה־אָמַ֥ר שִׁמְעִ֖י בְּקַֽלְלֹ֑ו צֵ֥א צֵ֛א אִ֥ישׁ הַדָּמִ֖ים וְאִ֥ישׁ הַבְּלִיָּֽעַל׃
10O	16	8		84370	הֵשִׁיב֩ עָלֶ֨יךָ יְהֺוָ֜ה כֹּ֣ל ׀ דְּמֵ֣י בֵית־שָׁא֗וּל אֲשֶׁ֤ר מָלַ֨כְתָּ֙ תַּחְתָּ֔ו֯ וַיִּתֵּ֤ן יְהֺוָה֨ אֶת־הַמְּלוּכָ֔ה בְּיַ֖ד אַבְשָׁלֹ֣ום בְּנֶ֑ךָ וְהִנְּךָ֨ בְּרָ֣עָתֶ֔ךָ כִּ֛י אִ֥ישׁ דָּמִ֖ים אָֽתָּה׃
10O	16	9		84380	וַיֹּ֨אמֶר אֲבִישַׁ֤י בֶּן־צְרוּיָה֨ אֶל־הַמֶּ֔לֶךְ לָ֣מָּה יְקַלֵּ֞ל הַכֶּ֤לֶב הַמֵּת֙ הַזֶּ֔ה אֶת־אֲדֹנִ֖י הַמֶּ֑לֶךְ אֶעְבְּרָה־נָּ֖א וְאָסִ֥ירָה אֶת־רֹאשֹֽׁו׃ 
10O	16	10		84390	וַיֹּ֣אמֶר הַמֶּ֔לֶךְ מַה־לִּ֥י וְלָכֶ֖ם בְּנֵ֣י צְרֻיָ֑ה כֹּ֣י֯ יְקַלֵּ֗ל וכִּ֤֯י יְהֺוָה֙ אָ֤מַר לֹו֙ קַלֵּ֣ל אֶת־דָּוִ֔ד וּמִ֣י יֹאמַ֔ר מַדּ֖וּעַ עָשִׂ֥יתָה כֵּֽן׃
10O	16	11		84400	וַיֹּ֨אמֶר דָּוִ֤ד אֶל־אֲבִישַׁי֨ וְאֶל־כָּל־עֲבָדָ֔יו הִנֵּ֥ה בְנִ֛י אֲשֶׁר־יָצָ֥א מִמֵּעַ֖י מְבַקֵּ֣שׁ אֶת־נַפְשִׁ֑י וְאַ֨ף כִּֽי־עַתָּ֜ה בֶּן־הַיְמִינִ֗י הַנִּ֤חוּ לֹו֙ וִֽיקַלֵּ֔ל כִּ֥י אָ֥מַר־לֹ֖ו יְהֺוָֽה׃
10O	16	12		84410	אוּלַ֛י יִרְאֶ֥ה יְהֺוָ֖ה בְּעֵו֯נִ֑י וְהֵשִׁ֨יב יְהֺוָ֥ה לִי֙ טֹובָ֔ה תַּ֥חַת קִֽלְלָתֹ֖ו הַיֹּ֥ום הַזֶּֽה׃ ױ
10O	16	13		84420	וַיֵּ֧לֶךְ דָּוִ֛ד וַֽאֲנָשָׁ֖יו בַּדָּ֑רֶךְ ױ֯ וְשִׁמְעִ֡י הֹלֵךְ֩ בְּצֵ֨לַע הָהָ֜ר לְעֻמָּתֹ֗ו הָלֹוךְ֙ וַיְקַלֵּ֔ל וַיְסַקֵּ֤ל בָּֽאֲבָנִים֙ לְעֻמָּתֹ֔ו וְעִפַּ֖ר בֶּעָפָֽר׃ ױ
10O	16	14		84430	וַיָּבֹ֥א הַמֶּ֛לֶךְ וְכָל־הָעָ֥ם אֲשֶׁר־אִתֹּ֖ו עֲיֵפִ֑ים וַיִּנָּפֵ֖שׁ שָֽׁם׃
10O	16	15		84440	וְאַבְשָׁלֹ֗ום וְכָל־הָעָם֙ אִ֣ישׁ יִשְׂרָאֵ֔ל בָּ֖אוּ יְרֽוּשָׁלִָ֑ם וַֽאֲחִיתֹ֖פֶל אִתֹּֽו׃
10O	16	16		84450	וַיְהִ֗י כַּֽאֲשֶׁר־בָּ֞א חוּשַׁ֧י הָֽאַרְכִּ֛י רֵעֶ֥ה דָוִ֖ד אֶל־אַבְשָׁלֹ֑ום וַיֹּ֤אמֶר חוּשַׁי֙ אֶל־אַבְשָׁלֹ֔ום יְחִ֥י הַמֶּ֖לֶךְ יְחִ֥י הַמֶּֽלֶךְ׃
10O	16	17		84460	וַיֹּ֤אמֶר אַבְשָׁלֹום֨ אֶל־חוּשַׁ֔י זֶ֥ה חַסְדְּךָ֖ אֶת־רֵעֶ֑ךָ לָ֥מָּה לֹֽא־הָלַ֖כְתָּ אֶת־רֵעֶֽךָ׃
10O	16	18		84470	וַיֹּ֣אמֶר חוּשַׁי֮ אֶל־אַבְשָׁלֹם֒ לֹ֕א כִּי֩ אֲשֶׁ֨ר בָּחַ֧ר יְהֺוָ֛ה וְהָעָ֥ם הַזֶּ֖ה וְכָל־אִ֣ישׁ יִשְׂרָאֵ֑ל לֹ֥֯א אֶֽהְיֶ֖ה וְאִתֹּ֥ו אֵשֵֽׁב׃
10O	16	19		84480	וְהַשֵּׁנִ֗ית לְמִי֨ אֲנִ֣י אֶֽעֱבֹ֔ד הֲלֹ֖וא לִפְנֵ֣י בְנֹ֑ו כַּֽאֲשֶׁ֤ר עָבַ֨דְתִּי֨ לִפְנֵ֣י אָבִ֔יךָ כֵּ֖ן אֶֽהְיֶ֥ה לִפָנֶֽיךָ׃ ױ
10O	16	20		84490	וַיֹּ֥אמֶר אַבְשָׁלֹ֖ום אֶל־אֲחִיתֹ֑פֶל הָב֥וּ לָכֶ֛ם עֵצָ֖ה מַה־נַּֽעֲשֶֽׂה׃
10O	16	21		84500	וַיֹּ֤אמֶר אֲחִיתֹ֨פֶל֨ אֶל־אַבְשָׁלֹ֔ם בֹּ֚א אֶל־פִּֽלַגְשֵׁ֣י אָבִ֔יךָ אֲשֶׁ֥ר הִנִּ֖יחַ לִשְׁמֹ֣ור הַבָּ֑יִת וְשָׁמַ֤ע כָּל־יִשְׂרָאֵל֨ כִּֽי־נִבְאַ֣שְׁתָּ אֶת־אָבִ֔יךָ וְחָ֣זְק֔וּ יְדֵ֖י כָּל־אֲשֶׁ֥ר אִתָּֽךְ׃
10O	16	22		84510	וַיַּטּ֧וּ לְאַבְשָׁלֹ֛ום הָאֹ֖הֶל עַל־הַגָּ֑ג וַיָּבֹ֤א אַבְשָׁלֹום֙ אֶל־פִּֽלַגְשֵׁ֣י אָבִ֔יו לְעֵינֵ֖י כָּל־יִשְׂרָאֵֽל׃
10O	16	23		84520	וַֽעֲצַ֣ת אֲחִיתֹ֗פֶל אֲשֶׁ֤ר יָעַץ֙ בַּיָּמִ֣ים הָהֵ֔ם כַּֽאֲשֶׁ֥ר יִשְׁאַל־ִ֖֯ בִּדְבַ֣ר הָֽאֱלֹהִ֑ים כֵּ֚ן כָּל־עֲצַ֣ת אֲחִיתֹ֔פֶל גַּם־לְדָוִ֖ד גַּם־לְאַבְשָׁלֹֽם׃ ײ
10O	17	1		84530	וַיֹּ֥אמֶר אֲחִיתֹ֖פֶל אֶל־אַבְשָׁלֹ֑ם אֶבְחֲרָה־נָּ֗א שְׁנֵֽים־עָשָׂ֥ר אֶ֨לֶף֨ אִ֔ישׁ וְאָק֛וּמָה וְאֶרְדְּפָ֥ה אַֽחֲרֵי־דָוִ֖ד הַלָּֽיְלָה׃
10O	17	2		84540	וְאָבֹ֣וא עָלָ֗יו וְה֤וּא יָגֵעַ֨ וּרְפֵ֣ה יָדַ֔יִם וְהַֽחֲרַדְתִּ֣י אֹתֹ֔ו וְנָ֖ס כָּל־הָעָ֣ם אֲשֶׁר־אִתֹּ֑ו וְהִכֵּיתִ֥י אֶת־הַמֶּ֖לֶךְ לְבַדֹּֽו׃
10O	17	3		84550	וְאָשִׁ֥יבָה כָל־הָעָ֖ם אֵלֶ֑יךָ כְּשׁ֣וּב הַכֹּ֔ל הָאִישׁ֙ אֲשֶׁר־אַתָּ֣ה מְבַקֵּ֔שׁ כָּל־הָעָ֖ם יִֽהְיֶ֥ה שָׁלֹֽום׃
10O	17	4		84560	וַיִּישַׁ֥ר הַדָּבָ֖ר בְּעֵינֵ֣י אַבְשָׁלֹ֑ם וּבְעֵינֵ֖י כָּל־זִקְנֵ֥י יִשְׂרָאֵֽל׃ ױ
10O	17	5		84570	וַיֹּ֣אמֶר אַבְשָׁלֹ֔ום קְרָ֣א נָ֔א גַּ֖ם לְחוּשַׁ֣י הָֽאַרְכִּ֑י וְנִשְׁמְעָ֥ה מַה־בְּפִ֖יו גַּם־הֽוּא׃
10O	17	6		84580	וַיָּבֹ֣א חוּשַׁי֮ אֶל־אַבְשָׁלֹום֒ וַיֹּאמֶר֩ אַבְשָׁלֹ֨ום אֵלָ֜יו לֵאמֹ֗ר כַּדָּבָ֤ר הַזֶּה֙ דִּבֶּ֣ר אֲחִיתֹ֔פֶל הֲנַֽעֲשֶׂ֖ה אֶת־דְּבָרֹ֑ו אִם־אַ֖יִן אַתָּ֥ה דַבֵּֽר׃ ױ
10O	17	7		84590	וַיֹּ֥אמֶר חוּשַׁ֖י אֶל־אַבְשָׁלֹ֑ום לֹֽא־טֹובָ֧ה הָֽעֵצָ֛ה אֲשֶׁר־יָעַ֥ץ אֲחִיתֹ֖פֶל בַּפַּ֥עַם הַזֹּֽאת׃
10O	17	8		84600	וַיֹּ֣אמֶר חוּשַׁ֗י אַתָּ֣ה יָ֠דַעְתָּ אֶת־אָבִ֨יךָ וְאֶת־אֲנָשָׁ֜יו כִּ֧י גִבֹּרִ֣ים הֵ֗מָּה וּמָרֵ֥י נֶ֨פֶשׁ֙ הֵ֔מָּה כְּדֹ֥וב שַׁכּ֖וּל בַּשָּׂדֶ֑ה וְאָבִ֨יךָ֨ אִ֣ישׁ מִלְחָמָ֔ה וְלֹ֥א יָלִ֖ין אֶת־הָעָֽם׃
10O	17	9		84610	הִנֵּ֨ה עַתָּ֤ה הֽוּא־נֶחְבָּא֨ בְּאַחַ֣ת הַפְּחָתִ֔ים אֹ֖ו בְּאַחַ֣ד הַמְּקֹומֹ֑ת וְהָיָ֗ה כִּנְפֹ֤ל בָּהֶם֨ בַּתְּחִלָּ֔ה וְשָׁמַ֤ע הַשֹּׁמֵעַ֨ וְאָמַ֔ר הָֽיְתָה֨ מַגֵּפָ֔ה בָּעָ֕ם אֲשֶׁ֖ר אַֽחֲרֵ֥י אַבְשָׁלֹֽם׃
10O	17	10		84620	וְה֣וּא גַם־בֶּן־חַ֗יִל אֲשֶׁ֥ר לִבֹּ֛ו כְּלֵ֥ב הָֽאַרְיֵ֖ה הִמֵּ֣ס יִמָּ֑ס כִּֽי־יֹדֵ֤עַ כָּל־יִשְׂרָאֵל֨ כִּֽי־גִבֹּ֣ור אָבִ֔יךָ וּבְנֵי־חַ֖יִל אֲשֶׁ֥ר אִתֹּֽו׃
10O	17	11		84630	כִּ֣י יָעַ֗צְתִּי הֵֽ֠אָסֹף יֵֽאָסֵ֨ף עָלֶ֤יךָ כָל־יִשְׂרָאֵל֨ מִדָּ֣ן וְעַד־בְּאֵ֣ר שֶׁ֔בַע כַּחֹ֥ול אֲשֶׁר־עַל־הַיָּ֖ם לָרֹ֑ב וּפָנֶ֥יךָ הֹֽלְכִ֖ים בַּקְרָֽב׃
10O	17	12		84640	וּבָ֣אנוּ אֵלָ֗יו בְּאַחַ֤ת֯ הַמְּקֹומֹת֙ אֲשֶׁ֣ר נִמְצָ֣א שָׁ֔ם וְנַ֣חְנוּ עָלָ֔יו כַּֽאֲשֶׁ֛ר יִפֹּ֥ל הַטַּ֖ל עַל־הָֽאֲדָמָ֑ה וְלֹֽא־נֹ֥֯ותַר בֹּ֛ו וּבְכָל־הָֽאֲנָשִׁ֥ים אֲשֶׁר־אִתֹּ֖ו גַּם־אֶחָֽד׃
10O	17	13		84650	וְאִם־אֶל־עִיר֨ יֵֽאָסֵ֔ף וְהִשִּׂ֧יאוּ כָל־יִשְׂרָאֵ֛ל אֶל־הָעִ֥יר הַהִ֖יא חֲבָלִ֑ים וְסָחַ֤בְנוּ אֹתֹו֙ עַד־הַנַּ֔חַל עַ֛ד אֲשֶׁר־לֹֽא־נִמְצָ֥א שָׁ֖ם גַּם־צְרֹֽור׃ ױ
10O	17	14		84660	וַיֹּ֤אמֶר אַבְשָׁלֹום֨ וְכָל־אִ֣ישׁ יִשְׂרָאֵ֔ל טֹובָ֗ה עֲצַת֨ חוּשַׁ֣י הָֽאַרְכִּ֔י מֵֽעֲצַ֖ת אֲחִיתֹ֑פֶל ױ֯ וַֽיהֺוָ֣ה צִוָּ֗ה לְהָפֵ֞ר אֶת־עֲצַ֤ת אֲחִיתֹ֨פֶל֨ הַטֹּובָ֔ה לְבַֽעֲב֗וּר הָבִ֧יא יְהֺוָ֛ה אֶ֯ל־אַבְשָׁלֹ֖ום אֶת־הָרָעָֽה׃ ױ
10O	17	15		84670	וַיֹּ֣אמֶר חוּשַׁ֗י אֶל־צָדֹ֤וק וְאֶל־אֶבְיָתָר֙ הַכֹּ֣הֲנִ֔ים כָּזֹ֣את וְכָזֹ֗את יָעַ֤ץ אֲחִיתֹ֨פֶל֨ אֶת־אַבְשָׁלֹ֔ם וְאֵ֖ת זִקְנֵ֣י יִשְׂרָאֵ֑ל וְכָזֹ֥את וְכָזֹ֖את יָעַ֥צְתִּי אָֽנִי׃
10O	17	16		84680	וְעַתָּ֡ה שִׁלְח֣וּ מְהֵרָה֩ וְהַגִּ֨ידוּ לְדָוִ֜ד לֵאמֹ֗ר אַל־תָּ֤לֶן הַלַּ֨יְלָה֙ בְּעַרְבֹ֣ות הַמִּדְבָּ֔ר וְגַ֖ם עָבֹ֣ור תַּֽעֲבֹ֑ור פֶּ֚ן יְבֻלַּ֣ע לַמֶּ֔לֶךְ וּלְכָל־הָעָ֖ם אֲשֶׁ֥ר אִתֹּֽו׃
10O	17	17		84690	וִיהֹֽונָתָ֨ן וַֽאֲחִימַ֜עַץ עֹֽמְדִ֣ים בְּעֵֽין־רֹגֵ֗ל וְהָֽלְכָ֤ה הַשִּׁפְחָה֨ וְהִגִּ֣ידָה לָהֶ֔ם וְהֵם֨ יֵֽלְכ֔וּ וְהִגִּי֖דוּ לַמֶּ֣לֶךְ דָּוִ֑ד כִּ֣י לֹ֧א יֽוּכְל֛וּ לְהֵֽרָאֹ֖ות לָבֹ֥וא הָעִֽירָה׃
10O	17	18		84700	וַיַּ֤רְא אֹתָם֙ נַ֔עַר וַיַּגֵּ֖ד לְאַבְשָׁלֹ֑ם וַיֵּֽלְכוּ֩ שְׁנֵיהֶ֨ם מְהֵרָ֜ה וַיָּבֹ֣אוּ ׀ אֶל־בֵּֽית־אִ֣ישׁ בְּבַֽחוּרִ֗ים וְלֹ֥ו בְאֵ֛ר בַּֽחֲצֵרֹ֖ו וַיֵּ֥רְדוּ שָֽׁם׃
10O	17	19		84710	וַתִּקַּ֣ח הָֽאִשָּׁ֗ה וַתִּפְרֹ֤שׂ אֶת־הַמָּסָךְ֙ עַל־פְּנֵ֣י הַבְּאֵ֔ר וַתִּשְׁטַ֥ח עָלָ֖יו הָֽרִפֹ֑ות וְלֹ֥א נֹודַ֖ע דָּבָֽר׃
10O	17	20		84720	וַיָּבֹ֣אוּ עַבְדֵי֩ אַבְשָׁלֹ֨ום אֶל־הָֽאִשָּׁ֜ה הַבַּ֗יְתָה וַיֹּֽאמְר֙וּ אַיֵּ֗ה אֲחִימַ֨עַץ֙ וִיהֹ֣ונָתָ֔ן וַתֹּ֤אמֶר לָהֶם֨ הָֽאִשָּׁ֔ה עָֽבְר֖וּ מִיכַ֣ל הַמָּ֑יִם וַיְבַקְשׁוּ֨ וְלֹ֣א מָצָ֔֯אוּ וַיָּשֻׁ֖בוּ יְרֽוּשָׁלִָֽם׃ ױ
10O	17	21		84730	וַיְהִ֣י ׀ אַֽחֲרֵ֣י לֶכְתָּ֗ם וַיַּֽעֲלוּ֨ מֵֽהַבְּאֵ֔ר וַיֵּ֣לְכ֔וּ וַיַּגִּ֖דוּ לַמֶּ֣לֶךְ דָּוִ֑ד וַיֹּֽאמְר֣וּ אֶל־דָּוִ֗ד ק֣וּמוּ וְעִבְר֤וּ מְהֵרָה֙ אֶת־הַמַּ֔יִם כִּי־כָ֛כָה יָעַ֥ץ עֲלֵיכֶ֖ם אֲחִיתֹֽפֶל׃
10O	17	22		84740	וַיָּ֣קָם דָּוִ֗ד וְכָל־הָעָם֙ אֲשֶׁ֣ר אִתֹּ֔ו וַיַּֽעַבְר֖וּ אֶת־הַיַּרְדֵּ֑ן עַד־אֹ֣ור הַבֹּ֗קֶר עַד־אַחַד֙ לֹ֣א נֶעְדָּ֔֯ר אֲשֶׁ֥ר לֹֽא־עָבַ֖ר אֶת־הַיַּרְדֵּֽן׃
10O	17	23		84750	וַֽאֲחִיתֹ֣פֶל רָאָ֗ה כִּ֣י לֹא־נֶֽעֶשְׂתָה֮ עֲצָתֹו֒ וַיַּֽחֲב֣שׁ אֶֽת־הַֽחֲמֹ֗ור וַיָּ֜קָם וַיֵּ֤לֶךְ אֶל־בֵּיתֹו֙ אֶל־עִירֹ֔ו וַיְצַ֥ו אֶל־בֵּיתֹ֖ו וַיֵּֽחָנַ֑ק וַיָּ֕מָת וַיִּקָּבֵ֖ר בְּקֶ֥בֶר אָבִֽיו׃ ױ
10O	17	24		84760	וְדָוִ֖ד בָּ֣א מַֽחֲנָ֑יְמָה וְאַבְשָׁלֹ֗ם עָבַר֙ אֶת־הַיַּרְדֵּ֔ן ה֕וּא וְכָל־אִ֥ישׁ יִשְׂרָאֵ֖ל עִמֹּֽו׃
10O	17	25		84770	וְאֶת־עֲמָשָׂ֗א שָׂ֧ם אַבְשָׁלֹ֛ם תַּ֥חַת יֹואָ֖ב עַל־הַצָּבָ֑א וַֽעֲמָשָׂ֣א בֶן־אִ֗ישׁ וּשְׁמֹו֙ יִתְרָ֣א הַיִּשְׂרְאֵלִ֔י אֲשֶׁר־בָּא֨ אֶל־אֲבִיגַ֣ל בַּת־נָחָ֔שׁ אֲחֹ֥ות צְרוּיָ֖ה אֵ֥ם יֹואָֽב׃
10O	17	26		84780	וַיִּ֤חַן יִשְׂרָאֵל֨ וְאַבְשָׁלֹ֔ם אֶ֖רֶץ הַגִּלְעָֽד׃ ױ
10O	17	27		84790	וַיְהִ֕י כְּבֹ֥וא דָוִ֖ד מַֽחֲנָ֑יְמָה וְשֹׁבִ֨י בֶן־נָחָ֜שׁ מֵֽרַבַּ֣ת בְּנֵֽי־עַמֹּ֗ון וּמָכִ֤יר בֶּן־עַמִּיאֵל֨ מִלֹּ֣א דְבָ֔ר וּבַרְזִלַּ֥י הַגִּלְעָדִ֖י מֵרֹֽגְלִֽים׃
10O	17	28		84800	מִשְׁכָּ֤ב וְסַפֹּות֙ וּכְלִ֣י יֹוצֵ֔ר וְחִטִּ֥ים וּשְׂעֹרִ֖ים וְקֶ֣מַח וְקָלִ֑י וּפֹ֥ול וַֽעֲדָשִׁ֖ים וְקָלִֽי׃
10O	17	29		84810	וּדְבַ֣שׁ וְחֶמְאָ֗ה וְצֹאן֙ וּשְׁפֹ֣ות בָּקָ֔ר הִגִּ֧ישׁוּ לְדָוִ֛ד וְלָעָ֥ם אֲשֶׁר־אִתֹּ֖ו לֶֽאֱכֹ֑ול כִּ֣י אָֽמְר֔וּ הָעָ֗ם רָעֵ֛ב וְעָיֵ֥ף וְצָמֵ֖א בַּמִּדְבָּֽר׃
10O	18	1		84820	וַיִּפְקֹ֣ד דָּוִ֔ד אֶת־הָעָ֖ם אֲשֶׁ֣ר אִתֹּ֑ו וַיָּ֣שֶׂם עֲלֵיהֶ֔ם שָׂרֵ֥י אֲלָפִ֖ים וְשָׂרֵ֥י מֵאֹֽות׃
10O	18	2		84830	וַיְשַׁלַּ֨ח דָּוִ֜ד אֶת־הָעָ֗ם הַשְּׁלִשִׁ֤ית בְּיַד־יֹואָב֙ וְ֠הַשְּׁלִשִׁית בְּיַ֨ד אֲבִישַׁ֤י בֶּן־צְרוּיָה֨ אֲחִ֣י יֹואָ֔ב וְהַ֨שְּׁלִשִׁ֔ת בְּיַ֖ד אִתַּ֣י הַגִּתִּ֑י ױ֯ וַיֹּ֤אמֶר הַמֶּ֨לֶךְ֨ אֶל־הָעָ֔ם יָצֹ֥א אֵצֵ֛א גַּם־אֲנִ֖י עִמָּכֶֽם׃
10O	18	3		84840	וַיֹּ֨אמֶר הָעָ֜ם לֹ֣א תֵצֵ֗א כִּי֩ אִם־נֹ֨וס נָנ֜וּס לֹֽא־יָשִׂ֧ימוּ אֵלֵ֣ינוּ לֵ֗ב וְאִם־יָמֻ֤תוּ חֶצְיֵ֨נוּ֨ לֹֽא־יָשִׂ֤ימוּ אֵלֵ֙ינוּ֙ לֵ֔ב כִּֽי־עַתָּ֥ה כָמֹ֖נוּ עֲשָׂרָ֣ה אֲלָפִ֑ים וְעַתָּ֣ה טֹ֔וב כִּי־תִֽהְיֶה־לָּ֥נוּ מֵעִ֖יר לַעְזֹֽי֯ר׃
10O	18	4		84850	וַיֹּ֤אמֶר אֲלֵיהֶם֙ הַמֶּ֔לֶךְ אֲשֶׁר־יִיטַ֥ב בְּעֵֽינֵיכֶ֖ם אֶֽעֱשֶׂ֑ה וַיַּֽעֲמֹ֤ד הַמֶּ֨לֶךְ֙ אֶל־יַ֣ד הַשַּׁ֔עַר וְכָל־הָעָם֨ יָֽצְא֔וּ לְמֵאֹ֖ות וְלַֽאֲלָפִֽים׃
10O	18	5		84860	וַיְצַ֣ו הַמֶּ֡לֶךְ אֶת־יֹ֠ואָב וְאֶת־אֲבִישַׁ֤י וְאֶת־אִתַּי֙ לֵאמֹ֔ר לְאַט־לִ֖י לַנַּ֣עַר לְאַבְשָׁלֹ֑ום וְכָל־הָעָ֣ם שָׁמְע֗וּ בְּצַוֹּ֥ת הַמֶּ֛לֶךְ אֶת־כָּל־הַשָּׂרִ֖ים עַל־דְּבַ֥ר אַבְשָׁלֹֽום׃
10O	18	6		84870	וַיֵּצֵ֥א הָעָ֛ם הַשָּׂדֶ֖ה לִקְרַ֣את יִשְׂרָאֵ֑ל וַתְּהִ֥י הַמִּלְחָמָ֖ה בְּיַ֥עַר אֶפְרָֽיִם׃
10O	18	7		84880	וַיִּנָּ֤גְפוּ שָׁם֙ עַ֣ם יִשְׂרָאֵ֔ל לִפְנֵ֖י עַבְדֵ֣י דָוִ֑ד וַתְּהִי־שָׁ֞ם הַמַּגֵּפָ֧ה גְדֹולָ֛ה בַּיֹּ֥ום הַה֖וּא עֶשְׂרִ֥ים אָֽלֶף׃
10O	18	8		84890	וַתְּהִי־שָׁ֧ם הַמִּלְחָמָ֛ה נָפֹ֖צֶו֯ת עַל־פְּנֵ֣י כָל־הָאָ֑רֶץ וַיֶּ֤רֶב הַיַּ֙עַר֨ לֶֽאֱכֹ֣ל בָּעָ֔ם מֵֽאֲשֶׁ֥ר אָֽכְלָ֛ה הַחֶ֖רֶב בַּיֹּ֥ום הַהֽוּא׃
10O	18	9		84900	וַיִּקָּרֵא֨ אַבְשָׁלֹ֔ום לִפְנֵ֖י עַבְדֵ֣י דָוִ֑ד וְאַבְשָׁלֹ֞ום רֹכֵ֣ב עַל־הַפֶּ֗רֶד וַיָּבֹ֣א הַפֶּ֡רֶד תַּ֣חַת שֹׂובֶךְ֩ הָֽאֵלָ֨ה הַגְּדֹולָ֜ה וַיֶּֽחֱזַ֧ק רֹאשֹׁ֣ו בָֽאֵלָ֗ה וַיֻּתַּן֨ בֵּ֤ין הַשָּׁמַ֨יִם֨ וּבֵ֣ין הָאָ֔רֶץ וְהַפֶּ֥רֶד אֲשֶׁר־תַּחְתָּ֖יו עָבָֽר׃
10O	18	10		84910	וַיַּרְא֨ אִ֣ישׁ אֶחָ֔ד וַיַּגֵּ֖ד לְיֹואָ֑ב וַיֹּ֗אמֶר הִנֵּה֙ רָאִ֣יתִי אֶת־אַבְשָׁלֹ֔ם תָּל֖וּי בָּֽאֵלָֽה׃
10O	18	11		84920	וַיֹּ֣אמֶר יֹואָ֗ב לָאִישׁ֨ הַמַּגִּ֣יד לֹ֔ו וְהִנֵּ֣ה רָאִ֔יתָ וּמַדּ֛וּעַ לֹֽא־הִכִּיתֹ֥ו שָׁ֖ם אָ֑רְצָה וְעָלַ֗י לָ֤תֶת לְךָ֨ עֲשָׂ֣רָה כֶ֔סֶף וַֽחֲגֹרָ֖ה אֶחָֽת׃
10O	18	12		84930	וַיֹּ֤אמֶר הָאִישׁ֙ אֶל־יֹואָ֔ב וְלֻ֨א֯ אָנֹכִ֜י שֹׁקֵ֤ל עַל־כַּפַּי֨ אֶ֣לֶף כֶּ֔סֶף לֹֽא־אֶשְׁלַ֥ח יָדִ֖י אֶל־בֶּן־הַמֶּ֑לֶךְ כִּ֣י בְאָזְנֵ֜ינוּ צִוָּ֣ה הַמֶּ֗לֶךְ אֹֽ֠תְךָ וְאֶת־אֲבִישַׁ֤י וְאֶת־אִתַּי֙ לֵאמֹ֔ר שִׁמְרוּ־מִ֕י בַּנַּ֖עַר בְּאַבְשָׁלֹֽום׃
10O	18	13		84940	אֹֽו־עָשִׂ֤יתִי בְנַפְשִׁ֯ו֨ שֶׁ֔קֶר וְכָל־דָּבָ֖ר לֹֽא־יִכָּחֵ֣ד מִן־הַמֶּ֑לֶךְ וְאַתָּ֖ה תִּתְיַצֵּ֥ב מִנֶּֽגֶד׃
10O	18	14		84950	וַיֹּ֣אמֶר יֹואָ֔ב לֹא־כֵ֖ן אֹחִ֣ילָה לְפָנֶ֑יךָ וַיִּקַּח֩ שְׁלשָׁ֨ה שְׁבָטִ֜ים בְּכַפֹּ֗ו וַיִּתְקָעֵם֙ בְּלֵ֣ב אַבְשָׁלֹ֔ום עֹודֶ֥נּוּ חַ֖י בְּלֵ֥ב הָֽאֵלָֽה׃
10O	18	15		84960	וַיָּסֹ֨בּוּ֨ עֲשָׂרָ֣ה נְעָרִ֔ים נֹֽשְׂאֵ֖י כְּלֵ֣י יֹואָ֑ב וַיַּכּ֥וּ אֶת־אַבְשָׁלֹ֖ום וַיְמִיתֻֽהוּ׃
10O	18	16		84970	וַיִּתְקַ֤ע יֹואָב֙ בַּשֹּׁפָ֔ר וַיָּ֣שָׁב הָעָ֔ם מִרְדֹ֖ף אַֽחֲרֵ֣י יִשְׂרָאֵ֑ל כִּֽי־חָשַׂ֥ךְ יֹואָ֖ב אֶת־הָעָֽם׃
10O	18	17		84980	וַיִּקְח֣וּ אֶת־אַבְשָׁלֹ֗ום וַיַּשְׁלִ֨כוּ אֹתֹ֤ו בַיַּ֨עַר֨ אֶל־הַפַּ֣חַת הַגָּדֹ֔ול וַיַּצִּ֧בוּ עָלָ֛יו גַּל־אֲבָנִ֖ים גָּדֹ֣ול מְאֹ֑ד וְכָ֙ל־יִשְׂרָאֵ֔ל נָ֖סוּ אִ֥ישׁ לְאֹֽהָלָֽו֯׃
10O	18	18		84990	וְאַבְשָׁלֹ֣ם לָקַ֗ח וַיַּצֶּב־לֹ֤ו בְחַיָּ֯ו֙ אֶת־מַצֶּ֨בֶת֙ אֲשֶׁ֣ר בְּעֵֽמֶק־הַמֶּ֔לֶךְ כִּ֤י אָמַר֨ אֵֽין־לִ֣י בֵ֔ן בַּעֲב֖וּר הַזְכִּ֣יר שְׁמִ֑י וַיִּקְרָ֤א לַמַּצֶּ֨בֶת֨ עַל־שְׁמֹ֔ו וַיִּקָּ֤רֵא לָהּ֨ יַ֣ד אַבְשָׁלֹ֔ום עַ֖ד הַיֹּ֥ום הַזֶּֽה׃ ױ
10O	18	19		85000	וַֽאֲחִימַ֤עַץ בֶּן־צָדֹוק֙ אָמַ֔ר אָר֣וּצָה נָּ֔א וַֽאֲבַשְּׂרָ֖ה אֶת־הַמֶּ֑לֶךְ כִּֽי־שְׁפָטֹ֥ו יְהֺוָ֖ה מִיַּ֥ד אֹֽיְבָֽיו׃
10O	18	20		85010	וַיֹּ֧אמֶר לֹ֣ו יֹואָ֗ב לֹא֩ אִ֨ישׁ בְּשׂרָ֤ה אַתָּה֨ הַיֹּ֣ום הַזֶּ֔ה וּבִשַּׂרְתָּ֖ בְּיֹ֣ום אַחֵ֑ר וְהַיֹּ֤ום הַזֶּה֙ לֹ֣א תְבַשֵּׂ֔ר כִּ֛י עַל־ֵ֥֯ בֶּן־הַמֶּ֖לֶךְ מֵֽת׃ ױ
10O	18	21		85020	וַיֹּ֤אמֶר יֹואָב֙ לַכּוּשִׁ֔י לֵ֛ךְ הַגֵּ֥ד לַמֶּ֖לֶךְ אֲשֶׁ֣ר רָאִ֑יתָה וַיִּשְׁתַּ֧חוּ כוּשִׁ֛י לְיֹואָ֖ב וַיָּרֹֽץ׃
10O	18	22		85030	וַיֹּ֨סֶף עֹ֜וד אֲחִימַ֤עַץ בֶּן־צָדֹוק֨ וַיֹּ֣אמֶר אֶל־יֹואָ֔ב וִ֣יהִי מָ֔ה אָרֻֽצָה־נָּ֥א גַם־אָ֖נִי אַֽחֲרֵ֣י הַכּוּשִׁ֑י וַיֹּ֣אמֶר יֹואָ֗ב לָ֣מָּה זֶּ֞ה אַתָּ֥ה רָץ֙ בְּנִ֔י וּלְכָ֖ה אֵֽין־בְּשֹׂורָ֥ה מֹצֵֽאת׃
10O	18	23		85040	וִֽיהִי־מָ֣ה אָר֔וּץ וַיֹּ֥אמֶר לֹ֖ו ר֑וּץ וַיָּ֤רָץ אֲחִימַ֨עַץ֨ דֶּ֣רֶךְ הַכִּכָּ֔ר וַיַּֽעֲבֹ֖ר אֶת־הַכּוּשִֽׁי׃
10O	18	24		85050	וְדָוִ֥ד יֹושֵׁ֖ב בֵּֽין־שְׁנֵ֣י הַשְּׁעָרִ֑ים וַ֙יֵּלֶךְ הַצֹּפֶ֜ה אֶל־גַּ֤ג הַשַּׁ֙עַר֙ אֶל־הַ֣חֹומָ֔ה וַיִּשָּׂ֤א אֶת־עֵינָיו֙ וַיַּ֔רְא וְהִנֵּה־אִ֖ישׁ רָ֥ץ לְבַדֹּֽו׃
10O	18	25		85060	וַיִּקְרָ֤א הַצֹּפֶה֨ וַיַּגֵּ֣ד לַמֶּ֔לֶךְ וַיֹּ֣אמֶר הַמֶּ֔לֶךְ אִם־לְבַדֹּ֖ו בְּשֹׂורָ֣ה בְּפִ֑יו וַיֵּ֥לֶךְ הָלֹ֖וךְ וְקָרֵֽב׃
10O	18	26		85070	וַיַּ֣רְא הַצֹּפֶה֮ אִֽישׁ־אַחֵ֣ר רָץ֒ וַיִּקְרָ֤א הַצֹּפֶה֨ אֶל־הַשֹּׁעֵ֔ר וַיֹּ֕אמֶר הִנֵּה־אִ֖ישׁ רָ֣ץ לְבַדֹּ֑ו וַיֹּ֥אמֶר הַמֶּ֖לֶךְ גַּם־זֶ֥ה מְבַשֵּֽׂר׃
10O	18	27		85080	וַיֹּ֨אמֶר֨ הַצֹּפֶ֔ה אֲנִ֤י רֹאֶה֨ אֶת־מְרוּצַ֣ת הָֽרִאשֹׁ֔ון כִּמְרֻצַ֖ת אֲחִימַ֣עַץ בֶּן־צָדֹ֑וק וַיֹּ֤אמֶר הַמֶּ֨לֶךְ֨ אִֽישׁ־טֹ֣וב זֶ֔ה וְאֶל־בְּשֹׂורָ֥ה טֹובָ֖ה יָבֹֽוא׃
10O	18	28		85090	וַיִּקְרָ֣א אֲחִימַ֗עַץ וַיֹּ֤אמֶר אֶל־הַמֶּ֨לֶךְ֨ שָׁלֹ֔ום וַיִּשְׁתַּ֧חוּ לַמֶּ֛לֶךְ לְאַפָּ֖יו אָ֑רְצָה וַיֹּ֗אמֶר בָּרוּךְ֨ יְהֺוָ֣ה אֱלֹהֶ֔יךָ אֲשֶׁ֤ר סִגַּר֨ אֶת־הָ֣אֲנָשִׁ֔ים אֲשֶׁר־נָֽשְׂא֥וּ אֶת־יָדָ֖ם בַּֽאדֹנִ֥י הַמֶּֽלֶךְ׃ ױ
10O	18	29		85100	וַיֹּ֣אמֶר הַמֶּ֔לֶךְ שָׁלֹ֥ום לַנַּ֖עַר לְאַבְשָׁלֹ֑ום וַיֹּ֣אמֶר אֲחִימַ֡עַץ רָאִיתִי֩ הֶֽהָמֹ֨ון הַגָּדֹ֜ול לִ֠שְׁלֹחַ אֶת־עֶ֨בֶד הַמֶּ֤לֶךְ יֹואָב֙ וְאֶת־עַבְדֶּ֔ךָ וְלֹ֥א יָדַ֖עְתִּי מָֽה׃
10O	18	30		85110	וַיֹּ֣אמֶר הַמֶּ֔לֶךְ סֹ֖ב הִתְיַצֵּ֣ב כֹּ֑ה וַיִּסֹּ֖ב וַיַּֽעֲמֹֽד׃
10O	18	31		85120	וְהִנֵּ֥ה הַכּוּשִׁ֖י בָּ֑א וַיֹּ֣אמֶר הַכּוּשִׁ֗י יִתְבַּשֵּׂר֙ אֲדֹנִ֣י הַמֶּ֔לֶךְ כִּֽי־שְׁפָֽטְךָ֤ יְהֺוָה֨ הַיֹּ֔ום מִיַּ֖ד כָּל־הַקָּמִ֥ים עָלֶֽיךָ׃ ײ
10O	18	32		85130	וַיֹּ֤אמֶר הַמֶּ֨לֶךְ֨ אֶל־הַכּוּשִׁ֔י הֲשָׁלֹ֥ום לַנַּ֖עַר לְאַבְשָׁלֹ֑ום וַיֹּ֣אמֶר הַכּוּשִׁ֗י יִֽהְי֤וּ כַנַּ֨עַר֨ אֹֽיְבֵי֨ אֲדֹנִ֣י הַמֶּ֔לֶךְ וְכֹ֛ל אֲשֶׁר־קָ֥מוּ עָלֶ֖יךָ לְרָעָֽה׃ ײ
10O	19	1		85140	וַיִּרְגַּ֣ז הַמֶּ֗לֶךְ וַיַּ֛עַל עַל־עֲלִיַּ֥ת הַשַּׁ֖עַר וַיֵּ֑בְךְּ וְכֹ֣ה ׀ אָמַ֣ר בְּלֶכְתֹּ֗ו בְּנִ֤י אַבְשָׁלֹום֨ בְּנִ֣י בְנִ֣י אַבְשָׁלֹ֔ום מִֽי־יִתֵּ֤ן מוּתִי֨ אֲנִ֣י תַחְתֶּ֔יךָ אַבְשָׁלֹ֖ום בְּנִ֥י בְנִֽי׃
10O	19	2		85150	וַיֻּגַּ֖ד לְיֹואָ֑ב הִנֵּ֨ה הַמֶּ֧לֶךְ בֹּכֶ֛ה וַיִּתְאַבֵּ֖ל עַל־אַבְשָׁלֹֽום׃
10O	19	3		85160	וַתְּהִ֨י הַתְּשֻׁעָ֜ה בַּיֹּ֥ום הַה֛וּא לְאֵ֖בֶל לְכָל־הָעָ֑ם כִּֽי־שָׁמַ֣ע הָעָ֗ם בַּיֹּ֤ום הַהוּא֨ לֵאמֹ֔ר נֶֽעֱצַ֥ב הַמֶּ֖לֶךְ עַל־בְּנֹֽו׃
10O	19	4		85170	וַיִּתְגַּנֵּ֥ב הָעָ֛ם בַּיֹּ֥ום הַה֖וּא לָבֹ֣וא הָעִ֑יר כַּֽאֲשֶׁ֣ר יִתְגַּנֵּ֗ב הָעָם֙ הַנִּכְלָמִ֔ים בְּנוּסָ֖ם בַּמִּלְחָמָֽה׃
10O	19	5		85180	וְהַמֶּ֨לֶךְ֨ לָאַ֣ט אֶת־פָּנָ֔יו וַיִּזְעַ֥ק הַמֶּ֖לֶךְ קֹ֣ול גָּדֹ֑ול בְּנִי֨ אַבְשָׁלֹ֔ום אַבְשָׁלֹ֖ום בְּנִ֥י בְנִֽי׃ ױ
10O	19	6		85190	וַיָּבֹ֥א יֹואָ֛ב אֶל־הַמֶּ֖לֶךְ הַבָּ֑יִת וַיֹּאמֶר֩ הֹבַ֨שְׁתָּ הַיֹּ֜ום אֶת־פְּנֵ֣י כָל־עֲבָדֶ֗יךָ הַֽמְמַלְּטִ֤ים אֶת־נַפְשְׁךָ֨ הַיֹּ֔ום וְאֵ֨ת נֶ֤פֶשׁ בָּנֶ֨יךָ֨ וּבְנֹתֶ֔יךָ וְנֶ֣פֶשׁ נָשֶׁ֔יךָ וְנֶ֖פֶשׁ פִּֽלַגְשֶֽׁיךָ׃
10O	19	7		85200	לְאַֽהֲבָה֨ אֶת־שׂ֣נְאֶ֔יךָ וְלִשְׂנֹ֖א אֶת־אֹֽהֲבֶ֑יךָ כִּ֣י ׀ הִגַּ֣דְתָּ הַיֹּ֗ום כִּ֣י אֵ֤ין לְךָ֙ שָׂרִ֣ים וַֽעֲבָדִ֔ים כִּ֣י ׀ יָדַ֣עְתִּי הַיֹּ֗ום כִּ֠י לֻ֣א֯ אַבְשָׁלֹ֥ום חַי֙ וְכֻלָּ֤נוּ הַיֹּום֨ מֵתִ֔ים כִּי־אָ֖ז יָשָׁ֥ר בְּעֵינֶֽיךָ׃
10O	19	8		85210	וְעַתָּה֙ ק֣וּם צֵ֔א וְדַבֵּ֖ר עַל־לֵ֣ב עֲבָדֶ֑יךָ כִּי֩ בַֽיהֺוָ֨ה נִשְׁבַּ֜עְתִּי כִּי־אֵֽינְךָ֣ יֹוצֵ֗א אִם־יָלִ֨ין אִ֤ישׁ אִתְּךָ֨ הַלַּ֔יְלָה וְרָעָ֧ה לְךָ֣ זֹ֗את מִכָּל־הָרָעָה֨ אֲשֶׁר־בָּ֣אָה עָלֶ֔יךָ מִנְּעֻרֶ֖יךָ עַד־עָֽתָּה׃ ײ
10O	19	9		85220	וַיָּ֥קָם הַמֶּ֖לֶךְ וַיֵּ֣שֶׁב בַּשָּׁ֑עַר וּלְכָל־הָעָ֞ם הִגִּ֣ידוּ לֵאמֹ֗ר הִנֵּ֤ה הַמֶּ֨לֶךְ֨ יֹושֵׁ֣ב בַּשַּׁ֔עַר וַיָּבֹ֤א כָל־הָעָם֨ לִפְנֵ֣י הַמֶּ֔לֶךְ וְיִ֨שְׂרָאֵ֔ל נָ֖ס אִ֥ישׁ לְאֹֽהָלָֽיו׃ ױ
10O	19	10		85230	וַיְהִ֤י כָל־הָעָם֙ נָדֹ֔ון בְּכָל־שִׁבְטֵ֥י יִשְׂרָאֵ֖ל לֵאמֹ֑ר הַמֶּ֜לֶךְ הִצִּילָ֣נוּ ׀ מִכַּ֣ף אֹֽיְבֵ֗נוּ וְה֤וּא מִלְּטָ֨נוּ֨ מִכַּ֣ף פְּלִשְׁתִּ֔ים וְעַתָּ֛ה בָּרַ֥ח מִן־הָאָ֖רֶץ מֵעַ֥ל אַבְשָׁלֹֽום׃
10O	19	11		85240	וְאַבְשָׁלֹום֨ אֲשֶׁ֣ר מָשַׁ֣חְנוּ עָלֵ֔ינוּ מֵ֖ת בַּמִּלְחָמָ֑ה וְעַתָּ֗ה לָמָ֥ה אַתֶּ֛ם מַֽחֲרִשִׁ֖ים לְהָשִׁ֥יב אֶת־הַמֶּֽלֶךְ׃ ױ
10O	19	12		85250	וְהַמֶּ֣לֶךְ דָּוִ֗ד שָׁ֠לַח אֶל־צָדֹ֜וק וְאֶל־אֶבְיָתָ֣ר הַכֹּֽהֲנִים֮ לֵאמֹר֒ דַּבְּר֞וּ אֶל־זִקְנֵ֤י יְהוּדָה֙ לֵאמֹ֔ר לָ֤מָּה תִֽהְיוּ֙ אַֽחֲרֹנִ֔ים לְהָשִׁ֥יב אֶת־הַמֶּ֖לֶךְ אֶל־בֵּיתֹ֑ו וּדְבַר֨ כָּל־יִשְׂרָאֵ֔ל בָּ֥א אֶל־הַמֶּ֖לֶךְ אֶל־בֵּיתֹֽו׃
10O	19	13		85260	אַחַ֣י אַתֶּ֔ם עַצְמִ֥י וּבְשָׂרִ֖י אַתֶּ֑ם וְלָ֧מָּה תִֽהְי֛וּ אַֽחֲרֹנִ֖ים לְהָשִׁ֥יב אֶת־הַמֶּֽלֶךְ׃
10O	19	14		85270	וְלַֽעֲמָשָׂא֙ תֹּֽ֯מְר֔וּ הֲלֹ֛וא עַצְמִ֥י וּבְשָׂרִ֖י אָ֑תָּה כֹּ֣ה יַֽעֲשֶׂה־לִּ֤י אֱלֹהִים֙ וְכֹ֣ה יֹוסִ֔יף אִם־לֹ֠א שַׂר־צָבָ֞א תִּֽהְיֶ֧ה לְפָנַ֛י כָּל־הַיָּמִ֖ים תַּ֥חַת יֹואָֽב׃
10O	19	15		85280	וַיַּ֛ט אֶת־לְבַ֥ב כָּל־אִֽישׁ־יְהוּדָ֖ה כְּאִ֣ישׁ אֶחָ֑ד וַיִּשְׁלְחוּ֙ אֶל־הַמֶּ֔לֶךְ שׁ֥וּב אַתָּ֖ה וְכָל־עֲבָדֶֽיךָ׃
10O	19	16		85290	וַיָּ֣שָׁב הַמֶּ֔לֶךְ וַיָּבֹ֖א עַד־הַיַּרְדֵּ֑ן וִֽיהוּדָ֞ה בָּ֣א הַגִּלְגָּ֗לָה לָלֶ֨כֶת֙ לִקְרַ֣את הַמֶּ֔לֶךְ לְהַֽעֲבִ֥יר אֶת־הַמֶּ֖לֶךְ אֶת־הַיַּרְדֵּֽן׃
10O	19	17		85300	וַיְמַהֵ֗ר שִׁמְעִ֤י בֶן־גֵּרָא֨ בֶּן־הַיְמִינִ֔י אֲשֶׁ֖ר מִבַּֽחוּרִ֑ים וַיֵּ֨רֶד֨ עִם־אִ֣ישׁ יְהוּדָ֔ה לִקְרַ֖את הַמֶּ֥לֶךְ דָּוִֽד׃
10O	19	18		85310	וְאֶ֨לֶף אִ֣ישׁ עִמֹּו֮ מִבִּנְיָמִן֒ וְצִיבָ֗א נַ֚עַר בֵּ֣ית שָׁא֔וּל וַֽחֲמֵ֨שֶׁת עָשָׂ֥ר בָּנָ֛יו וְעֶשְׂרִ֥ים עֲבָדָ֖יו אִתֹּ֑ו וְצָֽלְח֥וּ הַיַּרְדֵּ֖ן לִפְנֵ֥י הַמֶּֽלֶךְ׃
10O	19	19		85320	וְעָֽבְרָ֣ה הָֽעֲבָרָ֗ה לַֽעֲבִיר֨ אֶת־בֵּ֣ית הַמֶּ֔לֶךְ וְלַעֲשֹׂ֥ות הַטֹּ֖וב בְּעֵינָ֑֯ו וְשִׁמְעִ֣י בֶן־גֵּרָ֗א נָפַל֨ לִפְנֵ֣י הַמֶּ֔לֶךְ בְּעָבְרֹ֖ו בַּיַּרְדֵּֽן׃
10O	19	20		85330	וַיֹּ֣אמֶר אֶל־הַמֶּ֗לֶךְ אַל־יַֽחֲשָׁב־לִ֣י אֲדֹנִי֮ עָֺון֒ וְאַל־תִּזְכֹּ֗ר אֵ֚ת אֲשֶׁ֣ר הֶֽעֱוָ֣ה עַבְדְּךָ֔ בַּיֹּ֕ום אֲשֶׁר־יָׄצָ֥֯ׄאׄ אֲדֹנִֽי־הַמֶּ֖לֶךְ מִירֽוּשָׁלִָ֑ם לָשׂ֥וּם הַמֶּ֖לֶךְ אֶל־לִבֹּֽו׃
10O	19	21		85340	כִּ֚י יָדַ֣ע עַבְדְּךָ֔ כִּ֖י אֲנִ֣י חָטָ֑אתִי וְהִנֵּֽה־בָ֣אתִי הַיֹּ֗ום רִאשֹׁון֨ לְכָל־בֵּ֣ית יֹוסֵ֔ף לָרֶ֕דֶת לִקְרַ֖את אֲדֹנִ֥י הַמֶּֽלֶךְ׃
10O	19	22		85350	וַיַּ֨עַן אֲבִישַׁ֤י בֶּן־צְרוּיָה֙ וַיֹּ֔אמֶר הֲתַ֣חַת זֹ֔את לֹ֥א יוּמַ֖ת שִׁמְעִ֑י כִּ֥י קִלֵּ֖ל אֶת־מְשִׁ֥יחַ יְהֺוָֽה׃
10O	19	23		85360	וַיֹּ֣אמֶר דָּוִ֗ד מַה־לִּ֤י וְלָכֶם֙ בְּנֵ֣י צְרוּיָ֔ה כִּי־תִֽהְיוּ־לִ֥י הַיֹּ֖ום לְשָׂטָ֑ן הַיֹּ֗ום י֤וּמַת אִישׁ֙ בְּיִשְׂרָאֵ֔ל כִּ֚י הֲלֹ֣וא יָדַ֔עְתִּי כִּ֥י הַיֹּ֖ום אֲנִי־מֶ֥לֶךְ עַל־יִשְׂרָאֵֽל׃
10O	19	24		85370	וַיֹּ֧אמֶר הַמֶּ֛לֶךְ אֶל־שִׁמְעִ֖י לֹ֣א תָמ֑וּת וַיִּשָּׁ֥בַע לֹ֖ו הַמֶּֽלֶךְ׃ ױ
10O	19	25		85380	וּמְפִב֨שֶׁת֨ בֶּן־שָׁא֔וּל יָרַ֖ד לִקְרַ֣את הַמֶּ֑לֶךְ וְלֹֽא־עָשָׂ֨ה רַגְלָ֜יו וְלֹֽא־עָשָׂ֣ה שְׂפָמֹ֗ו וְאֶת־בְּגָדָיו֙ לֹ֣א כִבֵּ֔ס לְמִן־הַיֹּום֙ לֶ֣כֶת הַמֶּ֔לֶךְ עַד־הַיֹּ֖ום אֲשֶׁר־בָּ֥א בְשָׁלֹֽום׃
10O	19	26		85390	וַיְהִ֛י כִּי־בָ֥א יְרֽוּשָׁלִַ֖ם לִקְרַ֣את הַמֶּ֑לֶךְ וַיֹּ֤אמֶר לֹו֙ הַמֶּ֔לֶךְ לָ֛מָּה לֹֽא־הָלַ֥כְתָּ עִמִּ֖י מְפִיבֽשֶׁת׃
10O	19	27		85400	וַיֹּאמַ֕ר אֲדֹנִ֥י הַמֶּ֖לֶךְ עַבְדִּ֣י רִמָּ֑נִי כִּֽי־אָמַר֨ עַבְדְּךָ֜ אֶחְבְּשָׁה־לִּי֩ הַֽחֲמֹ֨ור וְאֶרְכַּ֤ב עָלֶ֨יהָ֨ וְאֵלֵ֣ךְ אֶ֯ת־הַמֶּ֔לֶךְ כִּ֥י פִסֵּ֖חַ עַבְדֶּֽךָ׃
10O	19	28		85410	וַיְרַגֵּ֣ל בְּעַבְדְּךָ֔ אֶל־אֲדֹנִ֖י הַמֶּ֑לֶךְ וַֽאדֹנִ֤י הַמֶּ֨לֶךְ֙ כְּמַלְאַ֣ךְ הָֽאֱלֹהִ֔ים וַֽעֲשֵׂ֥ה הַטֹּ֖וב בְּעֵינֶֽיךָ׃
10O	19	29		85420	כִּי֩ לֹ֨א הָיָ֜ה כָּל־בֵּ֣ית אָבִ֗י כִּ֤י אִם־אַנְשֵׁי־מָ֨וֶת֨ לַֽאדֹנִ֣י הַמֶּ֔לֶךְ וַתָּ֨שֶׁת֙ אֶֽת־עַבְדְּךָ֔ בְּאֹֽכְלֵ֖י שֻׁלְחָנֶ֑ךָ וּמַה־יֶּשׁ־לִ֥י עֹוד֨ צְדָקָ֔ה וְלִזְעֹ֥ק עֹ֖וד אֶל־הַמֶּֽלֶךְ׃ ױ
10O	19	30		85430	וַיֹּ֤אמֶר לֹו֙ הַמֶּ֔לֶךְ לָ֛מָּה תְּדַבֵּ֥ר עֹ֖וד דְּבָרֶ֑יךָ אָמַ֕רְתִּי אַתָּ֣ה וְצִיבָ֔א תַּחְלְק֖וּ אֶת־הַשָּׂדֶֽה׃
10O	19	31		85440	וַיֹּ֤אמֶר מְפִיב֨שֶׁת֙ אֶל־הַמֶּ֔לֶךְ גַּ֖ם אֶת־הַכֹּ֥ל יִקָּ֑ח אַֽ֠חֲרֵי אֲשֶׁר־בָּ֞א אֲדֹנִ֥י הַמֶּ֛לֶך בְּשָׁלֹ֖ום אֶל־בֵּיתֹֽו׃ ױ
10O	19	32		85450	וּבַרְזִלַּי֙ הַגִּלְעָדִ֔י יָרַ֖ד מֵרֹֽגְלִ֑ים וַיַּֽעֲבֹ֤ר אֶת־הַמֶּ֨לֶךְ֙ הַיַּרְדֵּ֔ן לְשַׁלְּחֹ֖ו אֶת־בַ֯יַּרְדֵּֽן׃
10O	19	33		85460	וּבַרְזִלַּי֙ זָקֵ֣ן מְאֹ֔ד בֶּן־שְׁמֹנִ֖ים שָׁנָ֑ה וְהֽוּא־כִלְכַּ֤ל אֶת־הַמֶּ֙לֶךְ֙ בְּשִֽׁיבָתֹ֣ו בְמַֽחֲנַ֔יִם כִּ֛י אִֽישׁ־גָּדֹ֥ול ה֖וּא מְאֹֽד׃
10O	19	34		85470	וַיֹּ֥אמֶר הַמֶּ֖לֶךְ אֶל־בַּרְזִלָּ֑י אַתָּה֨ עֲבֹ֣ר אִתִּ֔י וְכִלְכַּלְתִּ֧י אֹֽתְךָ֛ עִמָּדִ֖י בִּירֽוּשָׁלִָֽם׃
10O	19	35		85480	וַיֹּ֥אמֶר בַּרְזִלַּ֖י אֶל־הַמֶּ֑לֶךְ כַּמָּ֗ה יְמֵי֨ שְׁנֵ֣י חַיַּ֔י כִּי־אֶֽעֱלֶ֥ה אֶת־הַמֶּ֖לֶךְ יְרֽוּשָׁלִָֽם׃
10O	19	36		85490	בֶּן־שְׁמֹנִ֣ים שָׁנָה֩ אָֽנֹכִ֨י הַיֹּ֜ום הַֽאֵדַ֣ע ׀ בֵּֽין־טֹ֣וב לְרָ֗ע אִם־יִטְעַ֤ם עַבְדְּךָ֙ אֶת־אֲשֶׁ֤ר אֹכַל֨ וְאֶת־אֲשֶׁ֣ר אֶשְׁתֶּ֔ה אִם־אֶשְׁמַ֣ע עֹ֔וד בְּקֹ֖ול שָׁרִ֣ים וְשָׁרֹ֑ות וְלָמָּה֩ יִֽהְיֶ֨ה עַבְדְּךָ֥ עֹוד֙ לְמַשָּׂ֔א אֶל־אֲדֹנִ֖י הַמֶּֽלֶךְ׃
10O	19	37		85500	כִּמְעַ֞ט יַֽעֲבֹ֧ר עַבְדְּךָ֛ אֶת־הַיַּרְדֵּ֖ן אֶת־הַמֶּ֑לֶךְ וְלָ֨מָּה֨ יִגְמְלֵ֣נִי הַמֶּ֔לֶךְ הַגְּמוּלָ֖ה הַזֹּֽאת׃
10O	19	38		85510	יָֽשָׁב־נָ֤א עַבְדְּךָ֨ וְאָמֻ֣ת בְּעִירִ֔י עִ֛ם קֶ֥בֶר אָבִ֖י וְאִמִּ֑י וְהִנֵּ֣ה ׀ עַבְדְּךָ֣ כִמְהָ֗ם יַֽעֲבֹר֙ עִם־אֲדֹנִ֣י הַמֶּ֔לֶךְ וַֽעֲשֵׂה־לֹ֕ו אֵ֥ת אֲשֶׁר־טֹ֖וב בְּעֵינֶֽיךָ׃
10O	19	39		85520	וַיֹּ֣אמֶר הַמֶּ֗לֶךְ אִתִּי֙ יַֽעֲבֹ֣ר כִּמְהָ֔ם וַֽאֲנִי֙ אֶֽעֱשֶׂה־לֹּ֔ו אֶת־הַטֹּ֖וב בְּעֵינֶ֑יךָ וְכֹ֛ל אֲשֶׁר־תִּבְחַ֥ר עָלַ֖י אֶֽעֱשֶׂה־לָּֽךְ׃
10O	19	40		85530	וַיַּֽעֲבֹ֧ר כָּל־הָעָ֛ם אֶת־הַיַּרְדֵּ֖ן וְהַמֶּ֣לֶךְ עָבָ֑ר וַיִּשַּׁ֨ק הַמֶּ֤לֶךְ לְבַרְזִלַּי֙ וַיְבָ֣רֲכֵ֔הוּ וַיָּ֖שָׁב לִמְקֹמֹֽו׃ ױ
10O	19	41		85540	וַיַּעֲבֹ֤ר הַמֶּ֙לֶךְ֙ הַגִּלְגָּ֔לָה וְכִמְהָ֖ן עָבַ֣ר עִמֹּ֑ו וְכָל־עַ֤ם יְהוּדָה֙ וֶֽ֯יעֱבִ֣ירוּ אֶת־הַמֶּ֔לֶךְ וְגַ֕ם חֲצִ֖י עַ֥ם יִשְׂרָאֵֽל׃
10O	19	42		85550	וְהִנֵּ֛ה כָּל־אִ֥ישׁ יִשְׂרָאֵ֖ל בָּאִ֣ים אֶל־הַמֶּ֑לֶךְ וַיֹּֽאמְר֣וּ אֶל־הַמֶּ֡לֶךְ מַדּוּעַ֩ גְּנָב֨וּךָ אַחֵ֜ינוּ אִ֣ישׁ יְהוּדָ֗ה וַיַּֽעֲבִ֨רוּ אֶת־הַמֶּ֤לֶךְ וְאֶת־בֵּיתֹו֙ אֶת־הַיַּרְדֵּ֔ן וְכָל־אַנְשֵׁ֥י דָוִ֖ד עִמֹּֽו׃ ױ
10O	19	43		85560	וַיַּעַן֩ כָּל־אִ֨ישׁ יְהוּדָ֜ה עַל־אִ֣ישׁ יִשְׂרָאֵ֗ל כִּֽי־קָרֹ֤וב הַמֶּ֙לֶךְ֙ אֵלַ֔י וְלָ֤מָּה זֶּה֙ חָרָ֣ה לְךָ֔ עַל־הַדָּבָ֖ר הַזֶּ֑ה הֶֽאָכֹ֤ול אָכַ֙לְנוּ֨ מִן־הַמֶּ֔לֶךְ אִם־נִשֵּׂ֥את נִשָּׂ֖א לָֽנוּ׃ ױ
10O	19	44		85570	וַיַּ֣עַן אִֽישׁ־יִשְׂרָאֵל֩ אֶת־אִ֨ישׁ יְהוּדָ֜ה וַיֹּ֗אמֶר עֶֽשֶׂר־יָדֹ֨ות לִ֣י בַמֶּלֶךְ֮ וְגַם־בְּדָוִד֮ אֲנִ֣י מִמְּךָ֒ וּמַדּ֨וּעַ֨ הֱקִלֹּתַ֔נִי וְלֹֽא־הָיָ֨ה דְבָרִ֥י רִאשֹׁ֛ון לִ֖י לְהָשִׁ֣יב אֶת־מַלְכִּ֑י וַיִּ֨קֶשׁ֨ דְּבַר־אִ֣ישׁ יְהוּדָ֔ה מִדְּבַ֖ר אִ֥ישׁ יִשְׂרָאֵֽל׃ ײ
10O	20	1		85580	וְשָׁ֨ם נִקְרָ֜א אִ֣ישׁ בְּלִיַּ֗עַל וּשְׁמֹ֛ו שֶׁ֥בַע בֶּן־בִּכְרִ֖י אִ֣ישׁ יְמִינִ֑י וַיִּתְקַ֣ע בַּשֹּׁופָ֗ר וַ֠יֹּאמֶר אֵֽין־לָ֨נוּ חֵ֜לֶק בְּדָוִ֗ד וְלֹ֤א נַֽחֲלָה־לָ֨נוּ֨ בְּבֶן־יִשַׁ֔י אִ֥ישׁ לְאֹֽהָלָ֖יו יִשְׂרָאֵֽל׃
10O	20	2		85590	וַיַּ֜עַל כָּל־אִ֤ישׁ יִשְׂרָאֵל֨ מֵֽאַחֲרֵ֣י דָוִ֔ד אַֽחֲרֵ֖י שֶׁ֣בַע בֶּן־בִּכְרִ֑י וְאִ֤ישׁ יְהוּדָה֙ דָּֽבְק֣וּ בְּמַלְכָּ֔ם מִן־הַיַּרְדֵּ֖ן וְעַד־יְרֽוּשָׁלִָֽם׃
10O	20	3		85600	וַיָּבֹ֨א דָוִ֣ד אֶל־בֵּיתֹו֮ יְרֽוּשָׁלִַם֒ וַיִּקַּ֣ח הַמֶּ֡לֶךְ אֵ֣ת עֶֽשֶׂר־נָשִׁ֣ים ׀ פִּֽלַגְשִׁ֡ים אֲשֶׁ֣ר הִנִּיחַ֩ לִשְׁמֹ֨ר הַבַּ֜יִת וַיִּתְּנֵ֤ם בֵּֽית־מִשְׁמֶ֨רֶת֨ וַֽיְכַלְכְּלֵ֔ם וַֽאֲלֵיהֶ֖ם לֹא־בָ֑א וַתִּֽהְיֶ֧ינָה צְרֻרֹ֛ות עַד־יֹ֥ום מֻתָ֖ן אַלְמְנ֥וּת חַיּֽוּת׃ ױ
10O	20	4		85610	וַיֹּ֤אמֶר הַמֶּ֨לֶךְ֨ אֶל־עֲמָשָׂ֔א הַזְעֶק־לִ֥י אֶת־אִֽישׁ־יְהוּדָ֖ה שְׁל֣שֶׁת יָמִ֑ים וְאַתָּ֖ה פֹּ֥ה עֲמֹֽד׃
10O	20	5		85620	וַיֵּ֥לֶךְ עֲמָשָׂ֖א לְהַזְעִ֣יק אֶת־יְהוּדָ֑ה וַיּ֕יֺחֶ֯ר מִן־הַמֹּועֵ֖ד אֲשֶׁ֥ר יְעָדֹֽו׃
10O	20	6		85630	וַיֹּ֤אמֶר דָּוִד֨ אֶל־אֲבִישַׁ֔י עַתָּ֗ה יֵ֧רַע לָ֛נוּ שֶׁ֥בַע בֶּן־בִּכְרִ֖י מִן־אַבְשָׁלֹ֑ום אַ֠תָּה קַ֞ח אֶת־עַבְדֵ֤י אֲדֹנֶ֨יךָ֨ וּרְדֹ֣ף אַֽחֲרָ֔יו פֶּן־מָ֥צָא לֹ֛ו עָרִ֥ים בְּצֻרֹ֖ות וְהִצִּ֥יל עֵינֵֽנוּ׃
10O	20	7		85640	וַיֵּֽצְא֤וּ אַֽחֲרָיו֙ אַנְשֵׁ֣י יֹואָ֗ב וְהַכְּרֵתִ֥י וְהַפְּלֵתִ֖י וְכָל־הַגִּבֹּרִ֑ים וַיֵּֽצְאוּ֨ מִיר֣וּשָׁלִַ֔ם לִרְדֹּ֕ף אַֽחֲרֵ֖י שֶׁ֥בַע בֶּן־בִּכְרִֽי׃
10O	20	8		85650	הֵ֗ם עִם־הָאֶ֤בֶן הַגְּדֹולָה֨ אֲשֶׁ֣ר בְּגִבְעֹ֔ון וַֽעֲמָשָׂ֖א בָּ֣א לִפְנֵיהֶ֑ם וְיֹואָ֞ב חָג֣וּר ׀ מִדֹּ֣ו לְבֻשׁ֗וּ וְעָלָ֞ו֯ חֲגֹ֥ור חֶ֨רֶב֙ מְצֻמֶּ֤דֶת עַל־מָתְנָיו֙ בְּתַעְרָ֔הּ וְה֥וּא יָצָ֖א וַתִּפֹּֽל׃
10O	20	9		85660	וַיֹּ֤אמֶר יֹואָב֙ לַֽעֲמָשָׂ֔א הֲשָׁלֹ֥ום אַתָּ֖ה אָחִ֑י וַתֹּ֜חֶ֯ז יַד־יְמִ֥ין יֹואָ֛ב בִּזְקַ֥ן עֲמָשָׂ֖א לִנְשָׁק־לֹֽו׃
10O	20	10		85670	וַֽעֲמָשָׂ֨א לֹֽא־נִשְׁמַ֜ר בַּחֶ֣רֶב ׀ אֲשֶׁ֣ר בְּיַד־יֹואָ֗ב וַיַּכֵּהוּ֩ בָ֨הּ אֶל־הַחֹ֜מֶשׁ וַיִּשְׁפֹּ֨ךְ מֵעָ֥יו אַ֛רְצָה וְלֹא־שָׁ֥נָה לֹ֖ו וַיָּמֹ֑ת וְיֹואָב֨ וַֽאֲבִישַׁ֣י אָחִ֔יו רָדַ֕ף אַֽחֲרֵ֖י שֶׁ֥בַע בֶּן־בִּכְרִֽי׃
10O	20	11		85680	וְאִישׁ֙ עָמַ֣ד עָלָ֔יו מִנַּֽעֲרֵ֖י יֹואָ֑ב וַיֹּ֗אמֶר מִי֩ אֲשֶׁ֨ר חָפֵ֧ץ בְּיֹואָ֛ב וּמִ֥י אֲשֶׁר־לְדָוִ֖ד אַֽחֲרֵ֥י יֹואָֽב׃
10O	20	12		85690	וַֽעֲמָשָׂ֛א מִתְגֹּלֵ֥ל בַּדָּ֖ם בְּתֹ֣וךְ הַֽמְּסִלָּ֑ה וַיַּ֨רְא הָאִ֜ישׁ כִּֽי־עָמַ֣ד כָּל־הָעָ֗ם וַיַּסֵּב֩ אֶת־עֲמָשָׂ֨א מִן־הַֽמְסִלָּ֤ה הַשָּׂדֶה֨ וַיַּשְׁלֵ֤ךְ עָלָיו֙ בֶּ֔גֶד כַּֽאֲשֶׁ֣ר רָאָ֔ה כָּל־הַבָּ֥א עָלָ֖יו וְעָמָֽד׃
10O	20	13		85700	כַּֽאֲשֶׁ֥ר הֹגָ֖ה מִן־הַֽמְסִלָּ֑ה עָבַ֤ר כָּל־אִישׁ֙ אַֽחֲרֵ֣י יֹואָ֔ב לִרְדֹּ֕ף אַֽחֲרֵ֖י שֶׁ֥בַע בֶּן־בִּכְרִֽי׃
10O	20	14		85710	וַיַּעֲבֹ֞ר בְּכָל־שִׁבְטֵ֣י יִשְׂרָאֵ֗ל אָבֵ֛לָה וּבֵ֥ית מַֽעֲכָ֖ה וְכָל־הַבֵּרִ֑ים וַיִּקָּ֣לֲ֯ה֔וּ וַיָּבֹ֖אוּ אַף־אַֽחֲרָֽיו׃
10O	20	15		85720	וַיָּבֹ֜אוּ וַיָּצֻ֣רוּ עָלָ֗יו בְּאָבֵ֨לָה֨ בֵּ֣ית הַמַּֽעֲכָ֔ה וַיִּשְׁפְּכ֤וּ סֹֽלְלָה֙ אֶל־הָעִ֔יר וַתַּֽעֲמֹ֖ד בַּחֵ֑ל וְכָל־הָעָם֙ אֲשֶׁ֣ר אֶת־יֹואָ֔ב מַשְׁחִיתִ֖ם לְהַפִּ֥יל הַֽחֹומָֽה׃
10O	20	16		85730	וַתִּקְרָ֛א אִשָּׁ֥ה חֲכָמָ֖ה מִן־הָעִ֑יר שִׁמְע֤וּ שִׁמְעוּ֙ אִמְרוּ־נָ֣א אֶל־יֹואָ֔ב קְרַ֣ב עַד־הֵ֔נָּה וַֽאֲדַבְּרָ֖ה אֵלֶֽיךָ׃
10O	20	17		85740	וַיִּקְרַ֣ב אֵלֶ֔יהָ וַתֹּ֧אמֶר הָאִשָּׁ֛ה הַֽאַתָּ֥ה יֹואָ֖ב וַיֹּ֣אמֶר אָ֑נִי וַתֹּ֣אמֶר לֹ֗ו שְׁמַע֨ דִּבְרֵ֣י אֲמָתֶ֔ךָ וַיֹּ֖אמֶר שֹׁמֵ֥עַ אָנֹֽכִי׃
10O	20	18		85750	וַתֹּ֖אמֶר לֵאמֹ֑ר דַּבֵּ֨ר יְדַבְּר֤וּ בָרִֽאשֹׁנָה֙ לֵאמֹ֔ר שָׁאֹ֧ול יְשָֽׁאֲל֛וּ בְּאָבֵ֖ל וְכֵ֥ן הֵתַֽמּוּ׃
10O	20	19		85760	אָֽנֹכִ֕י שְׁלֻמֵ֖י אֱמוּנֵ֣י יִשְׂרָאֵ֑ל אַתָּ֣ה מְבַקֵּ֗שׁ לְהָמִ֨ית עִ֤יר וְאֵם֙ בְּיִשְׂרָאֵ֔ל לָ֥מָּה תְבַלַּ֖ע נַחֲלַ֥ת יְהֺוָֽה׃ ױ
10O	20	20		85770	וַיַּ֥עַן יֹואָ֖ב וַיֹּאמַ֑ר חָלִ֤ילָה חָלִ֨ילָה֙ לִ֔י אִם־אֲבַלַּ֖ע וְאִם־אַשְׁחִֽית׃
10O	20	21		85780	לֹא־כֵ֣ן הַדָּבָ֗ר כִּ֡י אִישׁ֩ מֵהַ֨ר אֶפְרַ֜יִם שֶׁ֧בַע בֶּן־בִּכְרִ֣י שְׁמֹ֗ו נָשָׂ֤א יָדֹו֙ בַּמֶּ֣לֶךְ בְּדָוִ֔ד תְּנֽוּ־אֹתֹ֣ו לְבַדֹּ֔ו וְאֵֽלְכָ֖ה מֵעַ֣ל הָעִ֑יר וַתֹּ֤אמֶר הָֽאִשָּׁה֨ אֶל־יֹואָ֔ב הִנֵּ֥ה רֹאשֹׁ֛ו מֻשְׁלָ֥ךְ אֵלֶ֖יךָ בְּעַ֥ד הַֽחֹומָֽה׃
10O	20	22		85790	וַתָּבֹוא֩ הָֽאִשָּׁ֙ה אֶל־כָּל־הָעָ֜ם בְּחָכְמָתָ֗הּ וַיִּכְרְת֞וּ אֶת־רֹ֨אשׁ שֶׁ֤בַע בֶּן־בִּכְרִי֙ וַיַּשְׁלִ֣כוּ אֶל־יֹואָ֔ב וַיִּתְקַע֨ בַּשֹּׁפָ֔ר וַיָּפֻ֥צוּ מֵֽעַל־הָעִ֖יר אִ֣ישׁ לְאֹֽהָלָ֑יו וְיֹואָ֛ב שָׁ֥ב יְרֽוּשָׁלִַ֖ם אֶל־הַמֶּֽלֶךְ׃ ױ
10O	20	23		85800	וְיֹואָ֕ב אֶל־כָּל־הַצָּבָ֖א יִשְׂרָאֵ֑ל וּבְנָיָה֨ בֶּן־יְהֹ֣ויָדָ֔ע עַל־הַכְּרֵיִ֖֯ וְעַל־הַפְּלֵתִֽי׃
10O	20	24		85810	וַֽאֲדֹרָ֖ם עַל־הַמַּ֑֯ס וִיהֹֽושָׁפָ֥ט בֶּן־אֲחִיל֖וּד הַמַּזְכִּֽיר׃
10O	20	25		85820	וּשְׁיָ֖֯א סֹפֵ֑ר וְצָדֹ֥וק וְאֶבְיָתָ֖ר כֹּֽהֲנִֽים׃
10O	20	26		85830	וְגַ֗ם עִירָא֨ הַיָּ֣אִרִ֔י הָיָ֥ה כֹהֵ֖ן לְדָוִֽד׃ ײ
10O	21	1		85840	וַיְהִ֣י רָעָב֩ בִּימֵ֨י דָוִ֜ד שָׁל֣שׁ שָׁנִ֗ים שָׁנָה֙ אַֽחֲרֵ֣י שָׁנָ֔ה וַיְבַקֵּ֥שׁ דָּוִ֖ד אֶת־פְּנֵ֣י יְהֺוָ֑ה ױ֯ וַיֹּ֣אמֶר יְהֺוָ֗ה אֶל־שָׁאוּל֨ וְאֶל־בֵּ֣ית הַדָּמִ֔ים עַ֥ל אֲשֶׁר־הֵמִ֖ית אֶת־הַגִּבְעֹנִֽים׃
10O	21	2		85850	וַיִּקְרָ֥א הַמֶּ֛לֶךְ לַגִּבְעֹנִ֖ים וַיֹּ֣אמֶר אֲלֵיהֶ֑ם וְהַגִּבְעֹנִ֞ים לֹ֣א מִבְּנֵ֧י יִשְׂרָאֵ֣ל הֵ֗מָּה כִּ֚י אִם־מִיֶּ֣תֶר הָֽאֱמֹרִ֔י וּבְנֵ֤י יִשְׂרָאֵל֨ נִשְׁבְּע֣וּ לָהֶ֔ם וַיְבַקֵּ֤שׁ שָׁאוּל֨ לְהַכֹּתָ֔ם בְּקַנֹּאתֹ֥ו לִבְנֵֽי־יִשְׂרָאֵ֖ל וִֽיהוּדָֽה׃
10O	21	3		85860	וַיֹּ֤אמֶר דָּוִד֨ אֶל־הַגִּבְעֹנִ֔ים מָ֥ה אֶֽעֱשֶׂ֖ה לָכֶ֑ם וּבַמָּ֣ה אֲכַפֵּ֔ר וּבָֽרְכ֖וּ אֶת־נַֽחֲלַ֥ת יְהֺוָֽה׃
10O	21	4		85870	וַיֹּ֧אמְרוּ לֹ֣ו הַגִּבְעֹנִ֗ים אֵֽין־לָ֜יּ֯ כֶּ֤סֶף וְזָהָב֨ עִם־שָׁא֣וּל וְעִם־בֵּיתֹ֔ו וְאֵֽין־לָ֥נוּ אִ֖ישׁ לְהָמִ֣ית בְּיִשְׂרָאֵ֑ל וַיֹּ֛אמֶר מָה־אַתֶּ֥ם אֹֽמְרִ֖ים אֶֽעֱשֶׂ֥ה לָכֶֽם׃
10O	21	5		85880	וַיֹּֽאמְרוּ֙ אֶל־הַמֶּ֔לֶךְ הָאִישׁ֨ אֲשֶׁ֣ר כִּלָּ֔נוּ וַֽאֲשֶׁ֖ר דִּמָּה־לָ֑נוּ נִשְׁמַ֕דְנוּ מֵֽהִתְיַצֵּ֖ב בְּכָל־גְּבֻ֥ל יִשְׂרָאֵֽל׃
10O	21	6		85890	יֻנ֯תַּן־לָ֜נוּ שִׁבְעָ֤ה אֲנָשִׁים֙ מִבָּנָ֔יו וְהֹוקַֽעֲנוּם֨ לַֽיהֺוָ֔ה בְּגִבְעַ֥ת שָׁא֖וּל בְּחִ֣יר יְהֺוָ֑ה ײ֯ וַיֹּ֥אמֶר הַמֶּ֖לֶךְ אֲנִ֥י אֶתֵּֽן׃
10O	21	7		85900	וַיַּחְמֹ֣ל הַמֶּ֔לֶךְ עַל־מְפִיב֖שֶׁת בֶּן־יְהֹֽונָתָ֣ן בֶּן־שָׁא֑וּל עַל־שְׁבֻעַ֤ת יְהֺוָה֨ אֲשֶׁ֣ר בֵּֽינֹתָ֔ם בֵּ֣ין דָּוִ֔ד וּבֵ֖ין יְהֹֽונָתָ֥ן בֶּן־שָׁאֽוּל׃
10O	21	8		85910	וַיִּקַּ֣ח הַמֶּ֡לֶךְ אֶת־שְׁ֠נֵי בְּנֵ֨י רִצְפָּ֤ה בַת־אַיָּה֙ אֲשֶׁ֣ר יָלְדָ֣ה לְשָׁא֔וּל אֶת־אַרְמֹנִ֖י וְאֶת־מְפִב֑שֶׁת וְאֶת־חֲמֵ֗שֶׁת בְּנֵי֨ מִיכַ֣ל בַּת־שָׁא֔וּל אֲשֶׁ֧ר יָלְדָ֛ה לְעַדְרִיאֵ֥ל בֶּן־בַּרְזִלַּ֖י הַמְּחֹֽלָתִֽי׃
10O	21	9		85920	וַיִּתְּנֵ֞ם בְּיַ֣ד הַגִּבְעֹנִ֗ים וַיֹּֽקִיעֻ֤ם בָּהָר֨ לִפְנֵ֣י יְהֺוָ֔ה וַיִּפְּל֥וּ שְׁבַעְתָּ֖י֯ם יָ֑חַד וְהֵ֨םָּ הֻֽמְת֜וּ בִּימֵ֤י קָצִיר֙ בָּרִ֣אשֹׁנִ֔ים ִ֯תְּחִלַּ֖ת קְצִ֥יר שְׂעֹרִֽים׃
10O	21	10		85930	וַתִּקַּ֣ח רִצְפָּה֩ בַת־אַ֙יָּה אֶת־הַשַּׂ֜ק וַתַּטֵּ֨הוּ לָ֤הּ אֶל־הַצּוּר֙ מִתְּחִלַּ֣ת קָצִ֔יר עַ֛ד נִתַּךְ־מַ֥יִם עֲלֵיהֶ֖ם מִן־הַשָּׁמָ֑יִם וְלֹֽא־נָֽתְנָה֩ עֹ֨וף הַשָּׁמַ֜יִם לָנ֤וּחַ עֲלֵיהֶם֨ יֹומָ֔ם וְאֶת־חַיַּ֥ת הַשָּׂדֶ֖ה לָֽיְלָה׃ ײ
10O	21	11		85940	וַיֻּגַּ֖ד לְדָוִ֑ד אֵ֧ת אֲשֶׁר־עָֽשְׂתָ֛ה רִצְפָּ֥ה בַת־אַיָּ֖ה פִּלֶ֥גֶשׁ שָׁאֽוּל׃
10O	21	12		85950	וַיֵּ֣לֶךְ דָּוִ֗ד וַיִּקַּ֞ח אֶת־עַצְמֹ֤ות שָׁאוּל֨ וְאֶת־עַצְמֹות֨ יְהֹֽונָתָ֣ן בְּנֹ֔ו מֵאֵ֕ת בַּֽעֲלֵ֖י יָבֵ֣ישׁ גִּלְעָ֑ד אֲשֶׁר֩ גָּֽנְב֨וּ אֹתָ֜ם מֵֽרְחֹ֣ב בֵּֽית־שַׁ֗ן אֲשֶׁ֨ר תְּלָוּ֥֯ם שָׁ֨םּ֨֯ ה֯פְּלִשְׁתִּ֔ים בְּיֹ֨ום הַכֹּ֧ות פְּלִשְׁתִּ֛ים אֶת־שָׁא֖וּל בַּגִּלְבֹּֽעַ׃
10O	21	13		85960	וַיַּ֤עַל מִשָּׁם֙ אֶת־עַצְמֹ֣ות שָׁא֔וּל וְאֶת־עַצְמֹ֖ות יְהֹֽונָתָ֣ן בְּנֹ֑ו וַיַּ֣אַסְפ֔וּ אֶת־עַצְמֹ֖ות הַמּֽוּקָעִֽים׃
10O	21	14		85970	וַיִּקְבְּר֣וּ אֶת־עַצְמֹֽות־שָׁא֣וּל וִיהֹֽונָֽתָן־בְּ֠נֹו בְּאֶ֨רֶץ בִּנְיָמִ֜ן בְּצֵלָ֗ע בְּקֶ֨בֶר֨ קִ֣ישׁ אָבִ֔יו וַיַּ֣עֲשׂ֔וּ כֹּ֥ל אֲשֶׁר־צִוָּ֖ה הַמֶּ֑לֶךְ וַיֵּֽעָתֵ֧ר אֱלֹהִ֛ים לָאָ֖רֶץ אַֽחֲרֵי־כֵֽן׃ ױ
10O	21	15		85980	וַתְּהִי־עֹ֧וד מִלְחָמָ֛ה לַפְּלִשְׁתִּ֖ים אֶת־יִשְׂרָאֵ֑ל וַיֵּ֨רֶד דָּוִ֜ד וַֽעֲבָדָ֥יו עִמֹּ֛ו וַיִּלָּֽחֲמ֥וּ אֶת־פְּלִשְׁתִּ֖ים וַיָּ֥עַף דָּוִֽד׃
10O	21	16		85990	וְיִשְׁבִּ֨ו֯ בְּנֹ֜ב אֲשֶׁ֣ר ׀ בִּֽילִידֵ֣י הָֽרָפָ֗ה וּמִשְׁקַ֤ל קֵינֹו֙ שְׁל֤שׁ מֵאֹות֨ מִשְׁקַ֣ל נְח֔שֶׁת וְה֖וּא חָג֣וּר חֲדָשָׁ֑ה וַיֹּ֖אמֶר לְהַכֹּ֥ות אֶת־דָּוִֽד׃
10O	21	17		86000	וַיַּֽעֲזָר־לֹו֙ אֲבִישַׁ֣י בֶּן־צְרוּיָ֔ה וַיַּ֥ךְ אֶת־הַפְּלִשְׁתִּ֖י וַיְמִיתֵ֑הוּ אָ֣ז נִשְׁבְּעוּ֩ אַנְשֵֽׁי־דָוִ֨ד לֹ֜ו לֵאמֹ֗ר לֹֽא־תֵצֵ֨א עֹ֤וד אִתָּ֨נוּ֨ לַמִּלְחָמָ֔ה וְלֹ֥א תְכַבֶּ֖ה אֶת־נֵ֥ר יִשְׂרָאֵֽל׃ ױ
10O	21	18		86010	וַיְהִי֙ אַֽחֲרֵי־כֵ֔ן וַתְּהִי־עֹ֧וד הַמִּלְחָמָ֛ה בְּגֹ֖ב עִם־פְּלִשְׁתִּ֑ים אָ֣ז הִכָּ֗ה סִבְּכַי֙ הַחֻ֣שָׁתִ֔י אֶת־סַ֕ף אֲשֶׁ֖ר בִּֽילִדֵ֥י הָֽרָפָֽה׃ ױ
10O	21	19		86020	וַתְּהִי־עֹ֧וד הַמִּלְחָמָ֛ה בְּגֹ֖וב עִם־פְּלִשְׁתִּ֑ים וַיַּ֡ךְ אֶלְחָנָן֩ בֶּן־יַֽעְ֙רֵ֯י אֹֽרְגִ֜ים בֵּ֣ית הַלַּחְמִ֗י אֵ֚ת גָּלְיָ֣ת הַגִּתִּ֔י וְעֵ֣ץ חֲנִיתֹ֔ו כִּמְנֹ֖ור אֹֽרְגִֽים׃ ױ
10O	21	20		86030	וַתְּהִי־עֹ֥וד מִלְחָמָ֖ה בְּגַ֑ת וַיְהִ֣י ׀ אִ֣ישׁ מָדיֺ֯֗ן וְאֶצְבְּעֹ֣ת יָדָיו֩ וְאֶצְבְּעֹ֨ות רַגְלָ֜יו שֵׁ֣שׁ וָשֵׁ֗שׁ עֶשְׂרִ֤ים וְאַרְבַּע֙ מִסְפָּ֔ר וְגַם־ה֖וּא יֻלַּ֥ד לְהָֽרָפָֽה׃
10O	21	21		86040	וַיְחָרֵ֖ף אֶת־יִשְׂרָאֵ֑ל וַיַּכֵּ֨הוּ֨ יְהֹ֣ונָתָ֔ן בֶּן־שִׁמְעָ֖י֯ אֲחִ֥י דָוִֽד׃
10O	21	22		86050	אֶת־אַרְבַּ֥עַת אֵ֛לֶּה יֻלְּד֥וּ לְהָֽרָפָ֖ה בְּגַ֑ת וַיִּפְּל֥וּ בְיַד־דָּוִ֖ד וּבְיַ֥ד עֲבָדָֽיו׃ ײ
10O	22	1		86060	֯וַיְדַבֵּ֤ר דָּוִד֙ לַֽיהֺוָ֔ה אֶת־דִּבְרֵ֖י הַשִּׁירָ֣ה הַזֹּ֑את בְּיֹום֩ הִצִּ֨יל יְהֺוָ֥ה אֹתֹ֛ו מִכַּ֥ף כָּל־אֹֽיְבָ֖יו וּמִכַּ֥ף שָׁאֽוּל׃ ײ
10O	22	2		86070	֯וַיֹּאמַ֑ר יְהֺוָ֛ה סַֽלְעִ֥י וּמְצֻֽדָתִ֖י וּמְפַלְטִי־לִֽי׃
10O	22	3		86080	אֱלֹהֵ֥י צוּרִ֖י אֶֽחֱסֶה־בֹּ֑ו מָֽגִנִּ֞י וְקֶ֣רֶן יִשְׁעִ֗י מִשְׂגַּבִּי֙ וּמְנוּסִ֔י מֽשִׁעִ֕י מֵֽחָמָ֖ס תּֽשִׁעֵֽנִי׃
10O	22	4		86090	מְהֻלָּ֖ל אֶקְרָ֣א יְהֺוָ֑ה וּמֵאֹֽיְבַ֖י אִוָּשֵֽׁעַ׃
10O	22	5		86100	כִּ֥י אֲפָפֻ֖נִי מִשְׁבְּרֵי־מָ֑וֶת נַֽחֲלֵ֥י בְלִיַּ֖עַל יְבַֽעֲתֻֽנִי׃
10O	22	6		86110	חֶבְלֵ֥י שְׁאֹ֖ול סַבֻּ֑נִי קִדְּמֻ֖נִי מֹֽקְשֵׁי־מָֽוֶת׃
10O	22	7		86120	בַּצַּר־לִי֨ אֶקְרָ֣א יְהֺוָ֔ה וְאֶל־אֱלֹהַ֖י אֶקְרָ֑א וַיִּשְׁמַ֤ע מֵהֵֽיכָלֹו֙ קֹולִ֔י וְשַׁוְעָתִ֖י בְּאָזְנָֽיו׃
10O	22	8		86130	וִַ֯תְגָּעַשׁ֨ וַתִּרְעַ֣שׁ הָאָ֔רֶץ מֹֽוסְדֹ֥ות הַשָּׁמַ֖יִם יִרְגָּ֑זוּ וַיִּתְגָּֽעֲשׁ֖וּ כִּי־חָ֥רָה לֹֽו׃
10O	22	9		86140	עָלָ֤ה עָשָׁן֙ בְּאַפֹּ֔ו וְאֵ֥שׁ מִפִּ֖יו תֹּאכֵ֑ל גֶּֽחָלִ֖ים בָּֽעֲר֥וּ מִמֶּֽנּוּ׃
10O	22	10		86150	וַיֵּ֥ט שָׁמַ֖יִם וַיֵּרַ֑ד וַֽעֲרָפֶ֖ל תַּ֥חַת רַגְלָֽיו׃
10O	22	11		86160	וַיִּרְכַּ֥ב עַל־כְּר֖וּב וַיָּעֹ֑ף וַיֵּרָ֖א עַל־כַּנְפֵי־רֽוּחַ׃
10O	22	12		86170	וַיָּ֥שֶׁת ח֛שֶׁךְ סְבִֽיבֹתָ֖יו סֻכֹּ֑ות חַשְׁרַת־מַ֖יִם עָבֵ֥י שְׁחָקִֽים׃
10O	22	13		86180	מִנֹּ֖גַהּ נֶגְדֹּ֑ו בָּֽעֲר֖וּ גַּֽחֲלֵי־אֵֽשׁ׃
10O	22	14		86190	יַרְעֵ֥ם מִן־שָׁמַ֖יִם יְהֺוָ֑ה וְעֶלְיֹ֖ון יִתֵּ֥ן קֹולֹֽו׃
10O	22	15		86200	וַיִּשְׁלַ֥ח חִצִּ֖ים וַיְפִיצֵ֑ם בָּרָ֖ק וַיָּהֹֽמ֯ם׃
10O	22	16		86210	וַיֵּֽרָאוּ֨ אֲפִ֣קֵי יָ֔ם יִגָּל֖וּ מֹֽסְדֹ֣ות תֵּבֵ֑ל בְּגַֽעֲרַ֣ת יְהֺוָ֔ה מִנִּשְׁמַ֖ת ר֥וּחַ אַפֹּֽו׃
10O	22	17		86220	יִשְׁלַ֥ח מִמָּרֹ֖ום יִקָּחֵ֑נִי יַמְשֵׁ֖נִי מִמַּ֥יִם רַבִּֽים׃
10O	22	18		86230	יַצִּילֵ֕נִי מֵאֹֽיְבִ֖י עָ֑ז מִשּׂ֣נְאַ֔י כִּ֥י אָֽמְצ֖וּ מִמֶּֽנִּי׃
10O	22	19		86240	יְקַדְּמֻ֖נִי בְּיֹ֣ום אֵידִ֑י וַיְהִ֧י יְהֺוָ֛ה מִשְׁעָ֖ן לִֽי׃
10O	22	20		86250	וַיֹּצֵ֥א לַמֶּרְחָ֖ב אֹתִ֑י יְחַלְּצֵ֖נִי כִּֽי־חָ֥פֵֽץ בִּֽי׃
10O	22	21		86260	יִגְמְלֵ֥נִי יְהֺוָ֖ה כְּצִדְקָתִ֑י כְּבֹ֥ר יָדַ֖י יָשִׁ֥יב לִֽי׃
10O	22	22		86270	כִּ֥י שָׁמַ֖רְתִּי דַּרְכֵ֣י יְהֺוָ֑ה וְלֹ֥א רָשַׁ֖עְתִּי מֵֽאֱלֹהָֽי׃
10O	22	23		86280	כִּ֥י כָל־מִשְׁפָּטָ֖ו֯ לְנֶגְדִּ֑י וְחֻקֹּתָ֖יו לֹֽא־אָס֥וּר מִמֶּֽנָּה׃
10O	22	24		86290	וָאֶֽהְיֶ֥ה תָמִ֖ים לֹ֑ו וָֽאֶשְׁתַּמְּרָ֖ה מֵֽעֲֺונִֽי׃
10O	22	25		86300	וַיָּ֧שֶׁב יְהֺוָ֛ה לִ֖י כְּצִדְקָתִ֑י כְּבֹרִ֖י לְנֶ֥גֶד עֵינָֽיו׃
10O	22	26		86310	עִם־חָסִ֖יד תִּתְחַסָּ֑ד עִם־גִּבֹּ֥ור תָּמִ֖ים תִּתַּמָּֽם׃
10O	22	27		86320	עִם־נָבָ֖ר תִּתָּבָ֑ר וְעִם־עִקֵּ֖שׁ תִּתַּפָּֽל׃
10O	22	28		86330	וְאֶת־עַ֥ם עָנִ֖י תֹּושִׁ֑יעַ וְעֵינֶ֖יךָ עַל־רָמִ֥ים תַּשְׁפִּֽיל׃
10O	22	29		86340	כִּֽי־אַתָּ֥ה נֵירִ֖י יְהֺוָ֑ה וַֽיהֺוָ֖ה יַגִּ֥יהַּ חָשְׁכִּֽי׃
10O	22	30		86350	כִּ֥י בְכָ֖ה אָר֣וּץ גְּד֑וּד בֵּֽאלֹהַ֖י אֲדַלֶּג־שֽׁוּר׃
10O	22	31		86360	הָאֵ֖ל תָּמִ֣ים דַּרְכֹּ֑ו אִמְרַ֤ת יְהֺוָה֙ צְרוּפָ֔ה מָגֵ֣ן ה֔וּא לְכֹ֖ל הַֽחֹסִ֥ים בֹּֽו׃
10O	22	32		86370	כִּ֥י מִי־אֵ֖ל מִבַּלְעֲדֵ֣י יְהֺוָ֑ה וּמִ֥י צ֖וּר מִבַּלְעֲדֵ֥י אֱלֹהֵֽינוּ׃
10O	22	33		86380	הָאֵ֥ל מָֽעוּזִּ֖י חָ֑יִל וַיַּתֵּ֥ר תָּמִ֖ים דַּרְכִּֽו֯׃
10O	22	34		86390	מְשַׁוֶּ֥ה רַגְלַ֖יו֯ כָּֽאַיָּלֹ֑ות וְעַל־בָּֽמֹתַ֖י יַֽעֲמִדֵֽנִי׃
10O	22	35		86400	מְלַמֵּ֥ד יָדַ֖י לַמִּלְחָמָ֑ה וְנִחַ֥ת קֶֽשֶׁת־נְחוּשָׁ֖ה זְרֹֽעֹתָֽי׃
10O	22	36		86410	וַתִּתֶּן־לִ֖י מָגֵ֣ן יִשְׁעֶ֑ךָ וַֽעֲנֹֽתְךָ֖ תַּרְבֵּֽנִי׃
10O	22	37		86420	תַּרְחִ֥יב צַֽעֲדִ֖י תַּחְתֵּ֑נִי וְלֹ֥א מָֽעֲד֖וּ קַרְסֻלָּֽי׃
10O	22	38		86430	אֶרְדְּפָ֥ה אֹֽיְבַ֖י וָֽאַשְׁמִידֵ֑ם וְלֹ֥א אָשׁ֖וּב עַד־כַּלֹּתָֽם׃
10O	22	39		86440	וָֽאֲכַלֵּ֥ם וָֽאֶמְחָצֵ֖ם וְלֹ֣א יְקוּמ֑וּן וַיִּפְּל֖וּ תַּ֥חַת רַגְלָֽי׃
10O	22	40		86450	וַתַּזְ֯רֵ֥נִי חַ֖יִל לַמִּלְחָמָ֑ה תַּכְרִ֥יעַ קָמַ֖י תַּחְתֵּֽנִי׃
10O	22	41		86460	וְאֹ֣יְבַ֔י תַּ֥תָּה לִּ֖י עֹ֑רֶף מְשַׂנְאַ֖י וָאַצְמִיתֵֽם׃
10O	22	42		86470	יִשְׁע֖וּ וְאֵ֣ין משִׁ֑יעַ אֶל־יְהֺוָ֖ה וְלֹ֥א עָנָֽם׃
10O	22	43		86480	וְאֶשְׁחָקֵ֖ם כַּֽעֲפַר־אָ֑רֶץ כְּטִֽיט־חוּצֹ֥ות אֲדִקֵּ֖ם אֶרְקָעֵֽם׃
10O	22	44		86490	וַ֨תְּפַלְּטֵ֔נִי מֵֽרִיבֵ֖י עַמִּ֑י תִּשְׁמְרֵ֨נִי֨ לְרֹ֣אשׁ גֹּויִ֔ם עַ֥ם לֹֽא־יָדַ֖עְתִּי יַֽעַבְדֻֽנִי׃
10O	22	45		86500	בְּנֵ֥י נֵכָ֖ר יִתְכַּֽחֲשׁוּ־לִ֑י לִשְׁמֹ֥ועַ אֹ֖זֶן יִשָּׁ֥מְעוּ לִֽי׃
10O	22	46		86510	בְּנֵ֥י נֵכָ֖ר יִבֹּ֑לוּ וְיַחְגְּר֖וּ מִמִּסְגְּרֹותָֽם׃
10O	22	47		86520	חַי־יְהֺוָ֖ה וּבָר֣וּךְ צוּרִ֑י וְיָרֻ֕ם אֱלֹהֵ֖י צ֥וּר יִשְׁעִֽי׃
10O	22	48		86530	הָאֵ֕ל הַנֹּתֵ֥ן נְקָמֹ֖ת לִ֑י וּמֹרִ֥יד עַמִּ֖ים תַּחְתֵּֽנִי׃
10O	22	49		86540	וּמֹֽוצִיאִ֖י מֵאֹֽיְבָ֑י וּמִקָּמַי֙ תְּרֹ֣ומְמֵ֔נִי מֵאִ֥ישׁ חֲמָסִ֖ים תַּצִּילֵֽנִי׃
10O	22	50		86550	עַל־כֵּ֛ן אֹֽודְךָ֥ יְהֺוָ֖ה בַּגֹּויִ֑ם וּלְשִׁמְךָ֖ אֲזַמֵּֽר׃
10O	22	51		86560	מִגְדֹּ֖י֯ל יְשׁוּעֹ֣ות מַלְכֹּ֑ו וְעֹֽשֶׂה־חֶ֧סֶד לִמְשִׁיחֹ֛ו לְדָוִ֥ד וּלְזַרְעֹ֖ו עַד־עֹולָֽם׃֯
10O	23	1		86570	וְאֵ֛לֶּה דִּבְרֵ֥י דָוִ֖ד הָאַֽחֲרֹנִ֑ים נְאֻ֧ם דָּוִ֣ד בֶּן־יִשַׁ֗י וּנְאֻ֤ם הַגֶּ֨בֶר֙ הֻ֣קַם עָ֔֯ל מְשִׁ֨יחַ֨ אֱלֹהֵ֣י יַעֲקֹ֔ב וּנְעִ֖ים זְמִרֹ֥ות יִשְׂרָאֵֽל׃
10O	23	2		86580	ר֥וּחַ יְהֺוָ֖ה דִּבֶּר־בִּ֑י וּמִלָּתֹ֖ו עַל־לְשֹׁונִֽי׃
10O	23	3		86590	אָמַר֙ אֱלֹהֵ֣י יִשְׂרָאֵ֔ל לִ֥י דִבֶּ֖ר צ֣וּר יִשְׂרָאֵ֑ל מֹושֵׁל֨ בָּ֣אָדָ֔ם צַדִּ֕יק מֹושֵׁ֖ל יִרְאַ֥ת אֱלֹהִֽים׃
10O	23	4		86600	וּכְאֹ֥ור בֹּ֖קֶר יִזְרַח־שָׁ֑מֶשׁ בֹּ֚קֶר לֹ֣א עָבֹ֔ות מִנֹּ֥גַהּ מִמָּטָ֖ר דֶּ֥שֶׁא מֵאָֽרֶץ׃
10O	23	5		86610	כִּֽי־לֹא־כֵ֥ן בֵּיתִ֖י עִם־אֵ֑ל כִּי֩ בְרִ֨ית עֹולָ֜ם שָׂ֣ם לִ֗י עֲרוּכָ֤ה בַכֹּל֨ וּשְׁמֻרָ֔ה כִּֽי־כָל־יִשְׁעִ֥י וְכָל־חֵ֖פֶץ כִּֽי־לֹ֥א יַצְמִֽיחַ׃
10O	23	6		86620	וּבְלִיַּ֕עַל כְּקֹ֥וץ מֻנָ֖ד כֻּלָּ֑הַם כִּֽי־לֹ֥א בְיָ֖ד יִקָּֽחוּ׃
10O	23	7		86630	וְאִישׁ֨ יִגַּ֣ע בָּהֶ֔ם יִמָּלֵ֥א בַרְזֶ֖ל וְעֵ֣ץ חֲנִ֑ית וּבָאֵ֕שׁ שָׂרֹ֥וף יִשָּֽׂרְפ֖וּ בַּשָּֽׁבֶת׃ ױ
10O	23	8		86640	אֵ֛לֶּה שְׁמֹ֥ות הַגִּבֹּרִ֖ים אֲשֶׁ֣ר לְדָוִ֑ד יֹשֵׁ֨ב בַּשֶּׁ֜בֶת תַּחְכְּמֹנִ֣י ׀ רֹ֣אשׁ הַשָּׁלִשִׁ֗י ה֚וּא עֲדִינֹ֣ו הָֽעֶצְנִ֔ו֯ עַל־שְׁמֹנֶ֥ה מֵאֹ֛ות חָלָ֖ל בְּפַ֥עַם אֶחָֽד֯׃ ײ
10O	23	9		86650	וְאַֽחֲרָ֛ו֯ אֶלְעָזָ֥ר בֶּן־דֹּד֖֯יֺ בֶּן־אֲחֹחִ֑י בִּשְׁלשָׁ֨ה ַ֯גִּבֹּרִ֜ים עִם־דָּוִ֗ד בְּחָֽרְפָ֤ם בַּפְּלִשְׁתִּים֨ נֶֽאֶסְפוּ־שָׁ֣ם לַמִּלְחָמָ֔ה וַיַּֽעֲל֖וּ אִ֥ישׁ יִשְׂרָאֵֽל׃
10O	23	10		86660	ה֣וּא קָם֩ וַ֙יַּךְ בַּפְּלִשְׁתִּ֜ים עַ֣ד ׀ כִּי־יָֽגְעָ֣ה יָדֹ֗ו וַתִּדְבַּ֤ק יָדֹו֙ אֶל־הַחֶ֔רֶב וַיַּ֧עַשׂ יְהֺוָ֛ה תְּשׁוּעָ֥ה גְדֹולָ֖ה בַּיֹּ֣ום הַה֑וּא וְהָעָ֛ם יָשֻׁ֥בוּ אַֽחֲרָ֖יו אַךְ־לְפַשֵּֽׁט׃ ױ
10O	23	11		86670	וְאַֽחֲרָ֛ו֯ שַׁמָּ֥א בֶן־אָגֵ֖א הָֽרָרִ֑י וַיֵּאָֽסְפ֨וּ פְלִשְׁתִּ֜ים לַֽחַיָּ֗ה וַתְּהִי־שָׁ֞ם חֶלְקַ֤ת הַשָּׂדֶה֙ מְלֵאָ֣ה עֲדָשִׁ֔ים וְהָעָ֥ם נָ֖ס מִפְּנֵ֥י פְלִשְׁתִּֽים׃
10O	23	12		86680	וַיִּתְיַצֵּ֤ב בְּתֹֽוךְ־הַֽחֶלְקָה֙ וַיַּצִּילֶ֔הָ וַיַּ֖ךְ אֶת־פְּלִשְׁתִּ֑ים וַיַּ֥עַשׂ יְהֺוָ֖ה תְּשׁוּעָ֥ה גְדֹולָֽה׃ 
10O	23	13		86690	וַיֵּֽרְד֨וּ שְׁלשָׁ֜ים֯ מֵֽהַשְּׁלשִׁ֣ים רֹ֗אשׁ וַיָּבֹ֤אוּ אֶל־קָצִיר֨ אֶל־דָּוִ֔ד אֶל־מְעָרַ֖ת עֲדֻלָּ֑ם וְחַיַּ֣ת פְּלִשְׁתִּ֔ים חֹנָ֖ה בְּעֵ֥מֶק רְפָאִֽים׃
10O	23	14		86700	וְדָוִ֖ד אָ֣ז בַּמְּצוּדָ֑ה וּמַצַּ֣ב פְּלִשְׁתִּ֔ים אָ֖ז בֵּ֥ית לָֽחֶם׃
10O	23	15		86710	וַיִּתְאַוֶּ֥ה דָוִ֖ד וַיֹּאמַ֑ר מִ֚י יַשְׁקֵ֣נִי מַ֔יִם מִבֹּ֥א֯ר בֵּֽית־לֶ֖חֶם אֲשֶׁ֥ר בַּשָּֽׁעַר׃
10O	23	16		86720	וַיִּבְקְעוּ֩ שְׁל֨שֶׁת הַגִּבֹּרִ֜ים בְּמַֽחֲנֵ֣ה פְלִשְׁתִּ֗ים וַיִּֽשְׁאֲבוּ־מַ֨יִם֙ מִבֹּ֤א֯ר בֵּֽית־לֶ֨חֶם֙ אֲשֶׁ֣ר בַּשַּׁ֔עַר וַיִּשְׂא֖וּ וַיָּבִ֣אוּ אֶל־דָּוִ֑ד וְלֹ֤א אָבָה֨ לִשְׁתֹּותָ֔ם וַיַּסֵּ֥ךְ אֹתָ֖ם לַֽיהֺוָֽה׃
10O	23	17		86730	וַיֹּ֡אמֶר חָלִילָה֩ לִּ֨י יְהֺוָ֜ה מֵֽעֲשׂ֣תִי זֹ֗את הֲדַ֤ם הָֽאֲנָשִׁים֨ הַהֹֽלְכִ֣ים בְּנַפְשֹׁתָ֔ם וְלֹ֥א אָבָ֖ה לִשְׁתֹּותָ֑ם אֵ֣לֶּה עָשׂ֔וּ שְׁל֖שֶׁת הַגִּבֹּרִֽים׃ ױ
10O	23	18		86740	וַֽאֲבִישַׁ֞י אֲחִ֣י ׀ יֹואָ֣ב בֶּן־צְרוּיָ֗ה ה֚וּא רֹ֣אשׁ הַשְּׁלשָׁ֔י֯ וְהוּא֙ עֹורֵ֣ר אֶת־חֲנִיתֹ֔ו עַל־שְׁל֥שׁ מֵאֹ֖ות חָלָ֑ל וְלֹו־שֵׁ֖ם בַּשְּׁלשָֽׁה׃
10O	23	19		86750	מִן־הַשְּׁלשָׁה֙ הֲכִ֣י נִכְבָּ֔ד וַיְהִ֥י לָהֶ֖ם לְשָׂ֑ר וְעַד־הַשְּׁלשָׁ֖ה לֹא־בָֽא׃ ױ
10O	23	20		86760	וּבְנָיָ֨הוּ בֶן־יְהֹֽויָדָ֧ע בֶּן־אִֽישׁ־חַ֛יִ֯ רַב־פְּעָלִ֖ים מִקַּבְצְאֵ֑ל ה֣וּא הִכָּ֗ה אֵ֣ת שְׁנֵ֤י אֲרִאֵל֨ מֹואָ֔ב וְ֠הוּא יָרַ֞ד וְהִכָּ֧ה אֶת־הָֽאֲרִ֛יה֯ בְּתֹ֥וךְ הַבֹּ֖א֯ר בְּיֹ֥ום הַשָּֽׁלֶג׃
10O	23	21		86770	וְה֣וּא הִכָּה֩ אֶת־אִ֨ישׁ מִצְרִ֜י אִ֣֯שׁר מַרְאֶ֗ה וּבְיַ֤ד הַמִּצְרִי֙ חֲנִ֔ית וַיֵּ֥רֶד אֵלָ֖יו בַּשָּׁ֑בֶט וַיִּגְזֹ֤ל אֶֽת־הַֽחֲנִית֙ מִיַּ֣ד הַמִּצְרִ֔י וַיַּֽהַרְגֵ֖הוּ בַּֽחֲנִיתֹֽו׃
10O	23	22		86780	אֵ֣לֶּה עָשָׂ֔ה בְּנָיָ֖הוּ בֶּן־יְהֹֽויָדָ֑ע וְלֹו־שֵׁ֖ם בִּשְׁלשָׁ֥ה הַגִּבֹּרִֽים׃
10O	23	23		86790	מִן־הַשְּׁלשִׁ֣ים נִכְבָּ֔ד וְאֶל־הַשְּׁלשָׁ֖ה לֹא־בָ֑א וַיְשִׂמֵ֥הוּ דָוִ֖ד אֶל־מִשְׁמַעְתֹּֽו׃ ױ
10O	23	24		86800	עֲשָׂהאֵ֥ל אֲחִֽי־יֹואָ֖ב בַּשְּׁלשִׁ֑ים אֶלְחָנָ֥ן בֶּן־דֹּודֹ֖ו בֵּ֥ית לָֽחֶם׃ ױ
10O	23	25		86810	שַׁמָּה֙ הַֽחֲרֹדִ֔י אֱלִיקָ֖א הַֽחֲרֹדִֽי׃ ױ
10O	23	26		86820	חֶ֚לֶץ הַפַּלְטִ֔י עִירָ֥א בֶן־עִקֵּ֖שׁ הַתְּקֹעִֽי׃ ױ
10O	23	27		86830	אֲבִיעֶ֨זֶר֨ הָֽעַנְּתֹתִ֔י מְבֻנַּ֖י הַחֻֽשָׁתִֽי׃ ױ
10O	23	28		86840	צַלְמֹון֨ הָֽאֲחֹחִ֔י מַֽהְרַ֖י הַנְּטֹֽפָתִֽי׃ ױ
10O	23	29		86850	חֵ֥לֶב בֶּן־בַּֽעֲנָ֖ה הַנְּטֹֽפָתִ֑י ױ אִתַּי֙ בֶּן־רִיבַ֔י מִגִּבְעַ֖ת בְּנֵ֥י בִנְיָמִֽן׃ ײ
10O	23	30		86860	בְּנָיָ֙הוּ֙ פִּרְעָ֣תֹנִ֔י הִדַּ֖י מִנַּֽחֲלֵי־גָֽעַשׁ׃ ױ
10O	23	31		86870	אֲבִֽי־עַלְבֹון֙ הָֽעַרְבָתִ֔י עַזְמָ֖וֶת הַבַּרְחֻמִֽי׃ ױ
10O	23	32		86880	אֶלְיַחְבָּא֨ הַשַּׁ֣עַלְבֹנִ֔י בְּנֵ֥י יָשֵׁ֖ן יְהֹֽונָתָֽן׃ ױ
10O	23	33		86890	שַׁמָּה֙ הַֽהֲרָרִ֔י אֲחִיאָ֥ם בֶּן־שָׁרָ֖ר הָֽארָרִֽי׃ ױ
10O	23	34		86900	אֱלִיפֶ֥לֶט בֶּן־אֲחַסְבַּ֖י בֶּן־הַמַּֽעֲכָתִ֑י אֱלִיעָ֥ם בֶּן־אֲחִיתֹ֖פֶל הַגִּֽלֹנִֽי׃ ױ
10O	23	35		86910	חֶצְרַו֨֯ הַכַּרְמְלִ֔י פַּֽעֲרַ֖י הָֽאַרְבִּֽי׃ ױ
10O	23	36		86920	יִגְאָ֤ל בֶּן־נָתָן֙ מִצֹּבָ֔ה בָּנִ֖י הַגָּדִֽי׃ ױ
10O	23	37		86930	צֶ֖לֶק הָֽעַמֹּנִ֑י נַֽחְרַי֨ הַבְּאֵ֣רֹתִ֔י נֹשֵׂ֕אי֯ כְּלֵ֖י יֹואָ֥ב בֶּן־צְרוּיָֽה׃ ױ
10O	23	38		86940	עִירָא֨ הַיִּתְרִ֔י גָּרֵ֖ב הַיִּתְרִֽי׃ ױ
10O	23	39		86950	אֽוּרִיָּה֨ הַֽחִתִּ֔י כֹּ֖ל שְׁלשִׁ֥ים וְשִׁבְעָֽה׃ ײ
10O	24	1		86960	וַיֹּ֨סֶף֨ אַף־יְהֺוָ֔ה לַֽחֲרֹ֖ות בְּיִשְׂרָאֵ֑ל וַיָּ֨סֶת אֶת־דָּוִ֤ד בָּהֶם֙ לֵאמֹ֔ר לֵ֛ךְ מְנֵ֥ה אֶת־יִשְׂרָאֵ֖ל וְאֶת־יְהוּדָֽה׃
10O	24	2		86970	וַיֹּ֨אמֶר הַמֶּ֜לֶךְ אֶל־יֹואָ֣ב ׀ שַׂר־הַחַ֣יִל אֲשֶׁר־אִתֹּ֗ו שֽׁוּט־נָ֞א בְּכָל־שִׁבְטֵ֤י יִשְׂרָאֵל֨ מִדָּן֨ וְעַד־בְּאֵ֣ר שֶׁ֔בַע וּפִקְד֖וּ אֶת־הָעָ֑ם וְיָ֣דַעְתִּ֔י אֵ֖ת מִסְפַּ֥ר הָעָֽם׃
10O	24	3		86980	וַיֹּ֨אמֶר יֹואָ֜ב אֶל־הַמֶּ֗לֶךְ וְיֹוסֵ֣ף יְהֺוָה֩ אֱלֹהֶ֨יךָ אֶל־הָעָ֜ם כָּהֵ֤ם ׀ וְכָהֵם֙ מֵאָ֣ה פְעָמִ֔ים וְעֵינֵ֥י אֲדֹנִֽי־הַמֶּ֖לֶךְ רֹאֹ֑ות וַֽאדֹנִ֣י הַמֶּ֔לֶךְ לָ֥מָּה חָפֵ֖ץ בַּדָּבָ֥ר הַזֶּֽה׃
10O	24	4		86990	וַיֶּֽחֱזַ֤ק דְּבַר־הַמֶּ֨לֶךְ֙ אֶל־יֹואָ֔ב וְעַ֖ל שָׂרֵ֣י הֶחָ֑יִל וַיֵּצֵ֨א יֹואָ֜ב וְשָׂרֵ֤י הַחַ֨יִל֨ לִפְנֵ֣י הַמֶּ֔לֶךְ לִפְקֹ֥ד אֶת־הָעָ֖ם אֶת־יִשְׂרָאֵֽל׃
10O	24	5		87000	וַיַּֽעַבְר֖וּ אֶת־הַיַּרְדֵּ֑ן וַיַּֽחֲנ֣וּ בַֽעֲרֹועֵ֗ר יְמִ֥ין הָעִ֛יר אֲשֶׁ֛ר בְּתֹֽוךְ־הַנַּ֥חַל הַגָּ֖ד וְאֶל־יַעְזֵֽר׃
10O	24	6		87010	וַיָּבֹ֨אוּ֨ הַגִּלְעָ֔דָה וְאֶל־אֶ֥רֶץ תַּחְתִּ֖ים חָדְשִׁ֑י וַיָּבֹ֨אוּ֙ דָּ֣נָה יַּ֔עַן וְסָבִ֖יב אֶל־צִידֹֽון׃
10O	24	7		87020	וַיָּבֹ֨אוּ֨ מִבְצַר־צֹ֔ר וְכָל־עָרֵ֥י הַחִוִּ֖י וְהַֽכְּנַעֲנִ֑י וַיֵּֽצְא֛וּ אֶל־נֶ֥גֶב יְהוּדָ֖ה בְּאֵ֥ר שָֽׁבַע׃
10O	24	8		87030	וַיָּשֻׁ֖טוּ בְּכָל־הָאָ֑רֶץ וַיָּבֹ֜אוּ מִקְצֵ֨ה תִשְׁעָ֧ה חֳדָשִׁ֛ים וְעֶשְׂרִ֥ים יֹ֖ום יְרֽוּשָׁלִָֽם׃
10O	24	9		87040	וַיִּתֵּ֥ן יֹואָ֛ב אֶת־מִסְפַּ֥ר מִפְקַד־הָעָ֖ם אֶל־הַמֶּ֑לֶךְ וַתְּהִ֣י יִשְׂרָאֵ֡ל שְׁמֹנֶה֩ מֵאֹ֨ות אֶ֤לֶף אִֽישׁ־חַ֨יִל֨ שֹׁ֣לֵֽף חֶ֔רֶב וְאִ֣ישׁ יְהוּדָ֔ה חֲמֵֽשׁ־מֵאֹ֥ות אֶ֖לֶף אִֽישׁ׃
10O	24	10		87050	וַיַּ֤ךְ לֵֽב־דָּוִד֙ אֹתֹ֔ו אַֽחֲרֵי־כֵ֖ן סָפַ֣ר אֶת־הָעָ֑ם ײ֯ וַיֹּ֨אמֶר דָּוִ֜ד אֶל־יְהֺוָ֗ה חָטָ֤אתִי מְאֹד֨ אֲשֶׁ֣ר עָשִׂ֔יתִי וְעַתָּ֣ה יְהֺוָ֔ה הַֽעֲבֶר־נָא֙ אֶת־עֲֺו֣ן עַבְדְּךָ֔ כִּ֥י נִסְכַּ֖לְתִּי מְאֹֽד׃
10O	24	11		87060	וַיָּ֥קָם דָּוִ֖ד בַּבֹּ֑קֶר ױ֯ וּדְבַר־יְהֺוָ֗ה הָיָה֨ אֶל־גָּ֣ד הַנָּבִ֔יא חֹזֵ֥ה דָוִ֖ד לֵאמֹֽר׃
10O	24	12		87070	הָלֹ֞וךְ וְדִבַּרְתָּ֣ אֶל־דָּוִ֗ד כֹּ֚ה אָמַ֣ר יְהֺוָ֔ה שָׁל֕שׁ אָֽנֹכִ֖י נֹוטֵ֣ל עָלֶ֑יךָ בְּחַר־לְךָ֥ אַֽחַת־מֵהֶ֖ם וְאֶֽעֱשֶׂה־לָּֽךְ׃
10O	24	13		87080	וַיָּבֹא־גָ֥ד אֶל־דָּוִ֖ד וַיַּגֶּד־לֹ֑ו וַיֹּ֣אמֶר לֹ֡ו הֲתָבֹ֣וא לְךָ֣ שֶֽׁבַע שָׁנִ֣ים ׀ רָעָ֣ב ׀ בְּאַרְצֶ֡ךָ אִם־שְׁלשָׁ֣ה חֳ֠דָשִׁים נֻֽסְךָ֙ לִפְנֵֽי־צָרֶ֜יךָ וְה֣וּא רֹֽדְפֶ֗ךָ וְאִם־הֱ֠יֹות שְׁל֨שֶׁת יָמִ֥ים דֶּ֨בֶר֙ בְּאַרְצֶ֔ךָ עַתָּה֨ דַּ֣ע וּרְאֵ֔ה מָֽה־אָשִׁ֥יב שֹֽׁלְחִ֖י דָּבָֽר׃ ױ
10O	24	14		87090	וַיֹּ֧אמֶר דָּוִ֛ד אֶל־גָּ֖ד צַר־לִ֣י מְאֹ֑ד נִפְּלָה־נָּ֤א בְיַד־יְהֺוָה֙ כִּֽי־רַבִּ֣ים רַֽחֲמָ֔ו֯ וּבְיַד־אָדָ֖ם אַל־אֶפֹּֽלָה׃
10O	24	15		87100	וַיִּתֵּ֨ן יְהֺוָ֥ה דֶּ֨בֶר֨ בְּיִשְׂרָאֵ֔ל מֵֽהַבֹּ֖קֶר וְעַד־עֵ֣ת מֹועֵ֑ד וַיָּ֣מָת מִן־הָעָ֗ם מִדָּן֙ וְעַד־בְּאֵ֣ר שֶׁ֔בַע שִׁבְעִ֥ים אֶ֖לֶף אִֽישׁ׃
10O	24	16		87110	וַיִּשְׁלַח֩ יָדֹ֨ו הַמַּלְאָ֥ךְ ׀ יְרֽוּשָׁלִַם֮ לְשַֽׁחֲתָהּ֒ וַיִּנָּ֤חֶם יְהֺוָה֨ אֶל־הָ֣רָעָ֔ה וַ֠יֹּאמֶר לַמַּלְאָ֞ךְ הַמַּשְׁחִ֤ית בָּעָם֙ רַ֔ב עַתָּ֖ה הֶ֣רֶף יָדֶ֑ךָ וּמַלְאַ֤ךְ יְהֺוָה֨ הָיָ֔ה עִם־גֹּ֖רֶן הָאֲוַ֥֯רְנָה הַיְבֻסִֽי׃ ױ
10O	24	17		87120	וַיֹּאמֶר֩ דָּוִ֨ד אֶל־יְהֺוָ֜ה בִּרְאֹתֹ֣ו ׀ אֶת־הַמַּלְאָ֣ךְ ׀ הַמַּכֶּ֣ה בָעָ֗ם וַיֹּ֨אמֶר֨ הִנֵּ֨ה אָֽנֹכִ֤י חָטָ֨אתִי֨ וְאָֽנֹכִ֣י הֶֽעֱוֵ֔יתִי וְאֵ֥לֶּה הַצֹּ֖אן מֶ֣ה עָשׂ֑וּ תְּהִ֨י נָ֥א יָדְךָ֛ בִּ֖י וּבְבֵ֥ית אָבִֽי׃ ױ
10O	24	18		87130	וַיָּֽבֹא־גָ֥ד אֶל־דָּוִ֖ד בַּיֹּ֣ום הַה֑וּא וַיֹּ֣אמֶר לֹ֗ו עֲלֵ֨ה הָקֵ֤ם לַֽיהֺוָה֙ מִזְבֵּ֔חַ בְּגֹ֖רֶן אֲוַ֥֯רְנָה הַיְבֻסִֽי׃
10O	24	19		87140	וַיַּ֤עַל דָּוִד֨ כִּדְבַר־גָּ֔ד כַּֽאֲשֶׁ֖ר צִוָּ֥ה יְהֺוָֽה׃
10O	24	20		87150	וַיַּשְׁקֵ֣ף אֲרַ֗וְנָה וַיַּ֤רְא אֶת־הַמֶּ֨לֶךְ֨ וְאֶת־עֲבָדָ֔יו עֹֽבְרִ֖ים עָלָ֑יו וַיֵּצֵ֣א אֲרַ֔וְנָה וַיִּשְׁתַּ֧חוּ לַמֶּ֛לֶךְ אַפָּ֖יו אָֽרְצָה׃ ױ
10O	24	21		87160	וַיֹּ֣אמֶר אֲרַ֔וְנָה מַדּ֛וּעַ בָּ֥א אֲדֹנִֽי־הַמֶּ֖לֶךְ אֶל־עַבְדֹּ֑ו וַיֹּ֨אמֶר דָּוִ֜ד לִקְנֹ֧ות מֵֽעִמְּךָ֣ אֶת־הַגֹּ֗רֶן לִבְנֹ֤ות מִזְבֵּחַ֙ לַֽיהֺוָ֔ה וְתֵֽעָצַ֥ר הַמַּגֵּפָ֖ה מֵעַ֥ל הָעָֽם׃
10O	24	22		87170	וַיֹּ֤אמֶר אֲרַ֨וְנָה֨ אֶל־דָּוִ֔ד יִקַּ֥ח וְיַ֛עַל אֲדֹנִ֥י הַמֶּ֖לֶךְ הַטֹּ֣וב בְּעֵינָ֑֯ו רְאֵה֙ הַבָּקָר֣ לָֽעֹלָ֔ה וְהַמֹּֽרִגִּ֛ים וּכְלֵ֥י הַבָּקָ֖ר לָֽעֵצִֽים׃
10O	24	23		87180	הַכֹּ֗ל נָתַ֛ן אֲרַ֥וְנָה הַמֶּ֖לֶךְ לַמֶּ֑לֶךְ ױ֯ וַיֹּ֤אמֶר אֲרַ֨וְנָה֙ אֶל־הַמֶּ֔לֶךְ יְהֺוָ֥ה אֱלֹהֶ֖יךָ יִרְצֶֽךָ׃
10O	24	24		87190	וַיֹּ֨אמֶר הַמֶּ֜לֶךְ אֶל־אֲרַ֗וְנָה לֹ֤א כִּֽי־קָנֹ֨ו אֶקְנֶ֤ה מֵאֹֽותְךָ֨ בִּמְחִ֔יר וְלֹ֧א אַֽעֲלֶ֛ה לַיהֺוָ֥ה אֱלֹהַ֖י עֹלֹ֣ות חִנָּ֑ם וַיִּ֨קֶן דָּוִ֤ד אֶת־הַגֹּ֨רֶן֙ וְאֶת־הַבָּקָ֔ר בְּכֶ֖סֶף שְׁקָלִ֥ים חֲמִשִּֽׁים׃
10O	24	25		87200	וַיִּבֶן֩ שָׁ֨ם דָּוִ֤ד מִזְבֵּחַ֨ לַֽיהֺוָ֔ה וַיַּ֥עַל עֹלֹ֖ות וּשְׁלָמִ֑ים וַיֵּֽעָתֵ֤ר יְהֺוָה֨ לָאָ֔רֶץ וַתֵּֽעָצַ֥ר הַמַּגֵּפָ֖ה מֵעַ֥ל יִשְׂרָאֵֽל׃ ײ